Read lulogooli Nehemia 4 Bible Online

Nehemia 4 - lulogooli bible

Nehemia 4

¹Navutswa ga duka, lwa Sanbalati ya hulira kwombakanga lidigi, ya vihirirwa, na ya nyola ubutima ligali, nokukolera Vayuda kihenya henye.

²Na ya vola imbiri wava mwavo veve, na imbiri welihe lya Samaria, na a vola, Yava Vayuda avadedekeri va kolanga ki? Ya levikira lugaga? Kinga va la haana ki haanwa? Kinga va la mala mu lidiku lilala? Va la simugukidza magina ga twule mu vitumi vyamandu, aga sambwa?

³Na Tobia Muamon ya li himbi naye, na ya vola, Kali aga vombakanga, ni i va kibwe ki nina ku ki la sambula lidigi lyavo lyamagina.

⁴U hulire, O Nyasaye wetu kigira ku legangwa: na u girukannye manyego gavo girane ku mitwe gyavo avene, na u va twulidze va lanywe mu lyadikidzwa;

⁵na u ta kunika ubudamano bwavo, na ubwoni bwavo bu vule kweywa imbiri wowo; kigira va vihiridza ive imbiri wavombaki.

⁶Ma kwombaka lidigi; na lidigi lyosi lya hambana halala kuduka inusu ya budiguluku bwalyo: kigira avandu va li nomwoyo gwokukola miyinzi.

⁷Navutswa ga duka, lwa Sanba lati, na Tobia, na Vaarabu, na Va amon, na Vaashidodi, va hulira makuva gelidigulula lyalidigi lyolugaga lwa Yerusalemi li tsitsanga mu limalwa, kandi masusuguku ga ta ngeywe kulombwa, hene yaho va vihirirwa ligali;

⁸na va hambana ku likuva lilala vosi va duke kutsia kulwana na Yerusalemi, nokukola ligoyanya mulyo.

⁹Navutswa kwa kola lisaala lyetu ku Nyasaye wetu, nokuvika valindi kuvo mbasu nobu diku, kigira yavo.

¹⁰Na Yuda ya vola, Tsingulu tsyavagingi tsi gehi, na ha veye namandu manyingi; na si ku nyala kwombaka lidigi yili.

¹¹Na avasigu vetu va vola, Si va la manya, kinga kulola, lwa ku duka hagati havo, nokuviita, nokuheridza miyinzi.

¹²Na ga duka, lwa Va yuda va menya himbi navo vadza va ku volera hali likumi kutwula hosi, Ga dukira mwinye kwirana ku kwinye.

¹³Kunangwa kigira yaga nda vika avandu ha bwimbi bwolugaga mu bwiyangu bwenyima wolugaga halang'amu nda vika ho avandu kulonda bwiko bwavo nevivavi vyavo, namatimu gavo, nobuta bwavo.

¹⁴Na nda henza, nokusingira, nokuvolera avanene, nava mehi, navandu vandi avatigala, Mwi nye mu ta tia yavo mba: mwidzulitse Yahova, u veye munene noweliti hidza, na mu lwanire avamwavo venyu, navana venyu, avayai na vakana, navakali venyu, netsinyumba tsyenyu.

¹⁵Na ga duka, lwa avasigu vetu va hulira, likuva yili li manyekani ku kwinye, na Nyasaye wononnyi livola lyavo, hene yaho kwosi kwirana ku lidigi, mundu sa mulala ku miyinzi gyigye.

¹⁶Na ga duka kutwula inyinga yeyo, inusu ku vatumekiri vange va kola miyinzi, na inusu kuvo va gumira matimu, netsingavo, nobuta, netsisalamba tsyevivya; na avamehi vavo va li inyima wenyumba yosi ya Yuda.

¹⁷Yavo avombaka lidigi, na yavo ava ginga misigo, avene vidwika; sa mulala ya tumika mu miyinzi nomukono gwigwe mulala, na ya gumira yuma vivye nomukono gundi;

¹⁸na vombaki sa mulala ya li nekivavi kikye ni ki boheywi ku ivadzwa yeye, na ndiyo vombaka. Na uyu wa kupa kisiliva ya li ahimbi ku inze.

¹⁹Na nda volera avanene, navamehi navandu vandi, Miyinzi gyi veye minene kandi gyi veye migalamu, na kwinye ku salasani ku lidigi, sa mulala a veye ihale nowakye:

²⁰hosi ha mu hulira kisiliva, mbugane ha zana ha ku veye; na Nyasaye wetu a la ku lwanira.

²¹Na ndiyo kwa tumika mu miyinzi: nenusu yavandu va gumira matimu kutwula lwa bwa kya kuduka tsing'ering'ani tsya loleka.

²²Kandi inyinga yeyo nda volera avandu Mundu sa mulala a gona mu Yeru salemi, halala nomutumekiri wewe, va duke kuva valindi vokulinda kwinye inyinga yo budiku, nokutu mika inyinga yombasu.

²³Ma ga duka inze, na vamwavo vange, na avatumekiri vange, na avasatsa yavo avalindi ava londa inze, si kwa navula tsingubo tsyetu, kali mulala ku kwinye, navutswa sa mulala ya tsia mkidaho nevyuma vivye.