Read lulogooli Kutwula 35 Bible Online

Kutwula 35 - lulogooli bible

Kutwula 35

¹Na Musa ya vungidza livugana lyosi lya avana va Israeli, na a va volera, Yaga na makuva ga Yahova a mu lagiye, mu ga kole.

²Madiku gatano na lilala miyinzi gyi la kolwa; navutswa ku lidiku lya gatano na gaviri li la va litakatifu ku mwinye, li veye lisabato lyokuhonga ku Yahova: ku vosi uyu u kola miyinzi kali mulala kulyo a liitwa.

³Mu la vula kufwana muliru mu tsinyumba tsyenyu tsyosi ku lidiku lyelisabato.

⁴Na Musa ya volera livugana lyosi lya avana va Israeli, na a vola, Yiki ni kindu kya Yahova ya laga nokuvola,

⁵Mu vugule hagati henyu kihaanwa kuhaana ku Yahova; ku vosi u veye nomwoyo gwokuyanza, a lete kihaanwa ku Yahova: ithahabu, na ifetha, na mugasa,

⁶na tsingubo tsyeblue, na kiforosadi, na inzakanyu, na ikatani indahi, na ubwoya bwetsimbuli,

⁷na tsingubo tsya magondi makole tsyabuulwa tsinzakanyu, na tsingubo tsyelitsivi, na musala gwe kikuma,

⁸na maguta getsitaya, na vifunyanga mwayu vyamaguta gokuvaka, na vye kimuli kilahi,

⁹na magina geberulo, na magina gokuhandidza, ku kisibao, noku isalamba yomukiritu.

¹⁰Kandi ku vosi u veye nomwoyo gwobugeeri hagati henyu yadze, kulomba yivi vyosi vya Yahova u lagi:

¹¹hatakatifu, na lihema lyaho, ingubo yokukinga yaho, na vibohero vyaho, na tsimbao tsyaho, na misala gyaho, na tsitiru tsyaho, na viduku vyaho;

¹²lisanduku, na misala gyalyo gyokuginga, na intebe yetsimbabasi, na ingubo yukukinga inzasasu;

¹³imeza, na misala gyayo gyokuginga, na viju vyayo vyosi, na ubukima bwokumannyira;

¹⁴kinara kyetaya kyo bulavu, na viju vyakyo, na tsitaya tsyakyo, na maguta gobulavu;

¹⁵na ubwali bwokuvuyidza kimuli, na l misala gyabwo gyokubuginga, na maguta gokuvaka, na kimuli kilahi, na ingubo yokusunga ha kiliango, ha kiliango kya hatakatifu;

¹⁶ubwali bwekihaanwa kyokusambwa, na kikereko kyabwo kyomugasa, na misala gyabwo gyokubuginga, na viju vyabwo vyosi, na lwero na bwikaliru bwalwo;

¹⁷na tsingubo tsyolugaga lwomugidzi, na tsitiru tsyagwo, na viduku vyatsyo, na ingubo yokusunga mu kiribwa kyomugidzi;

¹⁸na vivambo vya hatakatifu, na vivambo vya mugidzi, na migoye gyavyo;

¹⁹Na tsingubo tsindahi tsyokutumekira mu hatakatifu, tsingubo tsintakatifu tsya Haruni musalisi, na tsingubo tsya avana veve, tsyokutumekira mu miyinzi gyomusalisi.

²⁰Na livugana lyosi lya avana va Israeli lya twula imbiri wa Musa.

²¹Navo vadza vosi sa mulala womwoyo gwigwe gwa mu vukidza, na vosi sa mulala womwoyo gwigwe gwa lalira, navo va leta kihaanwa kya Y ahova, kyemiyinzi gyelihema lyelivugana, na kyobutumiki bwalyo bwosi, na kyetsingubo tsintakatifu.

²²Navo vadza, avasatsa na avakali, vosi ava veye nomwoyo gwobulaliri, na va leta visambo, na tsinono, na tsimingiri, na vinyigi, viju vyosi vyethahabu; sa mulala va leta vindu vyethahabu kihaanwa ku Yahova.

²³Kandi avandu sa mulala wo luvusi lweblue, iu nyoleka kuye, na lwekiforosadi, na lwenzakanyu, na ingubo yekatani indahi, na uhwoya bwetsimbuli, na tsingubo tsyamagondi makole tsyabuulwa irangi inzakanyu, na tsingubo tsyelitsivi, yivi va vi leta.

²⁴Vosi sa mulala wa leta kihaanwa kyefetha na mugasa ya leta kihaanwa kya Yahova; na sa mulala wa li nomusala gwe kikuma ku miyinzi gyosi gyobutumiki, ya gu leta.

²⁵Na avakali vosi ava li nomwoyo gwobugeeri, va sita tsingubo na makono gavo, na va leta tsya va sita, tsyeblue, na tsyekiforosadi, na tsyenzakanyu, na tsyekatani indahi.

²⁶Na avakali vosi avemyoyo gyavo gya va vukidza mu bugeeri, va sita ubwoya bwetsimbuli.

²⁷Kandi avanene va leta magina geberulo, na magina gokuhandidza ku kisibao, noku isalamba yomukiritu;

²⁸na vyokufunya mwayu, na maguta; getaya, na ga maguta gokuvaka, na vyekimuli kilahi.

²⁹Avana va Israeli va leta kihaanwa ku Yahova; kyomwoyo gwobulaliri, avasatsa na avakali sa mulala avemyoyo gyavo gya lalira kuletera ku miyinzi, gya Yahova ya laga gyi kolwe nomukono gwa Musa.

³⁰Na Musa ya volera avana va Israeli, Henza, Yahova u langiye ku lieta lilye, Bezaleli, mwana wa Uri, mwana wa Huru, wehiri ya Yuda;

³¹na ya mwizulitsa Roho wa Nyasaye, mu busidza, nomu bugeeri, nomu limanya mu miyinzi gyetsing'ano tsyosi tsyobusidza;

³²kandi kulungikidza miyinzi gyobusidza, nokulomba miyinzi gyethahabu, na gyefetha, na gyomugasa,

³³nomu livadza magina gokuhandidza, nomu livadza misala, nomu miyinzi gyetsing'anotsyositsyobusidza.

³⁴Kandi u viki mu mwoyo gwigwe a duke kwegidza, uyu na Oholiabu, mwana wa Ahisamaku, wehiri ya Dan.

³⁵U vizulitsi ubugeeri bwomwoyo kukola miyinzi tsing'ano tsyosi, gyowokuvadza magina, na gyowobusidza, na gyomusidza, na gyowokuvika ubusalago mu iblue, nomu kiforosadi, nomu inzakanyu, nomu ikatani indahi, na gyowokusita ingubo, kuli gwa yava ava kolanga miyinzi gyosi, nogwa yava ava lungikidzanga miyinzi gyobusidza.