Read lulogooli 2 Kyetsinyinga 25 Bible Online

2 Kyetsinyinga 25 - lulogooli bible

2 Kyetsinyinga 25

¹Amazia ya li wemihiga makumi gaviri na gyitano lwa ya tanga kwameha; na yameha mihiga makumi gaviri na gyitano na gyine mu Yeru salemi: na lieta lya mama wewe lya langwa Jehoadan, wa Yerusalemi.

²Ya kola gobulungi mu tsimoni tsya Yahova, navutswa si ya li nomwoyo mu dukiru.

³Na ga duka, lwa bwami bwa dinyeridzwa kuye, yiita avatumekiri veve aviita mwami, dada wewe.

⁴Navutswa avana vavo si ya viita mba, navutswa ya kola kuli ga ng'odwa mu kitabu kyelilaga lya Musa, kuli Yahova ya laga, na a vola, Vadada va ta kudza kigira avana, kandi avana va ta kudza kigira vadada; navutswa mundu sa mulala a kudze kigira bwoni bwibwe.

⁵Kandi Amazia va vungidza Va yuda, na a va vika kuli tsinyumba tsyavaguga, isi wa vanyampara vetsi elfu, na vanyampara vetsimia, vosi va Yuda na Benjamini: ya va validza kutwula wemihiga makumi gaviri nokutsia igulu, ya nyola tsielfu tsimia tsivaka, avandu avatovole, ava nyala kutsia mbulwani, avamanyi kugumira amatimu netsikuti.

⁶Ya lagana navandu tsielfu mia avasatsa valuvi riri mu Israeli, a va tunge tsitalenta mia tsyefetha.

⁷Navutswa mundu wa Nyasaye ya tsia kuye, na a mu volera, O mwami, u ta leka lihe lya Israeli kutsia halala nive; kigira Yahova si a veye halala na Vaisraeli mba, livola li veye, avana vosi va Efiraim.

⁸Navutswa ive nu u tsia, u kole u ve umugulu ku bulwani: Nyasaye a la ku tsoma imbiri wava sigu, kigira Nyasaye a veye netsi ngulu tsyokukonya, netsyokutsoma hasi.

⁹Na Amazia ya volera mundu wa Nyasaye, Navutswa ku la kola ndi tsitalenta mia tsya nda ha lihe lya Israeli? Mundu wa Nyasaye ya mu tivulira, Yahova a nyala kukuha kuvita yitsyo ligali.

¹⁰Hene yaho Amazia ya vahula, livola li veye, lihe lyadza kuye kutwula Efiraim, va duke kwirana wavo: kigira yaga ubutima bwavo bwaaka ligali ku Yuda, na virana wavo nobutima ligali.

¹¹Ma Amazia ya kola bu gulu, na yimirira avandu veve, na ya tsia Mwivona lyo Munyu, na kuya avana va Seiru tsielfu likumi.

¹²Avana va Yuda va gumira avandi kandi tsielfu likumi ni va tsia navo ni va veye mwoyo, kuduka kuintongi yeligina, ni va vagulula kutwula ku intongi yeligina, ni va wngika vosi.

¹³Navutswa avandu velihe ava Amazia yirannya, va vule kutsia halala naye mbulwani, va vukira madala ga Yuda, kutwula Samaria kuduka Bethhoron, na viita mugo avandu tsielfu tsivaka, na va vugula vilanye vinyingi.

¹⁴Na ga duka, lwa Amazia ya mala kwirana kutwula mu likuya lya Vaedom, ya manya na a leta avanyasaye vavana va Seiru, na ya va singeridza kuva vanyasaye veve, na mwene ya sigama imbiri wavo, na a vuyidza vimuli kuvo.

¹⁵Hene yaho butima bwa Yahova bwaaka ku Amazia, na ya tuma kuye muprofeti, wa mu volera, Kigira ki wenya ava nyasaye vavandu, va ta nyala kutwu lidza avandu vavo mu mukono gugwo?

¹⁶Na ga duka, lwa ya volerana naye, mwami ya mu volera, Ku viki ive u ve mboli womwami? Leka; kigira ki wenyanga kukuywa? Hene yaho muprofeti ya leka, na a vola, Mmanya Nyasaye u saaviye kudividza ive, kigira wa kola yaga, na wa vula kuhulira makuva gange.

¹⁷Hene yaho Amazia mwami wa Yuda ya lomba makuva, na ya tuma vatumwa ku Joashu, mwana wa Jehoahazu mwana wa Jehu, mwami wa Israeli, kumuvolera, Hamba, ku lolane mmoni nommoni.

¹⁸Na Joashu mwami wa Israeli ya tivulira Amazia mwami wa Yuda, na a vola, Litagalu li veye mu Lebanon lya tuma mutumwa ku mutaragwa gu veye mu Lebanon, ni li vola, U vakire umwana wange umukana wowo: inyama indulu ya li mu Lebanon ya vita, ya duvaga litagalu zana.

¹⁹Wa vola, Henza, ive wa kuya Edom; mu mwoyo gugwo gu kwegingeridza no kwegingira; menya ingo kalunu, kigira ki wevikanga vutswa mu busaliri, u luhe u gwe, ive, na Yuda halala nive?

²⁰Navutswa Amazia si ya bugirira kuhulira; kigira ga twula ku Nyasaye, a duke kuvavika mmakono gvasigu vavo kigira venya vanyasaye va Edom.

²¹Ma Joashu mwami wa Israeli yanegira; na uyu na Amazia va lolana mmoni nommoni ha Beth shemeshi lya li miyandu gya Yuda.

²²Na Yuda va guutwa imbiri wa Israeli; na virukira sa mulala mu lihema lilye.

²³Joashu mwami wa Israeli ya gumira Amazia mwami wa Yuda, mwana wa Joashu, mwana wa Jehoahazu, ha Bethshemeshi, na a mu leta Yerusalemi, na a sambula lugaga lwa Yerusalemi kutwula ku kiribwa kya Efiraim kuduka ku kiribwa kyekona, ligera lyamakono tsimia tsine.

²⁴Na ya vugula itha habu yosi nefetha, neviju vyosi vya loleka mu inyumba ya Nyasaye halala na Obededom, na akiba yenyumba yomwami, navandu veki hambiriru, yirana Samaria.

²⁵Amazia mwana wa Joashu mwami wa Yuda ya menya mihiga likumi na gyitano inyima welikudza lya Joashu mwana wa Jehoahazu mwami wa Israeli.

²⁶Na vya tigala ku vikolwa vya Amazia, vyo kutanga na vyekiheri, henza, si vya ng'odwa mu kitabu kyavami va Yuda na Israeli?

²⁷Nokutwula inyinga Amazia ya girunkana ku leka kulonda Yahova, va singeridza bwebaali kuye mu Yerusalemi; na yirukira Lakishi: va tuma avandu kumulonderera kuduka Lakishi, ni va mwiitira yo.

²⁸Na va mu letera ku tsiparasi, na va mu ta halala navaguga veve mu lidala lya Yuda.