Read lulogooli Kutwula 25 Bible Online

Kutwula 25 - lulogooli bible

Kutwula 25

¹Na Yahova ya volera Musa, na a vola,

²Volera avana va Israeli, va vugulire inze kihaanwa: ku vosi uyu womwoyo gwigwe gu mu kola kubugirira, mu la vugula kuye kihaanwa kyange.

³Na yivi ni vindu vya mu li vugula kuvo: ithahabu, na ifetha, na mugasa,

⁴na iblue, na kiforosadi, na inzakanyu, na ikatani indahi, na ubwoya bwetsimbuli,

⁵na tsingubo tsya magondi makole tsyabuulwa irangi inzakanyu, na tsingubo tsyelitsivi, na misala gye kikuma,

⁶na maguta getaya, na vyafunya mwayu vya maguta gokuvaka, na vyekimuli kyafunya mwayu,

⁷na iberulo, na magina gokuvikwa ku kisibao, noku isalamba yomukiritu yomusalisi.

⁸Navo va nombere hatakatifu, nduke kumenya hagati havo.

⁹Kuli vyosi vya nda ku mannya, kuli lifwana lya lihema, na lifwana lya viju vyalyo vyosi u la lilomba ndiyo.

¹⁰Na va la lomba lisanduku lyetsimbao vyomusala gwe kikuma, ubutambi bwalyo bu la va ligera lya makono gaviri nenusu, nobugalamu bwalyo bu la va ligera lyomukono mulala nenusu, na bwegingu bwalyo bu la va ligera lyomukono mulala ne nusu.

¹¹Na u la handidza kulyo lyosi ithahabu indahi u la handidza musi na igulu, na u la vika ku itaji yethahabu kulikumberidza tsimbega tsyosi.

¹²U la lomba kulyo tsimingiri tsine tsyethahabu, kutsivika ku tsikorna tsyalyo tsine; mbalu mwalyo, tsimingiri tsiviri ku luvega lulala, na tsiviri ku luvega lundi.

¹³Na u la lomba misala mitambi gye kikuma, nokuhandidza ku ithahabu.

¹⁴Na u la vika misala zana mu tsimingiri tsi veye mbalu mwelisanduku, kuliginga.

¹⁵Misala gyi la menya mu tsimingiri tsyelisanduku: gyi la vula kutwulidzwa.

¹⁶Na u la vika mu lisanduku zana lilolekidza lya ndi ku ha.

¹⁷Kandi u la lomba intebe yetsimbabasi yethahabu indahi: ubutambi bwayo bu la va ligera lya makono gaviri nenusu, nobugalamu bu la va ligera lyomukono mulala nenusu.

¹⁸Kandi u la lomba vakerubi vaviri vethahabu; u la va lomba nemiyinzi gyokutuula, mulala ku kiheri yiki kyentebe yetsimbabasi na wundi ku kiheri yiki.

¹⁹Na u la vika mukerubi mulala ku kiheri kilala, na mukerubi wundi ku kiheri kindi u la va lomba ku kindu kilala nentebe yetsimbabasi.

²⁰Na vakerubi va la nyira tsimbaha igulu, va kinga intebe yetsimbabasi netsimbaha tsyavo, na mumoni mwavo mu la henzana uyu na uyu; mumoni mwavo mu henzane nentebe yetsimbabasi.

²¹U vike intebe yetsimbabasi ku lisanduku; na u vike lilolekidza lya ndi ku ha mugati mwelisanduku.

²²Na inze nda vugana nive ha zana, kandi nda volerana nive ha zana, ni mbeye igulu wentebe yetsimbabasi, hagati ha vakerubi vaviri va veye ku lisanduku lyelilolekidza, ku vindu vyosi vya ndi ku lagira ku avana va Israeli.

²³Kandi u la lomba imeza yetsimbao tsye kikuma: ubutambi bwayo bu la va ligera lyamakono gaviri, nobugalamu bwayo bu la va ligera lyomukono mulala, nobudiguluku bu la va ligera lyomukono mulala na inusu.

²⁴Na u la handidza ku ithahabu indahi, na u la lomba itaji yethahabu kugikumbiridza tsimbega tsyosi.

²⁵Na u la lomba lukigiti lwayo kugikumbiridza tsimbega tsyosi, ubugalamu bwalwo bu la va ligera lyevidete vine; na u la gi lombera itaji yethahabu tsimbega tsyosi.

²⁶Kandi u la gi lombera tsimingiri tsine tsyethahabu, nokutsivika mu tsikorna tsine tsi ve ku virenge vyayo vine.

²⁷Tsimingiri zana tsi ve himbi nolukigiti, tsi la va ho kuvikira misala gyokuginga imeza.

²⁸Na u la lomba misala zana ku musala gwe kikuma, nokuhandidza ku ithahabu, imeza i gingirwe kugyo.

²⁹Na u la lomba tsisahani tsyayo, nevijiko vyayo, na vikombe vyayo, na tsindavo tsyayo vyokutsukira: u lombe vyosi vyethahabu indahi.

³⁰Na u la vika ku imeza zana ubukima bwokumannyira imbiri wange kazozo.

³¹Kandi u la lomba kinara kyetaya kyethahabu indahi: kinara kyetaya ki lombwe nemiyinzi gyokutuula, bwikaliru bwakyo, nomusala gwakyo; na tsitaya tsyakyo, na vikombe vyakyo, na vimuli vyakyo, vyosi vi la va vyekindu kilala:

³²nakyo ki la va netsisya tsitano na lulala tsi la twula mu mbalu mwakyo; tsisya tsivaka tsyekinara kyetaya ku luvega lwakyo lulala, na tsisya tsivaka tsyekinara kyetaya ku luvega lwakyo lundi:

³³vikombe vibaka vya lombwa kuli vimuli vyomutsulyu mu lusya lulala, bwevumbu na kimuli: vikombe vibaka vya lombwa kuli vimuli vyomutsulyu mu tsisya tsindi, bwevumbu na kimuli: na ndiyo tsisya tsitano na lulala tsya twula ku kinara kyetaya:

³⁴kandi mu kinara kyetaya vikombe vine vya lombwa kuli vimuli vyomutsyulyu bwevumbu bwavyo na vimuli vyavyo,

³⁵na bwevumbu bu la va isi wetsisya tsiviri bwekindu kilala, kandi bwevumbu bu la va isi wetsisya tsiviri bwekindu kilala, na bwevumbu bu la va isi wetsisya tsiviri bwekindu kilala, ku tsisya tsitano na lulala tsyosi tsi la twula ku kinara kyetaya.

³⁶Bwevumbu bwakyo na tsisya tsyakyo tsi la va tsyekindu kilala; kinara kyosi ki ve kyemiyinzi gyokutuula kyethahabu indahi.

³⁷Na u lombe tsitaya tsyakyo tsi veye tsitano na tsiviri: na va laakidza tsitaya tsyakyo tsyaake tsimbega tsyakyo tsyosi.

³⁸Na visiminyiru vyakyo, na tsisahani tsyevisiminyiru vi la va vyethahabu indahi.

³⁹Ki la lombwa kuduka italenta indala yethahabu halala na viju yivi vyosi.

⁴⁰Na u la henza bulahi u duke kuvilomba kuli lifwana lyavyo lya wa mannyirwa mu kigulu.