Read lulogooli 2 Kyetsinyinga 15 Bible Online

2 Kyetsinyinga 15 - lulogooli bible

2 Kyetsinyinga 15

¹Na Roho wa Nyasaye ya duka ku Azaria mwana wa Odedi:

²naye ya twula kutsia kwagana na Asa, na a mu volera, U mbulire, Asa, na vosi va Yuda na Benjamini: Yahova a veye halala na mwinye, lwa mwinye mu veye halala naye; ni mu va ni mu mwenya, a la loleka na mwinye; navutswa ni mu va ni mu mu leka, a la leka mwinye.

³Kigira kuduka inyinga ntambi Israeli ya li vutswa bugira Nyasaye weligali, na bugira musalisi wokwegidza, na bu gira lilaga:

⁴navutswa lwa va li mu kivi va yeka ku Yahova, Nyasaye wa Israeli, nokumwenya, ya loleka kuvo.

⁵Mu tsinyinga yitsyo si ya li nemirembe ku uyu wa twulanga, kinga ku uyu wingiranga; navutswa lidambidzwa linyingi lya li ku vosi ava menya mu vivala yivyo.

⁶Na ihiri yononnya ihiri, nelidala lyononnya lidala; kigira Nyasaye ya va dambidza nelidambidza lyosi.

⁷Navutswa mu ve avanyala, makono genyu ga ta va madedekere; kigira miyinzi gyenyu gyi la va na madanyi.

⁸Na lwa Asa ya hulira makuva yaga, neliprofeta lyomuprofeti Odedi, ya lema mwoyo, na ya vika ha luvega ubudamano bwosi bwa twula mu kivala kyosi kya Buyuda na Benja mini, nokutwula madala ga ya vugula mu kivala kyevigulu kya Efiraim; na ya digulula ubwali bwa Yahova, bwa li imbiri wolusimbu lwa Yahova.

⁹Na ya vungidza avandu vosi va Yuda na Benjamini, na vosi ava menya halala navo va twula mu Efiraim na Manase, na Simeoni: kigira va yeka kuye vanyingi mu Israeli, lwa va lola Yahova Nyasaye wewe a veye halala naye.

¹⁰Ma vevungidza avene halala mu Yerwa lemi ku muhiga gwelikumi negyitano gweliyameha lya Asa, mu mweli gwegyivaka.

¹¹Lidiku yilyo viitira Yahova, tsing'ombe tsimia tsitano na tsiviri na magondi tsielfu tsitano na tsiviri mu vilanye vya va leta.

¹²Na vingira mu lilagana kwenya Yahova, Nyasaye wa vaguga vavo, nemyoyo gyavo gyosi na roho gyavo gosi;

¹³noku vosi wa vula kwenya Yahova, Nyasaye wa Israeli, kwiitwa, kutwula ku muke kuduka ku munene, na a va musatsa na a va mukali.

¹⁴Na visuhira Yahova nomwoyo mu nene, nokukupa uluku, na mang'alala, nevisiliva.

¹⁵Na vosi mu Yuda va sangala ku lyesuha, kigira visuha nemyoyo gyavo gyosi, ni va mwenya nobuyanzi bwavo bwosi; na ya nyoleka kuvo: na Yahova ya va sosidza tsimbega tsyosi.

¹⁶Na kandi Maaka, mama wo mwami Asa, ya mu twulidza mu bwami bwekikali, kigira ya lombera misala gyemisambwa gye kifwananyi kyokuvihiriridza, na Asa ya tema kifwananyi kikye, na a ki sia, na a kisambira ha mugera gwa Kidiron.

¹⁷Navutswa si ya twulidza hadigu luku mu Israeli mba: navutswa mwoyo gwa Asa gwa li mudukiru madiku gege gosi.

¹⁸Naye ya vika mu inyumba ya Nyasaye, vindu vya dada wewe ya gima, na vyomwene ya gima, ifetha, nethahabu, neviju.

¹⁹Na si ha li nobulwani kandi kuduka ku muhiga gwa makumi ga vaka na gyitano gwelyameha lya Asa.