Read lulogooli Kutwula 5 Bible Online

Kutwula 5 - lulogooli bible

Kutwula 5

¹Kandi inyima Musa na Haruni va tsia, ni va volera Farao, Yahova, Nyasaye wa Israeli a volanga ndi, U he avandu vange munwa va tsie, va duke kunombera lidiku lyelisangala mwigendinyama.

²Na Farao ya vola, Yahova ni bwaha, inze nduke kuhulira mwoyo gwigwe, nokuha Israeli munwa kutsia? Inze si mmanya Yahova, na kandi si nda a ha Israeli munwa kutsia.

³Navo va vola, Nyasaye wa Vahebraina u vugani na kwinye: mwadza, u ku he munwa kutsia ulugendo lwa madiku gavaka mwigendinyama kulombera Yahova Nyasaye wetu isadaka; gase a la ku duya nobulwaye, kinga nekivavi.

⁴Na mwami wa Egepeti ya a va volera, Kigira ki mwinye, Musa na Haruni, mu twulidza avandu ku miyinzi gyavo? Mu tsie ku misigo gyenyu.

⁵Na Farao ya vola, Henzi, avandu vekivala va veye vanyingi, na mwinye mu va sosidzanga va leke misigo gyavo.

⁶Na ku lidiku yilyo Farao ya laga avasingiriri na avanyampara vavo ava li ku avandu, na a vola,

⁷Mu ta ha avandu kandi bunyasi bwokuvika mu matafali ga va lombanga, kuli matsyambiri: va tsie kwenya bunyasi avene.

⁸Na livalidzwa lya matafali ga va lombanga matsyambiri, li ve ndiyo kuvo; mu ta gehidza kuvo kali lilala, kigira va veye avagata; kigira yaga va kola liyoga, nokuvola, U ku he munwa kutsia kulombera Nyasaye wetu isadaka.

⁹Miyinzi midinyu kukira gyi vikwe ku avandu yava, va yinzire mugyo; va ta yeka ku makuva gobubehi.

¹⁰Na avasingiriri va avandu, halala na avanyampara vavo, va tsia ni va volera avandu, ni va vola Farao a volanga ndi, Si nda mu ha bunyasi.

¹¹Mu tsie avene, mwenye bunyasi ha mu nyala kubunyola kigira si mu la gehidzirwa miyinzi gyenyu kali hakuzu.

¹²Ma avandu va salana mu kivala kyosi kya Egepeti kuvungidza uluvuva lwomulimi mbugono bwobunyasi.

¹³Na avasingiriri va va yugidza, ni va vola, Mu dukidze miyinzi gyenyu, lididikana lyenyu lya madiku, kuli lwa bunyasi bwa li ho.

¹⁴Na avanyampara va avana va Israeli, ava vasingiriri va Farao ya va vikira, va kuywa, ni va tevwa, Kigira ki mwinye si mu dukidzi lididikana lyenyu mgolova, na lero, kulomba matafali kuli matsyambiri?

¹⁵Hene yaho avanyampara va avana va Israeli, vadza ni va lira ku Farao, ni va vola, Kigira ki u koleranga ndi kwinye avatumekiri vovo?

¹⁶Kwinye avatumekiri vovo si ku hebeywi bunyasi mba, navo va ku volera, Lombi matafali: na, henza, kwinye avatumekiri vovo ku kuyangwa; navutswa lihyola yili ni lya avandu vovo avene.

¹⁷Navutswa ya vola, Mwinye mu veye avagata, mu veye avagata: kigira yaga mu volanga, U ku he munwa kutsia kulombera Yahova isadaka.

¹⁸Kalunu mu tsie kukola miyinzi; kigira si mu la hebwa bunyasi, navutswa mu la leta matafali kuli wa ga vedzanga.

¹⁹Na avanyampara va avana va Israeli va lola va li mu kivi, lwa va volerwa, Si mu la gehidzirwa kali lilala lya matafali, lididikana lyenyu lya madiku.

²⁰Na va vugana na Musa na Haruni, va li ni va singiye ku inzira, lwa va twula ku Farao:

²¹ni va va volera, Yahova a henze mwinye, nokumukalagira; kigira mu koli mwoyo gwetu kudunyirwa imbiri wa Farao, na imbiri wa avatumekiri veve, kuvika kivavi mmukono gwavo kukwiita.

²²Na Musa yirana ku Yahova, na a vola, Mwami, kigira ki u kolanga avandu vovo ubudamano? Kigira ki u ntumi?

²³Kigira kutwula lwa nda tsia kuvolera Farao ku lieta lilyo, a va koleye ubudamano, kandi si u konyi avandu vovo mba.