Read lulogooli Kutwula 26 Bible Online

Kutwula 26 - lulogooli bible

Kutwula 26

¹Kandi u la lomba lihema li ve netsingubo tsyokukinga likumiu tsi lombe ku ingubo yekatani indahi, na yeligondo lya iblue, na kiforosadi, na inzakanyu, halala na vakerubi vemiyinzi gyomusidza ligali.

²Butambi bwetsingubo sa indala bu la va ligera lyamakono makumi gaviri na gatano na gavaka, na bugalamu bwetsingubo sa indala bu la va ligera lyamakono gane: tsingubo tsyosi tsi la va tsyekigero kilala.

³Tsingubo tsitano tsi la hambannywa halala; na tsindi tsingubo tsitano tsi la hambannywa halala.

⁴Na u la lomba vyulu vya iblue ku luvega lwekiheri kyengubo indala ku lukigiti lwelisitwa lyayo; kandi u la lomba kuli ndiyo ku luvega lwekiheri kyengubo impereridzi ya kaviri.

⁵U la lomba vyulu makumi gatano ku ingubo indala, na vyulu makumi gatano ku luvega lwekiheri kyengubo yindi ya kaviri ya hambannywa; vyulu zana vi la henzana.

⁶Kandi u la lomba vibohero makumi gatano vyethahabu, nokuhambannya tsingubo halala nevibohero: na lihema li la va lilala.

⁷Kandi u la lomba tsingubo tsyo ubwoya bwetsimbuli tsi ve lihema igulu welihema lya ikatani: u la lomba tsingubo likumi na indala:

⁸ubutambi bwetsingubo sendala bu la va ligera lya makono makumi gavaka nobugalamu bwetsingubo sendala bu la va ligera lya makono gane: na tsingubo likumi na indala tsi la va tsyekigero kilala.

⁹Na u la hambannya tsingubo tsitano tsyene tsyeng'ine, na tsingubo tsitano na indala tsyene tsyeng'ine, na ingubo yetsitano na indala u la gi hinula imbiri welihema.

¹⁰Na u la lomba vyulu makumi gatano ku luvega lwekiheri kyengubo impereridzi, na vyulu makumi gatano ku kiheri kyengubo impereridzi yelihambannya lya kaviri.

¹¹Na u la lomba vibohero amakumi gatano vyomugasa, nokuvika vibohero zana mu vyulu, nokuhambannya lihema li ve lilala.

¹²Na kidonye ki tigaye kyeleranga kyetsingubo kyelihema, kidonye ki tigaye, ki lerera ku luvega lwenyima welihema.

¹³Na ligera lyomukono mulala ku luvega lulala, na ligera lyomukono mulala ku lundi tsyobutambi bwetsingubo tsyelihema, tsi lerera mu mbalu mwelihema ku luvega yilu kandi ku luvega yilwo, tsi duke kulikinga.

¹⁴Kandi u la lomba kikuniko kyelihema kyetsingubo tsyamagondi makole tsyabuulwa irangi inzakanyu, na igulu walyo kikuniko kyetsingubo tsyelitsivi.

¹⁵Kandi u la lomba tsimbao tsyelihema tsyomusala gwe kikuma tsi singiranga.

¹⁶Butambi bwolubao bu la va ligera lyamakono likumi, na bugalamu bu la va ligera lyomukono ne kidonye.

¹⁷Lubao sa lulala lu la va nobwongiru buviri, bwokuhambannyirwa halala; u la lomba tsimbao tsyosi tsyelihema kuli ndiyo.

¹⁸U la lomba tsimbao tsyelihema, makumi gaviri ku luvega lwa kusini kuhenza kusini.

¹⁹Na u la lomba viduku makumi gane vyefetha isi wetsimbao makumi gaviri; viduku viviri isi wolubao lulala vyobwongiru bwalwo buviri, kandi viduku viriri isi wolubao lundi vyobwongiru bwalyo buviri:

²⁰noku luvega lwakaviri lwelihema ku luvega lwa kasikasini tsimbao makumi gaviri,

²¹na viduku vyatsyo vyefetha makumi gane; viduku viviri isi wolubao lulala, na viduku viviri isi wolubao lundi.

²²Na ku luvega lwenyima lwelihema lwemadioli u la lomba tsimbao tsitano na lulala.

²³Na tsimbao tsiviri u la lombera tsikorna tsyelihema tsyenyima.

²⁴Kandi tsi la bofwa halala isi, na tsi la bofwa halala igulu ku isonga ku imingiri indala: tsyombi tsiviri tsi la va ndiyo; tsi la va tsyetsikorna tsiviri.

²⁵Na tsimbao tsi la va tsitano na tsivaka, na viduku vyatsyo vyefetha, vi ve likumi na vitano na lulala; viduku viviri isi wolubao lulala, na viduku viviri isi wolubao lundi.

²⁶Kandi u la lomba tsimbohero tsyomusala gwe kikuma; tsimbohero tsitano tsyetsimbao ku luvega lulala lwelihema,

²⁷na u la lombera tsimbao tsyoluvega lundi lwelihema tsimbohero tsitano, na tsimbohero tsitano tsyetsimbao tsyoluvega lwenyima lwelihema kuhenza madioli.

²⁸Na lubohero lwa hagati lu veye hagati hetsimbao lu la duka ku kiheri yiki na kiheri yiki.

²⁹Na u la handidza ithahabu ku tsimbao, na tsimingiri tsyokuvika mu tsimbohero u la lomba nethahabu: na u la handidza ku tsimbohero ithahabu.

³⁰Na u la singeridza lihema kuli lifwana lyalyo lya wa mannywa mu kigulu.

³¹Na u la lomba ingubo yokukinga yeblue, na kiforosadi, na inzakanyu, na ikatani indahi; halala na vakerubi miyinzi gyomusidza ligali u la gi lomba:

³²na u la gi sunga ku tsitiru tsine tsya musala gwe kikuma tsya handidzwa ku nethahabu; vibohero vyayo vine vi la va vyethahabu, mu viduku vine vyefetha.

³³Na u la sunga ingubo yokukinga zana isi wevibohero, na u la leta lisanduku lyelilolekidza nokulivika mu inyima wengubo yokukinga: na ingubo yokukinga i la va kyokwavukanya hagati hobutakatifu na ha butakatifu hobutakatifu.

³⁴Kandi u la vika intebe yetsimbabasi ku lisanduku yelilolekidza mu hatakatifu hobutakatifu.

³⁵Na u la vika imeza imbiri wengubo yokukinga ku luvega lwekyova, na kinara kyetaya kuhenzana nemeza ku luvega lwelihema kukagata kusini: na u la vika imeza ku luvega lwekasikasini.

³⁶Na u la lomba ingubo yomuliango gwa Lihema, ya iblue, na kiforosadi, na inzakanyu, na ikatani indahi, miyinzi gyomunavi musidza.

³⁷Na u la lombera ingubo yomuliango, tsitiru tsitano tsyomusala gwe kikuma, nokuhandidza kutsyo ithahabu; na visunga vyatsyo vi la va vyethahabu: na u la tsi lombera viduku vyomugasa vitano.