Read lulogooli Kutwula 40 Bible Online

Kutwula 40 - lulogooli bible

Kutwula 40

¹Na Yahova ya volera Musa, nokuvola,

²Ku hdiku lyokutanga lyomweli gwokutanga u la singeridza lihema lyokuvuganira mu.

³Na u la vika mu lisanduku lyelilolekidza, na u la kinga lisanduku nengubo yokukinga.

⁴Na u la leta mu imeza, na u la lohidza ku vindu vyayo; na u la leta mu kinara kye taya, na u la hambidza tsitaya tsyakyo.

⁵Na u la singeridza ubwali bwethahabu bwokuvuyidza kimuli imbiri welisanduku lyelilolekidza, nokuvika ingubo yokukinga mu kiliango kyelihema.

⁶Kandi u la vika ubwali bwokusamba kihaanwa imbiri wekiliango kyelihema lyokuvuganira mu.

⁷Na u la vika lwero hagati helihema na ubwali, na u la vika mu amadzi.

⁸Na u la singeridza mugidzi kukumbiridza tsimbega tsyosi, nokusunga ingubo yokukinga yekiribwa kyomugidzi.

⁹Na u la leta maguta gokuvaka, nokuvaka lihema, na vyosi vi veye mu nokulitakasa, na viju vyalyo: na li ia va litakatifu.

¹⁰Na u la vaka ubwali bwokusamba kihaanwa, na viju vyabwo vyosi, nokutakasa ubwali: na ubwali bu la va butakatifu ligali.

¹¹Na u la vaka lwero nobwikaliru bwalwo, nokulukola lutakatifu.

¹²Na u la leta Haruni na avana veve ku kiliango kyelihema lyokuvuganira mu, na u la va singa na amadzi.

¹³Na u la vika ku Haruni tsingubo tsintakatifu; na u la mu vaka maguta, nokumutakasa, a ntumekire mu miyinzi gyobusalisi.

¹⁴Na u la leta avana veve, nokuvavika amakoti;

¹⁵na u la va vaka, kuli wa vaka dada wavo, na ntumekire mu miyinzi gyobusalisi: na livakwa lyavo li la va kuvo ubusalisi bemihiga nemihiga mu visukulwi vyavo vyosi.

¹⁶Musa ya kola yaga gosi: kuli vyosi vya Yahova ya mu laga, ya kola ndiyo.

¹⁷Kunangwa mu mweli gwokutanga muhiga gwa kaviri, ku lidiku lyokutanga mweli, lihema lya singeridzwa.

¹⁸Na Musa ya singeridza lihema, na ya vika vyokusingeridza ku vyalyo, na ya singeridza tsimbao tsyalyo, na ya vika tsinzidzi tsyalyo, na ya singeridza tsitiru tsyalyo.

¹⁹Na yaala lihema igulu wahatakatifu, na ya vika ku ingubo yalyo yokukunika igulu welihema; kuli Yahova ya laga Musa.

²⁰Na ya vugula lilolekidza, na ya li vika mu lisanduku, na a vika misala gyokuginga, na a vika intebe yetsimbabasi igulu welisanduku:

²¹na ya vika lisanduku mu lihema, na a sunga ingubo yokukinga, na ya kinga lisanduku lyelilolekidza; kuli Yahova ya laga Musa.

²²Na ya vika imeza mu lihema lyokuvuganira mu ku luvega lwa kasikasini, kyova wengubo yokukinga.

²³Na ya lohidza ubukima bwokumanyira kuyo imbiri wa Yahova; kuli Yahova ya laga Musa.

²⁴Na ya vika kinara kyetaya mu lihema lyokuvuganira mu kuhenza ku imeza, ku luvega lweiihema lwa kusini.

²⁵Na ya hambidza tsitaya imbiri wa Yahova; kuli Yahova ya laga Musa.

²⁶Na ya vika ubwali bwethahabu mu lihema lyokuvuganira mu imbiri wengubo yokukinga;

²⁷na ya vuyidza kimuli kyevifunyanga mwayu kubwo, kuli Yahova ya laga Musa.

²⁸Na ya sunga ingubo yokukinga ha kiliango kyelihema.

²⁹Na ya vika ubwali bwokusamba vihaanwa ha kiliango kyelihema lyokuvuganira mu, na ya haana kubwo kihaanwa kyokusambwa, na kihaanwa kyobusie; kuli Yahova ya laga Musa.

³⁰Na ya vika lwero hagati helihema lyokuvuganira mu nobwali, na a vika mu amadzi va duke kwisava ho.

³¹Na Musa na Haruni na avana veve visava makono gavo na virenge vyavo ha zana;

³²lwa vingira mu lihema lyokuvuganira mu, na lwa visunda ku bwali, visava; kuli Yahova ya laga Musa.

³³Na ya singeridza mugidzi gwokukumbiridza lihema na ubwali tsimbega tsyosi, na ya sunga ingubo yokukinga kiribwa kyomugidzi. Ma Musa ya mala miyinzi.

³⁴Hene yaho lilesi lya kunika lihema lyokuvuganira mu, na ubukumi bwa Yahova bwizula lihema.

³⁵Na Musa si ya nyala kwingira mu lihema lyokuvuganira mu, kigira lilesi lya menya ku, na ubukumi bwa Yahova bwizula lihema.

³⁶Na lwa lilesi lya gingwa kutwula ku lihema, avana va Israeli va tsia imbiri mu tsingendo tsyavo tsyosi:

³⁷Navutswa lilesi li vula kugingwa igulu, si va samula kuduka ku lidiku lyelilesi lya gingwa igulu.

³⁸Kigira lilesi lya Yahova lya li ku lihema inyinga yombasu, na lwa li nomuliru mu inyinga yobudiku, imbiri wetsimoni tsya vosi avenyumba ya Israeli, mu tsingendo tsyavo tsyosi.