Read lulogooli 2 Kyetsinyinga 27 Bible Online

2 Kyetsinyinga 27 - lulogooli bible

2 Kyetsinyinga 27

¹Jotham ya li wemihiga makumi gaviri na gyitano lwa ya tanga kwameha; na yameha mihiga likumi na gyitano na mulala mu Yerusalemi: na lieta lya mama wewe lya langwa Jerusha mwana wa Zadoku.

²Na ya kola agobulungi mu tsimoni tsya Yahova, kuli gosi ga dada wewe Uzia ya kola: navutswa si yingira mu litempeli lya Yahova mba. Navandu va li ni va ki kolanga ubudamano.

³Na yombaka kiribwa kyegulu kyenyumba ya Yahova, na yombaka ligali ku lugaga lwa Ofeli.

⁴Kandi yombaka madala mu vigulu vya Yuda, na yombaka tsimpinga na vitaradzi mu mulitu.

⁵Na ya lwana nomwami wavana va Amon, na a va guuta. Ku muhiga yigwo avana va Amon va mu ha tsitalenta mia tsyefetha, nemigero tsielfu likumi tsye ngano, nemigero tsielfu likumi tsye shairi. Yili nilyo livalidza lyavana va Amon va mu ha, noku muhiga gwa kaviri, nogwa kavaka.

⁶Ni ndiyo Jotham ya li netsingulu, kigira ya lomba tsinzira tsitsye imbiri wa Yahova Nyasaye wewe.

⁷Na vya tigala ku vikolwa vya Jotham, nobu lwani bwibwe bwosi, netsinzira tsi tsye, henza, vya ng'odwa mu kitabu kyavami va Israeli na Yuda.

⁸Ya li wemihiga makumi gaviri na gyi tano lwa ya tanga kwameha, na yameha mihiga likumi na gyitano na mulala mu Yerusalemi.

⁹Na Jotham ya gona halala navaguga veve, va mu ta mu lidala lya Daudi: Ahazu mwana wewe yameha mbugono bwibwe.