Read lulogooli Esther 1 Bible Online

Esther 1 - lulogooli bible

Esther 1

¹Ga duka mmadiku gomwami Ahasueru (uyu ni Ahasueru wa meha kutwula kivala kya India kuduka Ethiopia, ku tsiprovinse mia na makumi gaviri na tsitano na tsiviri),

²mmadiku yago mwami Ahasueru lwa yikala ku intebe yobwami bwibwe, ya li mu inyumba yobwami mu Shushan,

³mmuhiga gwegyivaka gwelyameha lilye, ya lombera avenene veve vosi navatume kiri veve lilia; tsingulu tsya Persia na Media, avagali, navene vetsiprovinse va li imbiri wewe;

⁴lwa ya lang'aminya ubutugi bwobukumi bwo bwami bwibwe, na lidzominywa lyelyameha linene lilye madiku manyingi, kuduka madiku mia na makumi gatano na gavaka.

⁵Na lwa madiku yaga ga dukidzwa, mwami ya lombera avandu vosi ava li mu Shushan mu inyumba yomwami avanene na vakekeke, lilia lya duka madiku gatano na gaviri, mu mgidzi gwomulimi gwenyumba yobwami yo mwami.

⁶Tsya li ho tsingubo tsindavu, netsifwana ubulimu, netsyeblue, tsya sungwa nemigoye gye ikatani indahi, nekiforosadi, ni tsi sungwa netsimingiri tsyefetha ku tsitiru tsya magina malavu madinyu; vitali vya li vyethahabu na vyefetha, vya li ku magina malavu madinyu lyalwa hasi lyakanyu na lilavu, na lya mususi na lya mamwamu.

⁷Kandi va va ha vyokunwa mu viju vyethahabu (viju vya li lugano lugano), na iwaini yobwami inyingi, kuli ubuhaani bwo mwami.

⁸Na linwa lya li kuli lilaga; si ha li nowomunwa kuniga wundi, kigira mwami ya li kulaga ndiyo avanene vosi venyumba yeye, va kole kuli liyanza lyavandu sa mulala.

⁹Kandi Vashti mukali womwami ya lombera avakali ava li mu inyumba yomwami Ahasueru, lilia.

¹⁰Ku lidiku lya gatano na gaviri mwoyo gwomwami lwa gwa sangaia kigira iwaini, ya haana munwa ku Mehu mani, na Bizatha, na Harabana, na Bigatha, na Abagatha, na Zetharu, na Karikasi, avalindi venyumba yo mwami vatano na vaviri ava tumika imbiri womwami Ahasueru,

¹¹va lete Vashti mukali womwami imbiri womwami halala na itaji yobwami, a mannye avandu na avanene ubulahi bwibwe; kigira ya li mulahi ligali kuhenzwa.

¹²Navutswa Vashti mu kali womwami ya sula kuudza ku lilaga lyomwami lya valindi venyu mba va leta: kigira yaga mwami ya vihirirwa ligali, na ubutima bwaaka muye.

¹³Ma mwami ya volera avandu avageeri ava li ni va manya tsinyinga (kigira miima gyomwami gya li ndiyo ku vosi ava manya amalago na likalaga;

¹⁴kandi ava kaviri kuye va li Karishena, na Shetharu, na Adamatha, na Tarshishi, na Meresu, na Maresena, na Memukan, yava avanene vatano na vaviri va Persia na Media, ava li kulola mumoni mwo mwami, nokwikala avokutanga mu bwami);

¹⁵Ku la kola ki ku Vashti mukali womwami kuli lilaga kigira si a bugiriye kukola likuva lyomwami Ahasueru lya valindi ve nyumba yomwami va mu hilira?

¹⁶Na Memukan ya tivula imbiri wo mwami navanene, Vashti mukali wo mwami si a koli ubudamano ku mwami yeng'ine, navutswa a koli ku avanene, noku avandu vosi ava veye mu tsiprovinse tsyomwami Ahasueru.

¹⁷Kigira likola yili lyomukali wo mwami li la landidzwa ku vakali vosi, nokukola avasatsa vavo kule geridzwa imbiri wavo, lwa ga volwa, Mwami Ahasueru ya haana munwa Vashti mukali wewe a letwe imbiri wewe, navutswa si yadza mba.

¹⁸Kandi lidiku lya lero avakali vavanene vosi va Persia na Media ava huliye makuva gelikola lyomukali womwami, va la volera avasatsa vavo ndiyo. Na ndivo lilegana linyingi li la vuka, nobutima bunyingi.

¹⁹Ni i va mwami a yanza, lilaga lilye lyobwami li twule mmunwe gwo mwami, kandi li ng'odwa mmalago ga Vapersia na Vamedia, li wle kugirunkanywa, kuvola, Vashti a tingira kandi imbiri womwami Aha sueru; na mwami a he wundi u veye mulahi kuvita uyu, ubunene bwi bwe bwobwami.

²⁰Kunangwa lilaga lyomwami lya a li laga, lwa li la landidzwa mu bwami bwibwe bwosi, (kigira bwa li ubunene), avakali vosi va la ha avasatsa vavo lidzominya, ku vosi avanene na vakekeke.

²¹Likuva yili lya yanzidza mwami na vanene; na mwami ya kola kuli likuva lya Memukan:

²²ma ya hila tsibaruwa ku tsiprovinse tsyosi tsyomwami, ku iprovinse se ndala kuli ling'oda lyayo, noku tsihiri se indala kuli ululimi lwatsyo, kuvola avasatsa vosi sa mulala vamehe mu i inyumba yeye, nokuvola kuli ululimi lwa vandu veve.