Read lulogooli Kutwula 39 Bible Online

Kutwula 39 - lulogooli bible

Kutwula 39

¹Na ku luvusi lweblue, na lwekiorosadi, na lwenzakanyu va lomba tsingubo tsindahi, kutumikwa mu miyinzi mu hatakatifu, na va lomba tsingubo tsintakatifu tsya Haruni; kuli Yahova ya laga Musa.

²Kandi ya lomba kisibao, netsimbusi tsyethahabu, na tsyeblue, na tsyekiforosadi, na tsyenzakanyu, na tsyekatani indahi ya sitwa.

³Navo va duya ithahabu kuduka kuva tsimbale tsinyangu, ni va tsi kalaga nokulomba tsimbusi, va duke kutsisita halala netsimbusi tsyeblue, na tsyekiforosadi, na tsyenzakanyu, na tsyekatani indahi, miyinzi gyomusidza weligali.

⁴Na va lomba vidonye vyoku mavega vi hambanywa halala; mikanda gyavyo gyiviri gya hambanywa halala.

⁵Na lukanda lwokusitwa nobusidza, lwa li kukyo kukiboha, lwa li kindu kilala nakyo, na miyinzi gwa leng'ana nakyo; lwethahabu, lweblue, na lwekiforosadi, na lwenzakanyu, na lwekatani indahi ya sitwa; kuli Yahova ya laga Musa.

⁶Navo va lomba magina geberulo, ga vikwa mu viduku vyethahabu, ga vadzwa kuli livadza lyomuhuri, na ameta ga avana va Israeli.

⁷Na ya ga vika ku mikanda gyoku mavega gyekisibao, kuva magina gokwidzulitsira avana va Israeli; kuli Yahova ya laga Musa.

⁸Na ya lomba isalamba yomukiritu nemiyinzi gyomusidza ligali, kuli miyinzi gyekisibao; yetsimbusi tsyethahabu, na tsyeblue, na tsyekiforosadi, na tsyenzakanyu, na tsyekatani indahi yasitwa.

⁹Ligera lyayo lya leng'ana tsimbega tsyosi; va lomba isalamba yomukiritu yokulingwa mu kaviri; ubutambi bwayo bwa li ligera lyokutwula ku kidete kinene kuduka ku kyenyasi, na bugalamu bwayo bwa li ndiyo, na ya li yokulingwa mu kaviri.

¹⁰Na va handidza muyo tsimbaso tsine tsyamagina. Luvaso lwokutanga lwa li ligina lyakanyu, na itopazi, na lisembe, yaga ga li mu luvaso lwokutanga;

¹¹na uluvaso lwa kaviri, lwa li zumaradi, na isafiro, na limasi;

¹²na luvaso lwa kavaka, lwa li kuakinso, na lisalago, na amasusito,

¹³na luvaso lwa kane iberulo, na ijazaa, na ijasipi: Ga handidzwa mu ithahabu mu viduku vyago.

¹⁴Na magina ga li kuli ameta ga avana va Israeli, likumi na gaviri, kuli ameta gavo; kuli livadzwa lyomuhuri sa mulala kuli lieta lilye, getsihiri likumi na tsiviri.

¹⁵Na va lomba ku isalamba yomukiritu, minyoro kuli lisitwa lyomugoye gwethahabu indahi.

¹⁶Na va lomba vyulu viviri vyethahabu, na tsimingiri tsyethahabu, na va vika tsimingiri tsiviri ku mikanda gyiviri gyesalamba.

¹⁷Na va vika minyoro gyiviri gya sitwa gyethahabu mu tsimingiri tsiviri tsya li ku mikanda gyesalamba yomukiritu.

¹⁸Na tsisonga tsindi tsyeminyoro gya sitwa, va tsi vika mu viduku viviri, na va vi vika ku tsinkanda tsyekisibao ku mavega imbiri.

¹⁹Na va lomba tsimingiri tsiviri tsyethahabu, na va tsi vika ku mikanda gyesalamba yomukiritu, kundulu kwayo ku luvega lwa isi ku kisibao.

²⁰Na va lomba tsimingiri tsiviri tsyethahabu, na va tsi vika ku mikanda gyekisibao gyoku mavega gombi, isi wakyo ku luvega lwembiri, himbi nobuhambaniru bwakyo, igulu womusipi gwekisibao gwa sitwa nomusidza.

