Read lulogooli Esther 4 Bible Online

Esther 4 - lulogooli bible

Esther 4

¹Mordekai lwa ya manya gosi ga kolwa, Mordekai ya tandula tsi ngubo tsitsye, ni yevika magunia neligoke, na a twula na a tsia hagati helidala, na a lira lilira linene lyobu lulu;

²na a duka imbiri wekiribwa kyomwami: kigira wevika ligunia si a nyala kwingira mu kiribwa kyomwami.

³Kandi mu tsiprovinse tsyosi, hosi helilaga lyomwami na munwa gwigwe gwa duka, ha li na lisyoma linene hagati ha Vayuda, na lihonga lilia, nelilira, nelikupa tsikwili, na vanyingi va gona mu magunia nomu ligoke.

⁴Na vakana va Esther, navalindi veve va tsia ni va mu volera; no mukali womwami ya verera ligali: na ya hilira Mordekai tsingubo yivike nokutwulidza magunia kuye; navutswa si ya tsi vugula mba.

⁵Kunangwa Esther ya langa Hathaka, mulala ku valindi vomwami, wa tovolwa kumulinda, na a mu laga a tsie ku Mordekai, kumanya inkuva yiyi i veye ki, kandi kigira ki.

⁶Ma Hathaka ya twula na a tsia ku Mordekai mu mugidzi munene gwelidala, gwa li imbiri wekiribwa kyo mwami.

⁷Na Mordekai ya mu volera makuva gosi aga kolwa kuye, na livalidza lyosi lyefetha lya Haman ya laga kuvika mu butugi bwomwami, a duke kwononya Avayuda.

⁸Kandi ya mu ha mang'oda gomunwa ga twula mu Shushan kuvononya, a duke kumannya Esther, nokumuha amakuva gago, nokumulaga a tsie kwingira ku mwami, kumusaala nokumugoonya kigira avandu veve.

⁹Kunangwa Hathaka ya tsia na a volera Esther makuva ga Mordekai.

¹⁰Ma Esther ya volera Hathaka, na a mu ha makuva kuhila ku Mordekai, na a vola:

¹¹Avatume kiri vosi vomwami, navandu vetsi provinse tsyomwami, va manya, ku vosi mundu, na a va musatsa kinga mukali, ni yingira ku mwami kuduka mu mugidzi'gwomugati, na a ta langwa, ha veye nelilaga lilala vutswa, li veye ndi, yiitwe, na a ta li uyu womwami a sona nempimbo yetha habu, a duke kuva mwoyo: navutswa inze si nangeywi kwingira ku mwami madiku aga li makumi gavaka.

¹²Navo va volera Mordekai makuva ga Esther.

¹³Kunangwa Mordekai ya va volera va hile litivula ku Esther, U tevolera mwene u la hona mu inyumba yomwami, kuvita Avayuda avandi.

¹⁴Kigira nu u va nu u kiring'ana ligali ku inyinga yiyi, hene yaho Avayuda va la nyola ubwiyangu no ubukonyi bu twula ahandi, navutswa ive navenyumba ya vadada vovo mu la diva: kandi ibwaha u manya ive u vuli kuduka ku bwami kigira inyinga kuli yiyi?

¹⁵Kunangwa Esther ya va volera, va tivulire Mordekai,

¹⁶Tsia, u vungidze Avayuda vosi ava veye ha Shushan, mu honge lilia kigira inze, mu vule kulia kinga kunwa kuduka madiku gavaka, ubudiku kinga mbasu: na inze navatugwa vange ku la honga lilia ndiyo; na ndiyo ndingira ku mwami, i veye inkuva i ta li kuli malago: ni mba ni ndiva, ndive.

¹⁷Kunangwa Mordekai ya tsia, na a kola kuli Esther ya mu laga.