Read lulogooli Kutwula 14 Bible Online

Kutwula 14 - lulogooli bible

Kutwula 14

¹Na Yahova ya volera Musa, na a vola,

²U volere avana va Israeli, virane kulomba hokusosa havo imbiri wa Pi-hahirothu, hagati ha Migidoli nenyanza, imbiri wa Baal-zefon: mu la lomba hokusosa henyu imbiri wa ha zana himbi nenyanza.

³Na Farao a la vola ku avana va Israeli, Va hambeywi mu kivala, ligendinyama li vigaliye.

⁴Na inze nda dinyiridza mwoyo gwa Farao, naye a la va londerera; na nda nyola liidzominywa ku Farao, noku lihe lilye; na Avaegepeti va la manya, inze mbeye Yahova. Na va kola ndiyo.

⁵Na mwami wa Egepeti ya volerwa, avandu viruki: na mwoyo gwa Farao nogwavatumekiri veve gwa girunkanywa ku avandu, ni va vola, Ni kinduki kya kwa kola, ku lileka Israeli va tsie, va vule kukutumekira?

⁶Naye ya lomba ligari lilye lyelihe, na a hila avandu veve halala naye:

⁷na a vugula magari ga tovolwa tsimia tsitano na indala, na magari gosi ga Egepeti, na vanyampara kugo gosi.

⁸Na Yahova ya dinyiridza mwoyo gwa Farao mwami wa Egepeti, naye ya londerera avana va Israeli: kigira avana va Israeli va twula nomukono gwetsingulu.

⁹Na Avaegepeti va va londerera, tsiparasi tsyosi, na magari gelihe ga Farao, na avanina ku tsiparasi, na lihe lilye, navo va va nyolera mu lisosa lyavo himbi nenyanza, himbi na Pi-hahirothu, imbiri wa Baal-zefon.

¹⁰Kunangwa lwa Farao yisunda himbi, avana va Israeli va ginga tsimoni tsyavo, na henza, Avaegepeti va va londerera; navo va tia ligali: na avana va Israeli vanira Yahova.

¹¹Na va volera Musa, U ku twulidzi mu kivala ku kudzire migendinyama, kigira vilindwa si vi veye mu Egepeti? Kigira ki u ku i koleye yaga, kukutwulidza mu Egepeti?

¹²Yili si li veye likuva lya kwa ku volera mu Egepeti, ni ku vola, U ku leke, ku tumekire Avaegepeti? Kigira nu bulahi kutumekira Avaegepeti, kuvita likudzira mwigendinvama.

¹³Na Musa ya volera avandu, Mu ta tia mba, mu singire, na mu lole ubuhonyi bwa Yahova, bwa a li kolera mwinye lero: kigira Avaegepeti va mu lolanga lero, si mu la va lola kandi mihiga nemihiga.

¹⁴Yahova a la mu lwanira, na mwinye mu la kiring'ana.

¹⁵Na Yahova ya volera Musa, Kigira ki waniranga inze? U volere avana va Israeli, va tsie imbiri.

¹⁶Na ive u ginge impimbo yoyo, nokunyira mukono gugwo ku inyanza, u gyavukanye: na avana va Israeli va lingira hagati henyanza ku lirova liumu.

¹⁷Na inze nda dinyiridza myoyo gya Avaegepeti, navo va lingira inyima wavo, na inze nda nyola lidzominywa ku Farao, noku lihe lyosi, noku magari gelihe gege, noku avetsiparasi veve.

¹⁸Na Avaegepeti va la manya Mbeye Yahova, lwa mmali kunyola lidzominywa ku Farao, noku magari gelihe gege, noku avetsiparasi veve.

¹⁹Kandi ingelosi wa Nyasaye ya vimirira imbiri welihe lya Israeli, ya twula yo ni yirana inyima wavo; na munara gwelilesi gwa twula imbiri wavo, nokusingira inyima wavo;

²⁰nagwo gwa li hagati helihe lya Egepeti na lihe lya Israeli; na lya li ho lilesi na kisundi, navutswa lya kola ubulavu mu budiku: na lilala si lyesunda himbi na lindi mba ubudiku bwosi.

²¹Na Musa ya nyira mukono gwigwe ku inyanza; na Yahova ya kola inyanza kwirana inyima nembuudza yetsingulu itwula ivugwe ubudiku bwosi, na ya kola inyanza kuva kivala kiumu, na amadzi gavukanywa.

²²Na avana va Israeli vingira mu inyanza ku kivala kiumu: na amadzi ga li madigi kuvo ku mukono mulungi, noku mukono mmosi.

²³Na Avaegepeti va va londerera, ni vingira mu inyanza inyima wavo hagati henyanza, tsiparasi tsyosi tsya Farao, amagari gege, na avetsiparasi veve.

²⁴Kunangwa mu lilinda lya mugamba, Yahova, mmunara gwomuliru na lilesi, ya henza na a lolera lihe lya Avaegepeti, na a dambidza lihe lya Avaegepeti.

²⁵Na ya twulidza tsingida tsyamagari gavo, ni ga gendidzwa nobudinyu; kuduka Avaegepeti va vola, Kwiruke kutwula imbiri wa Israeli; kigira Yanova a va lwanira ku Avaegepeti.

²⁶Kandi Yahova ya volera Musa, Nyira mukono gugwo ku inyanza, amadzi girane ku Avaegepeti, ku magari gavo gelihe, noku avetsiparasi vavo.

²⁷Na Musa ya nyira nukono gwigwe ku inyanza, na lwa bwa kya inyanza yirana ku tsingulu tsyayo tsya kazozo; na Avaegepeti va giruka; na Yahova ya vungulula Avaegepeti mu inyanza.

²⁸Na amadzi girana, na ga kunika magari gelihe, na avetsiparasi, kali lihe lyosi lya Farao lya va londerera mu inyanza; si ya tigala kali mulala kuvo.

²⁹Navutswa avana va Israeli va genda ku lirova liumu mu inyanza; na amadzi ga li madigi kuvo, ku mukono mulungi, noku mukono mmosi.

³⁰Na ndiyo Yahova ya honya Israeli ku lidiku yilyo ku mukono gwa Avaegepeti; na Israeli va lola Avaegepeti avakudzu ku luginga lwenyanza.

³¹Na Israeli va lola miyinzi minene gya Yahova ya kola ku Avaegepeti, na avandu va tia Yahova: na va suuvira Yahova, na mutumekiri wewe Musa.