Read lulogooli Kutwula 11 Bible Online

Kutwula 11 - lulogooli bible

Kutwula 11

¹Na Yahova ya volera Musa Li veye ho liduya lilala lya ndeta ku Farao, noku Egepeti; lwenyima a la lakula mwinye, mu tsie: lwa a la mu lakula, a la mu kunga mu twulire ligali.

²Kalunu u volere avandu, navo va teve sa mulala mutende wewe, na avakali sa mulala mutende wewe, viju vyefetha, na viju vyethahabu.

³Na Yahova ya ha avandu yavo liverererwa imbiri wa Vaegepeti. Kuvita yaga mundu uvu Musa ya li munene ligali mu kivala kya Egepeti, imbiri wa vatumekiri va Farao, na imbiri wa vandu vosi.

⁴Na Musa ya vola, Yahova a vola ndi, Ubudiku hagati nda twula kutsia hagati ha Egepeti:

⁵na vosi avatanga kwivulwa mu kivala kya Egepeti va la kudza, kutanga wa tanga kwivulwa wa Farao wikaye ku intebe yobwami, kuduka ku watanga kwivulwa womukana mutugwa u veye inyima wolugina; na vyokutanga kwivulwa vyosi vyemitugu.

⁶Kandi li la va ho lilira linene muno mu kivala kvosi kya Egepeti, kuli lya vula kuva ho tsinyinga tsyosi, kandi si li la va ho lifwanana na yili mba.

⁷Navutswa ku avana va Israeli kali imbwa si i la loka ku mundu kinga ku mutugu: mu duke kumanya kuli Yahova yayukanya hagati ha Avaegepeti na Israeli.

⁸Kandi yava vosi avatumekiri vovo va la sulunguta ku inze, nokusigama imbiri wange nokuvola, Twula halala navandu vosi avalondanga ive: na lwenyima nda twula. Naye ya twula imbiri wa Farao nobutima bunene.

⁹Na Yahova ya volera Musa, Farao a la vula kumuhulira mwinye; vyokugennya vyange vi medeke mu kivala kya Egepeti.

¹⁰Na Musa na Haruni va kola vyokugennya yivi vyosi imbiri wa Farao: na Yahova ya dinyeridza mwoyo gwa Farao, na si ya lakula avana va Israeli va twule mu kivala kikye.