Read lulogooli Kutwula 4 Bible Online

Kutwula 4 - lulogooli bible

Kutwula 4

¹Na Musa ya tivula na a vola, Navutswa, henza, si va la nsuuvira, kandi si va la hulira mwoyo gwange; kigira va la vola, Yahova si a loleki ku ive mba.

²Na Yahova ya mu teva, Ni kindu ki kya u veye nakyo mu mukono gugwo? Naye ya vola, Ni impimbo.

³Naye ya vola, U gi lakule hasi ku marova. Naye ya gi lakula hasi ku marova, nayo ya girunkana ni i gwa inzoka; na Musa yiruka imbiri wayo.

⁴Na Yahova ya volera Musa, Nyira mukono gugwo, u gi gimire ku mukira: (naye ya nyira mukono gwigwe, na a gi gimira, na ya girunkana ni i gwa impimbo mu mukono gwigwe:)

⁵va duke kusuuvira ni Yahova, Nyasaye wa vaguga vavo, Nyasaye wa Abrahamu, Nyasaye wa Isaka, na Nyasaye wa Yakobo, u loleki ku ive.

⁶Na Yahova ya mu volera kandi, U vike mukono gugwo mu ingubo yomkiritu kikyo. Na ya vika mukono gwagwe mu kiritu: na lwa ya gu twulidza, henza, mukono gwigwe gwa li nobugere, mulavu kuli likonza.

⁷Ma ya mu volera, U vike mukono gugwo mu ingubo yekiritu kandi. (Naye ya vika mukono mu kiritu kikye kandi: na lwa ya gu twulidza mu kiritu, henza, gwa girukana kandi kuva kuli gundi.)

⁸Kunangwa ni i va va vula kukusuuvira, kinga kuhulira mwoyo gwekilolekidzu kvokutanga, va la hulira mwoyo gwekilolekidzu kyenyima.

⁹Kunangwa ni i va va vula kusuuvira vilolekidzu yivi viviri, nokuhulira mwoyo gugwo, hene yaho u la daha amadzi mu mugera, nokugatsuka ku lirova liumu: na amadzi ga u dahanga mu mugera ga la girunkana kugwa masahi ku lirova liumu.

¹⁰Na Musa ya volera Yahova, Mwami, inze si mbeye mundu wa makuva, kutwula kale, kinga kuduka kalunu lwa u volerana na mutumekiri wowo; kigira mbeye welivola lya galaha, na lulimi lwange lu veye lwekivoyo.

¹¹Na Yahova ya mu volera, Ibwaha wa lomba munwa gwomundu? Kinga ibwaha wa lomba mudimbidi kinga wa hana amatu, kinga u loianga, kinga mboku? Si a li inze, Yahova?

¹²Kalunu, kigira yaga, u tsie, na nda va halala nomunwa gugwo, na nda kwegidza aga u li vola.

¹³Naye ya vola, O Mwami, mwadza, u tume ku mukono gwa uyu wa u tovola.

¹⁴Na ubutima bwa Yahova bwaaka ku Musa, na a vola, Haruni amwavo wowo, Mulevi, si a veye ho? Mmanya uyu a nyala kuvola bulahi. Na kandi, henza, yadzanga kuvugana na ive: na lwa a ku lola a la yanza mu mwoyo gwigwe.

¹⁵Na ive u la mu volera, nokuvika makuva mu munwa gwigwe: ninze nda va halala na rnunwa gugwo, kandi halala na munwa gwigwe, na nda mwegidza aga mu li kola.

¹⁶Na uyu a la va umolomi wowo ku avandu; kunangwa, uyu a la va ku ive kuli munwa, na ive u la va kuye kuli Nyasaye.

¹⁷Na u la va nempimbo yiyi mu mukono gugwo, na i la va ya u li kolera vilolekidzu.

¹⁸Na Musa ya tsia ni yirana ku Jethro navizala wewe, na a mu volera, Mwadza, mpe munwa ntsie kwirana ku avamitu vange ava veye mu Egepeti, nduke kulola ni va va ni va veye mwoyo lero. Na Jethro ya volera Musa, U tsie nemirembe.

¹⁹Na Yahova ya volera Musa mu Midiani, U tsie wirane Egepeti; kigira avandu vosi avenyanga livamwoyo lilyo va mali kukudza.

²⁰Na Musa ya vugula mukali wewe na avayai veve, na a va nyinnya ku isukiri, ni yirana ku kivala kya Egepeti: na Musa ya ginga imphnbo ya Nyasaye mu mukono gwigwe.

²¹Na Yahova ya volera Musa, Lwa wirana Egepeti, henza bulahi kukola vyokugennya vyosi imbiri wa Farao, vya mbiki mu makono gugwo: navutswa nda kola mwoyo gwigwe mudinyu, naye a la vula kuha avandu mur wa kutsia.

²²Na ive u la volera Farao, Yahova a volanga ndi, Israeli a veye mwana wange, munene wange.

²³Kandi nku voleye, U he mwana wange munwa a tsie, a duke kuntumekira; na ive nu u suye kumuha munwa a tsie, henza, ndiita mwana wowo, munene wowo.

²⁴Kunangwa lwa ya li ku inzira ha ya gona, Yahova ya vugana naye ni yenya kumwiita.

²⁵Hene yaho Zipora ya vugula ligina lidinyu, na a keva mwana wewe, na a ta ha virenge vivye; na a vola, Ligali ive u veye musatsa wa masahi ku inze.

²⁶Kunangwa ya mu leka. Hene yaho mukali ya vola, U veye musatsa wa masahi, kigira likevwa.

²⁷Na Yahova ya volera Haruni, U tsie mwigendinyama kulola Musa. Naye ya tsia, na a mu nyola mu kigulu kya Nyasaye, na a mu busa.

²⁸Na Musa ya volera Haruni makuva gosi ga Yahova ya mu tuma nago, na vilolekidzu vyosi vya ya mu laga.

²⁹Na Musa na Haruni va tsia nokuvugannya avakulundu vosi va avana va Israeli:

³⁰na Haruni ya vola amakuva gosi aga Nyasaye ya volera Musa, na a kola vilolekidzu imbiri wa avandu.

³¹Na avandu va suuvira: lwa va hulira Yahova yadza ku avana va Israeli, kandi ya lola ubusaliri bwavo, hene yaho vinaminya mitwe gyavo nokusigamira.