Read lulogooli Kutwula 3 Bible Online

Kutwula 3 - lulogooli bible

Kutwula 3

¹Kunangwa Musa yayanga kyayo kya Jethro navizala wewe, musalisi wa Midiani: naye yimirira kyayo kutsia ku luvega lwenyima mwigendinyama, na a duka ku kigulu kya Nyasaye, ha Horebu.

²Na ingelosi wa Yahova ya loleka kuye mu lumemo lwomuliru, lwa li hagati ha kasala: naye ya lola, na henza, kasala kaaduka muliru, na kasala ka vula kuhya.

³Na Musa ya vola, ndeveta kalunu kulola lilola linene yili, kigira ki kasala ka vula kuhya.

⁴Na Yahova lwa ya lola yevetanga a lole, Nyasaye ya mu langa, na mwoyo gwa twula hagati ha kasala, na a vola, Musa, Musa. Naye ya bugira, Mbeye hano.

⁵Naye ya vola, U tesunda hano mba: navula vilatu vivyo mu virenge vivyo, kigira ha u singiranga ha veye hatakatifu.

⁶Kandi ya vola, Inze mbeye Nyasaye wa dada wowo, Nyasaye wa Abrahamu, Nyasaye wa Isaka, na Nyasaye wa Yakobo. Na Musa ya visa mmoni mwimwe; kigira ya tia kuhenza Nyasaye.

⁷Na Yahova ya vola, Ligali ndoli ubusaliri bwa avandu vange, ava veye mu Egepeti, na mbuliye lilira lyavo kigira ava va singiriranga; kigira mmanya buvereri bwavo;

⁸na inze nziiki mba honnye ku makono ga Vaegepeti, nokuvatwulidza mu kivala yikyo, va tsie mu kivala kilahi na kinene, kivala ki gangalukanga amaveere na bwuki; ha veye ha Avakanani, na Avahiti, na Avaamori, na Avaperizi, na Avahivi, na Avajebusi.

⁹Na kalunu, henza, lilira lya avana va Israeli li ndukiye ha mbeye: kandi ndoli ubusaliri kuli Avaegepeti va va saliridzanga.

¹⁰Kalunu, hamba na nda ku tuma u tsie ku Farao, u duke kutwulidza avandu vange avana va Israeli, va twule mu Egepeti.

¹¹Na Musa ya volera Nyasaye, Inze mbeye ibwaha, ntsie ku Farao, na ntwulidze avana va Israeli mu Egepeti?

¹²Naye ya vola, Ligali nda va halala na ive; na yili li la va lilolekidza ku ive, nku tumi: lwa u li mala kutwulidza avandu mu Egepeti mu la tumekira Nyasaye mu kigulu yiki.

¹³Na Musa ya volera Nyasaye, Henza, lwa nduka ku avana va Israeli, nokuvavolera, Nyasaye wa vaguga venyu u ntumi ku mwinye; navo va nteva, Lieta lilye ni bwaha? Nda va volera ki?

¹⁴Na Nyasaye ya volera Musa, INZE MBEYE U VEYE HO: na ya vola, U la volera avana va Israeli inkuva yiyi, INZE MBEYE HO u ntumi ku mwinye.

¹⁵Kandi Nyasaye ya volera Musa, U la volera avana va Israeli inkuva yiyi, Yahova, Nyasaye wa avaguga venyu, Nyasaye wa Abrahamu, Nyasaye wa Isaka, na Nyasaye wa Yakobo, u ntumi ku mwinye: yili ni lieta lyange mihiga nemihiga, kandi ni lyokunzidzulitsira kuduka makula gosi.

¹⁶U tsie, u vugannye halala avakulundu va Israeli, u va volere, Yahova, Nyasaye wa vaguga venyu, Nyasaye wa Abrahamu, wa Isaka, na wa Yakobo, u loleki ku inze, nokumbolera, Ligali, ntsitsi ku mwinye, ndoli aga mu kolangwa mu Egepeti:

¹⁷Kandi mmali kuvola, Nda mu leta mwanegire kutwula mu busaliri bwa Egepeti, nokumuvika mu kivala kya Avakanani, na Avahiti, na Avaamori, na Avaperizi, na Avahivi, na Avajebusi, mu kivala ki gangalukanga amaveere na bwuki.

¹⁸Na va la hulira mwvoyo gugwo, na u la tsia, ive navakulundu va Israeli, mu la tsia ku mwami wa Egepeti, na mu la mu volera Yahova, Nyasaye wa Vahebraina, u vugani na kwinye: mwadza, u ku he munwa ku tsie lugendo lwa madiku gavaka mwigendinyama kulombera Yahova, Nyasaye wetu isadaka.

¹⁹Kandi mmanya mwami wa Egepeti si a la mu ha munwa kutsia, auwa, kuduka ku mukono gwetsingulu.

²⁰Kandi inze nda nyira mukono gwange, nokuduya Egepeti na vyokugennya vyange vyosi vya ndi kola hagati hakyo: na inyima wa yaga a la mu ha munwa kutsia.

²¹Na nda ha avandu yava tsimbabasi imbiri wa Avaegepeti: kunangwa, lwa mu tsia, si mu la tsia butswa:

²²navutswa mukali sa mulala a la saala mutende wewe, noku uyu u menyanga mu inyumba yeye, viju vyefetha, na viju vyethahabu, na tsingubo; na mu la vi vika ku avana venyu avayai na avakana: na mu la lanya Avaegepeti.