Read lulogooli 1 Kyetsinyinga 18 Bible Online

1 Kyetsinyinga 18 - lulogooli bible

1 Kyetsinyinga 18

¹Inyima wa yaga, Daudi ya kuya Vafilisiti, nokuvagehidza, na ya vugula Gathu na madala galyo ku twula mmakono ga Vafilisiti.

²Ka ndi ya kuya Moabu: na Vamoabu va gwa vatumekiri va Daudi, na va mu letera busutu.

³Kandi Daudi ya kuya Hadarezeri mwami wa Zoba kuduka Hamathu, lwa ya tsia kusingeridza ubwami bwibwe himbi nomugera gwa Farati.

⁴Na Daudi ya mu nyaga magari elfu, navasikari vokunina ku tsiparasi tsielfu tsitano na tsiviri, navasikari va genda nevirenge tsielfu makumi gaviri; na Daudi ya kalaga tsiparasi tsyosi tsyamagari amaki, navutswa ya leka tsindala kutsyo tsi duki amagari mia.

⁵Na Vasiria va Damasko lwa vadza kukonya Hadarezeri, mwami wa Zoba, Daudi ya kuya ku Vasiria avandu tsielfu makumi gaviri na tsi viri.

⁶Hene yaho Daudi ya vika arasikari rere mu Siria ya Da masko; na Vasiria va gwa ava tumekiri va Daudi, na va leta kuye ubusutu. Na Yahova ya ha Daudi liguuta hosi ha ya tsia.

⁷Na Daudi ya vugula tsingavo tsyetha habu tsyavatumekiri va Hadarezeri va li natsyo, nokutsileta Yerusalemi.

⁸Na mu Tibihathu na mu Kun madala ga Hadarezeri, Daudi ya vugula migasa minyingi ligali, gya Solomoni ya lombera inyanza yomu gasa, netsitiru, neviju vyomugasa.

⁹Na Tou mwami wa Hamathu lwa ya hulira Daudi u kuyi lihe lyosi lya Hadarezeri mwami wa Zoba,

¹⁰ya tuma Hadoram mwana wewe ku mwami Daudi, a duke kumuchelidza, nokumugasidza, kigira ya lwana na Hadarezeri nokumukuya ligali (kigira Hadarezeri ya li na a veye nobulwani na Tou); naye ya li neviju vyetsing'ano tsyosi, vyethahabu, ne vyefetha nevyomugasa.

¹¹Viju zana kandi Daudi ya vi vika ha luvega kugima ku Yahova, halala nefetha nethahabu ya ya hula mu tsihiri yitsi tsyosi; mu Edom, na mu Moabu na mu avana va Amon, na mu Vafili siti na mu Amaleki.

¹²Kandi Abishai mwana wa Zeruia ya kuya avandu tsielfu likumi na tsitano na tsivaka mu Vaedom, Mwivona lya Munyu

¹³Na ya vika avasikari veve mu Edom; na Vaedom vosi va gwa vatumekiri va Daudi. Na Yahova ya ha Daudi kuguuta hosi ha ya tsia.

¹⁴Na Daudi yameha ku Israeli vosi; na a kola likalaga nobulungi ku avandu veve vosi.

¹⁵Na Joabu mwana wa Zeruia ya li igulu ku lihe lya vasikari; na Jehoshafatu mwana wa Ahiludu ya li mwidzulitsi;

¹⁶na Zadoku mwana wa Ahitubu, na Abimeleku mwana wa Abiatharu, va li avasalisi; na Shavisha ya li mung'odi;

¹⁷na Benaia mwana wa Jehoiada ya li igulu ku Vakerethi na Vapelethi; navana vayai va Daudi va li avanene himbi nomwami.