Read lulogooli Kutwula 36 Bible Online

Kutwula 36 - lulogooli bible

Kutwula 36

¹Na Bezaleli na Oholiabu va kyinzira, na avobugeeri vosi ava Yahova u viki ubugeeri na limanya lyokuyinzira miyinzi gyosi gyobutumiki bwa hatakatifu, kuli yaga gosi ga Yahova a lagi.

²Kunangwa Musa ya langa Bezaleli na Oholiabu na vosi avomwoyo gwobugeeri, ava li va Yahova ya vika mu myoyo gyavo ubugeeri, kali vosi avomwoyo gwavo gu mu vukidza va tsie kukola miyinzi zana;

³navo va vugula mmakono ga Musa vyahaanwa kyosi, kya avana va Israeli va leta ku miyinzi gyobutumiki bwa hatakatifu, va ha lombe navyo. Kandi migamba gyosi va mu letera vihaanwa nomwoyo gwobulaliri.

⁴Na vosi avobugeeri ava kola miyinzi gyosi gya hatakatifu, vadza sa mulala kutwula ku miyinzi gyigye gya va kolanga;

⁵na va volera Musa, nokuvola, Avandu va leta vindu vinyingi ligali kuvita yivyo vi dukanga ubutumiki bwemiyinzi, gya Yahova ya laga ku kole.

⁶Na Musa ya laga, na va landidza mu hokusosa hosi, ni va vola, Musatsa kinga mukali a ta kola miyinzi gyindi gyevihaanwa vya hatakatifu. Kunangwa avandu va gaywa va ta leta vindu.

⁷Kigira vindu vya va li navyo vya duka kukola miyinzi gyosi, kandi vya vita.

⁸Na avandu avemyoyo gyobugeeri vosi muvo ava kolanga miyinzi va lomba lihema, li veye netsingubo tsyokukinga likumi; tsya lombwa nekatani indahi ya sitwa, na iblue, na kiforosadi, na inzakanyu, halala na vakerubi, miyinzi gyomusidza weligaii.

⁹Ubutambi bwengubo yokukinga sa indala, bwa li hgera lyamakono makumi gaviri na gatano na gavaka, nobugalamu bwengubo sa indala bwa li ligera lyamakono gane; tsingubo tsyosi tsya li nekigero kilala.

¹⁰Naye ya hambanya tsingubo tsitano tsyokukinga halala, na tsindi tsitano halala.

¹¹Naye ya lomba vyulu vyeblue kundulu kwengubo indala ku lukigiti lwelihambannya lyayo: kandi ndiyo kundulu kwengubo yindi ku lihambannya lya kaviri.

¹²Ya lomba vyulu makumi gatano ku ingubo indala, na makumi gatano kundulu kwengubo ya lomba mu lihambanya lya kaviri: na vyulu zana vya henzana indala na yindi.

¹³Naye ya lomba vibohero makumi gatano vyethahabu, na a hambanya tsingubo indala ku yindi nevibohero: na ndiyo lihema lya gwa kindu kilala.

¹⁴Kandi ya lombera lihema tsingubo tsyokukunika tsyobwoya bwetsimbuli: tsingubo likumi na indala ya tsi lomba.

¹⁵Butambi bwengubo indala bwa li ligera lya makono makumi gavaka, na ubugalamu bwa li ligera lya makono gane: tsingubo likumi na indala tsya li neligera lilala.

¹⁶Naye ya hambannya tsingubo tsitano halala, na tsingubo tsitano na indala halala.

¹⁷Na ya lomba vyulu makumi gatano kundulu kwengubo impereridzi yelihambanywa lilala, na vyulu makumi gatano kundulu kwengubo yelihambanywa lya kaviri.

¹⁸Na ya lomba vibohero makumi gatano vyomugasa kuhambannya lihema halala, li ve lihema lilala.

¹⁹Kandi ya lomba kikuniko kyelihema yetsingubo tsya magondi makole tsyabuulwa irangi inzakanyu, na kikuniko kyamasero gelitsivi.

²⁰Kandi ya lombera lihema tsimbao tsyomusala gwe kikuma, tsi singiranga.

²¹Lubao lulala lwa li neligera lyamakono likumi, na ubugalamu bwolubao sa lulala ligera lyomukono na inusu.

²²Lubao sa lulala lwa li nobwongiru buviri bu hambannywa halala: na ndiyo ya lomba tsimbao tsyosi tsyelihema.

²³Naye ya lombera lihema tsimbao: tsimbao makumi gaviri ku luvega lwa kusini;

²⁴na ya lomba viduku vyefetha makumi gane isi wetsimbao makumi gaviri; viduku viviri isi wolubao lulala vyobwongiru buviri bwalwo, na viduku viviri isi wolubao lundi vyobwongiru buviri bwalwo.

²⁵Kandi ku luvega lundi lwelihema, ku luvega lwa kasikasini, ya lomba tsimbao makumi gaviri,

²⁶na viduku vyatsyo vyefetha makumi ganeviduku viviri isi wolubao lulala, na viduku viviri isi wolubao lundi.

²⁷Na ku luvega lwomugongo lwelihema imadioli ya lomba tsimbao tsitano na lulala.

²⁸Na ya lomba tsimbao tsiviri tsyetsikoma tsyelihema ku luvega lwomugongo.

²⁹Tsya li tsya hambana isi; na ndiyo tsya hambana halala kuduka mutwe kuduka ku imingiri indala: na ndiyo ya lomba tsyombi mu tsikoma tsyombi.

³⁰Kandi tsya li ho tsimbao tsitano na tsivaka, na viduku vyatsyo vyefetha, viduku likumi na vitano na kilala; viduku viviri isi wolubao sa lulala.

³¹Naye ya lomba tsimbohero tsitano tsyomusala gwe kikuma; tsyetsimbao tsyoluvega lulala lwelihema,

³²na tsimbohero tsitano tsyetsimbao tsyoluvega lundi lwelihema, na tsimbohero tsitano tsyetsimbao tsyelihema tsyoluvega lwomugongo imadioli.

³³Na ya lomba lubohero mba hagati kuvita hagati hetsimbao kutwula luvega yilu kuduka ku luvega yilwo.

³⁴Na ya handidza ku tsimbao zana ithahabu, na ya lomba tsimingiri tsyatsyo tsyethahabu, tsi ve hokuvitidza mu tsimbohero, kandi ya handidza ku tsimbohero ithahabu.

³⁵Kandi ya lomba ingubo yokukinga yeblue, na yekiforosadi, na yenzakanyu, na yekatani indahi ya sitwa: kandi ya vika vakerubi, miyinzi gyomusidza, na ndiyo ya gi lomba.

³⁶Na ya gi lombera tsitiru tsine tsyomusala tsye kikuma, na a handidza ku ithahabu: na visunga vyatsyo vya li vyethahabu; na ya lomba viduku vine vyefetha.

³⁷Naye ya lombera kiliango kya Lihema ingubo yokukinga yeblue, na yekiforosadi, na yenzakanyu, na yekatani indahi ya sitwa, miyinzi gya u lombanga ubusalago;

³⁸na tsitiru tsyayo tsitano halala nevisunga vyatsyo: na ya handidza ku tsisonga tsyatsyo, noku vyulu vyatsyo, ithahabu; na viduku vyatsyo vitano vya li vyomugasa.