²¹Na va boha isalamba yomukiritu netsimingiri tsyayo ku tsimingiri tsyekisibao nomugoye gwoluvusi lweblue, i menye ku musipi gu sitwa nobuidza, gwekisibao, na isalamba yomukiritu i vule kwavukanywa na k'isibao; kuli Yahova ya laga Musa.

²²Na ya lomba ijoho yekisibao, ya sitwa yosi yeblue;

²³na bwa li ubwiyangu hagati hejoho, kuli ubwiyangu bu vedzanga mu likoti lyekivya, na luliga lwa sitwa kuvodonkana ubwiyangu bwayo, i vule kutanduka,

²⁴Na va lomba ku lukigiti lwejoho, makomamanga geblue, na kiforosadi, na inzakanyu, na ikatani indahi i sitwa.

²⁵Kandi va lomba vikuli vyethahabu indahi na va vi vika hagati ha makomamanga ku lukigiti lwejoho tsimbega tsyosi, hagati ha makomamanga,

²⁶kikuli na likomamanga kikuli na likomamanga, ku lukigiti lwejoho kugikumbiridza tsimbega tsyosi, va tumekira mu; kuli Yahova ya laga Musa.

²⁷Na va lombera Haruni na avana veve makoti gekatani indahi ya sitwa,

²⁸na igudwa yekatani indahi, na vigudwa vilahi vyekatani indahi na tsisurali tsyekatani indahi yekatani ya sitwa,

²⁹Na musipi gwekatani indahi ya sitwa, yeblue, na yekiforosadi, na yenzakanyu, miyinzi gyomusidza wokulomba ubusalago; kuli Yahova ya laga Musa.

³⁰Na va lomba kibale kyetaji intakatifu kyethahabu indahi, na va ng'oda kukyo mang'oda kuli livadzwa lyomuhuri, MUTAKATIFU KU YAHOVA.

³¹Na va vika kukyo mugoye gweblue, kukiboha ku igudwa ku luvega lwegulu; kuli Yahova ya laga Musa.

³²Na ndiyo miyinzi gyosi gyelihema lyokuvuganira mu, gya malilidzwa: na avana va Israeli va kola kuli gosi ga Yahova ya laga Musa; va kola ndiyo.

³³Na va leta ku Musa lihemaj Lihema, na viju vyalyo vyosi, na visunga vyalyo, na tsimbao tsyalyo, na tsinzidzi tsyalyo, na tsitiru tsyalyo, na vyokusingeridza ku vyalyo;

³⁴Na kikuniko kyetsingubo tsya magondi makole tsyabuulwa irangi inzakanyu, na kikuniko kyetsingubo tsyelitsivi, na ingubo yokukinga;

³⁵na lisanduku lyelilolekidza, na misala gyokuginga gyalyo, na intebe yetsimbabasi;

³⁶imeza, na viju vyayo vyosi, na ubukima bwokumanyira;

³⁷na kinara kilahi kyetaya, na tsitsya tsyakyo, kali tsitaya tsyokulohidzwa, na viju vyatsyo vyosi, na maguta getsitaya;

³⁸na ubwali bwethahabu, na maguta gokuvaka, na kimuli kilahi, na ingubo yokukinga yomuliango gwa Lihema;

³⁹na ubwali bwomugasa, na kikereko kyomugasa, na misala gyabwo, na viju vyabwo vyosi, na lwero, na bwikaliru bwalwo;

⁴⁰na tsingubo tsyokusunga tsyomugidzi, na tsitiru tsyagwo, na vyokusingeridza ku vyatsyo, na ingubo yokukinga kiribwa kyomugidzi, na migoye gyagwo, na vivambo vyalyo, na viju vyosi vyokutumikira mu lihema na vyelihemalyokuvuganiramu;

⁴¹na tsingubo tsindahi tsyobutumiki mu hatakatifu, na tsingubo tsintakatifu tsya Haruni musalisi, na tsingubo tsya avana veve, kutumikira mu miyinzi gyobusalisi.

⁴²Kuli gosi ga Yahova ya laga Musa, na ndiyo avana va Israeli va kola miyinzi gyosi.

⁴³Na Musa ya lola miyinzi, henza, va mala kugyikola; kuli Yahova ya laga va kola ndiyo; na Musa ya va gasidza.