Read lulogooli Nehemia 1 Bible Online

Nehemia 1 - lulogooli bible

Nehemia 1

¹Yaga na makuva ga Nehemia mwana wa Hakalia Na ga duka ku mweli gwa Kiselevu, mu muhiga gwa makumi gaviri, lwa inze nda li mu Shushan i veye inyumba yobwami,

²Hanani, mulala ku vamwavo vange, yadza, uyu na vandu vandi ava twula Yuda; na nda va teva makuva ga Vayuda va hona, avatigala ku velyadikidzwa, na ga Yerusalemi.

³Navo va mbolera, Avandu va tigala ku velyadikidzwa mu kivala va veye mu kivi kinene nokunyegwa: lidigi lya Yerusalemi li sambuliywi, na viribwa vyalyo vi sambeywi nomuliru.

⁴Kunangwa, lwa nda hulira makuva yaga, ndikala nokulira, noku syoma madiku aga duki; na nda honga lilia nokusaala imbiri wa Nyasaye womigulu,

⁵nda vola, O Yahova, Nyasaye womigulu, Nyasaye munene wokutihidza, wokudu kidza lilagana netsimbabasi ku yavo ava mu yanza nokugumira amalago gege, nku goonya, mwadza:

⁶ugutu gugwo gu tegidzwe, na tsimoni tsitsyo tsi kunuke, u duke kuhulira lisaala lyomutumekiri wowo, lya nsaalanga imbiri wowo inyinga yiyi, mbasu nobudiku, ku avana va Israeli ava tumekiri vovo, lwa nzeyama ubwoni bwavana va Israeli, ubwa ku koli ku ive. Yee, inze nenyumba ya dada wange ku koli ubwoni:

⁷ku koli aga veye madamano ku ive, na ku vuli kugumira lilagana, kinga ama lago, kinga likalaga, lya wa laga mutu mekiri wowo Musa.

⁸Mwadza, nku saala ligali, widzulitse likuva lya wa laga mutumekiri wowo Musa, lwa wa vola, Ni mu va ni mu hyola, nda mu salannya hagati ha vandu vetsihiri:

⁹navutswa ni mwirana ku inze, nokugumira lilagana lyange nokuli kola, kali yavo ava kungwa ni va veye ku luvega lwekiheri kyeligulu, nda va vungidza kutwula ha va veye nokuvaleta ha ntovoye, nduke kuvika ho lieta lyange.

¹⁰Kunangwa avandu yava va veye avatumekiri vovo, na avandu vovo, ava ive wa honnya netsingulu tsitsyo tsinene, nomukono gugwo gwetsingulu.

¹¹O Yahova, mwadza, nku saala ligali, ugutu gugwo gu tegidzwe kuhulira lisaala lyomutumekiri wowo, na lisaala lya vatumekiri vovo, ava sangala mu litia lieta lilyo; na nku saala ligali, u ngasidze inze mutumekiri wowo lero, u mbe tsimbabasi imbiri wo mundu uyu. Kigira inze nda li munwehidze womwami.