Read lulogooli 1 Kyetsinyinga 14 Bible Online

1 Kyetsinyinga 14 - lulogooli bible

1 Kyetsinyinga 14

¹Hiram mwami wa Turo ya tuma vatumwa ku Daudi, nemi sala gyo Mutaragwa, navasidza vo kwombaka, navavadzi, va mwomba kire inyumba.

²Na Daudi ya manya Yahova u mali kumusinge ridza kuva mwami ku Israeli; kigira ubwami bwibwe bwa nenehidzwa ligali, kigira avandu veve Israeli.

³Daudi ya kwa vakali vandi ha Yerusalemi; Daudi yivula avana va ndi avayai navakana.

⁴Navana yavo ni yava: Shamua, na Shobabu, na Nathan, na Solomoni,

⁵na Ibiharu, na Elishua, na Elipeleti,

⁶na Noga, na Nefegu, na Jafia,

⁷na Elishama, na Beeliada, na Elifeleti.

⁸Vafilisiti lwa va hulira Daudi u vakeywi maguta a ve mwami ku Israeli vosi, Vafilisiti vosi vanegira kutsia kwenya Daudi: na Daudi ya hulira, na ya tsia kyova kulwana navo.

⁹Na Vafilisiti va li ni va tsie kutwulira amadala mwivona lya Refaim.

¹⁰Daudi ya teva Nyasaye, na a vola, Nyanegire kulwana na Vafilisiti naho? Ka ive u la va vika mmukono gwange naho? Na Yahova ya mu volera, Yanegira; kigira inze nda va vika mmukono gugwo.

¹¹Ma va duka Baalperazim, na Daudi ya va kuyira yo; na Daudi ya vola, Nyasaye u vunannyi avasigu vange nomukono gwange, kuli lidzu lira lyamadzi. Kigira yaga va gulika ha zana Baalperazim.

¹²Navo va leka avanyasaye vavo ha zana; na Daudi ya laga, ni va sambirwa ho.

¹³Na Vafilisiti va twulira mwivona kandi hali kaviri.

¹⁴Na Daudi ya teva Nyasaye hali kaviri; Nyasaye ya mu volera, U tanegira kuvalonda mba: wekenduke, kutsira kuvo ku luvega lwemisala gyetsinyengereri.

¹⁵Na ga la va, lwa u hulira muliviti gweligenda ku tsisonga tsyemisala gyetsinyengereri, hene yaho u la twula kutsia kulwana; kigira Nyasaye u twuli imbiri wowo a duke kukuya lihe lya Vafilisiti.

¹⁶Na Daudi ya kola kuli Nyasaye ya mu laga: na va kuya lihe lya Vafilisiti kutwula Gibeon kudulsa Gezeri.

¹⁷Noluyali lwa Daudi lwa landa kuduka mu vivala vyosi; na Yahova ya leta litihidza lilye ku tsihiri tsyosi.