Read lulogooli Kutwula 7 Bible Online

Kutwula 7 - lulogooli bible

Kutwula 7

¹Na Yahova ya volera Musa, Henza, nkoli ive kuva kuli Nyasaye ku Farao; na Haruni amwavo wowo a la va muprofeti wowo.

²U la vola gosi aga nku laga; na Haruni amwavo wowo a ia volera Farao, a lakule avana va Israeli va twule mu kivala kikye.

³Na nda dinyeridza mwoyo gwa Farao na nda meda vilolekidzu vyange na vyokugenya vyange mu kivala kya Egepeti.

⁴Navutswa Farao a la vula kumuhulira, na nda vika mukono gwange ku Egepeti, nokuleta amahe gange, avandu vange avana va Israeli, va twule mu kivala kya Egepeti nelikalaga linene.

⁵Na Avaegepeti va la manya Inze mbeye Yahova, lwa nyira mukono gwange ku Egepeti, nokutwulidza avana va Israeli hagati havo.

⁶Na Musa na Haruni va kola ndiyo; kuli Yahova ya va laga, va kola ndiyo.

⁷Na Musa ya li nemihiga makumi gatano na gavaka, na Haruni ya li nemihiga makumi gatano na gavaka, nemihiga gyivaka, lwa va volera Farao.

⁸Kandi Yahova ya volera Musa na Haruni, na a vola,

⁹Lwa Farao a la mu volera, na a vola, Langaminyira mwinye kyokugenya; hene yaho u la volera Haruni, U vugule impimbo yoyo, u gi lakule hasi imbiri wa Farao, i duke kugwa inzoka.

¹⁰Na Musa na Haruni vingira ku Farao, ni va kola ndiyo, kuli Yahova ya va laga: na Haruni ya lakula hasi impimbo yeye imbiri wa Farao, na imbiri wa vatumekiri veve, nayo ya gwa inzoka.

¹¹Hene yaho Farao ya langa avageeri na avasegetiri: navo kandi, avasegetiri va Egepeti, va kola ndiyo nobusegetiri bwavo.

¹²Kigira va lakula sa mulala impimbo yeye hasi, natsyo tsya gwa tsinzoka: navutswa impimbo ya Haruni ya mira tsimpimbo tsyavo.

¹³Na mwoyo gwa Farao gwa gwa mudinyu, na a vula kuvahulira, kuli Yahova ya vola.

¹⁴Na Yahova ya volera Musa Mwoyo gwa Farao gu veye muliduhu yambakananga kulakula avandu va tsie.

¹⁵U tsie ku Farao mugamba; henza, a tsitsanga ha madzi; nive u la singira ku luginga lwomugera kuvugana naye; na impimbo ya girunkannywa kuva inzoka i la va mu mukono gugwo.

¹⁶Na u la mu volera, Yahova, Nyasaye wa Vahebraina, u ntumi ku ive, a volanga, U lakule avandu vange va duke kuntumekira mwigendinyama: na, henza, kuduka kalunu u kikiri kuhulira.

¹⁷Yahova a volanga, Ku inkuva yiyi u la manya mbeye Yahova: henza, nda kuya amadzi aga veye mu mugera yimu nempimbo ya mbeye nayo mu mukono gwange, nago ga la girunkannywa, na ga la gwa masahi.

¹⁸Na tsisudzi tsi veye mu mugera tsi la kudza, na mugera gu la gwa mudamano; na Avaegepeti va la lola kivihiri kunwa amadzi gomugera.

¹⁹Na Yahova ya volera Musa, U volere Haruni, U vugule impimbo yoyo, u nyire mukono gugwo ku amadzi ga Egepeti, noku migera gyavo, noku tugera twavo, noku tsinyanza tsyavo, noku madavalia gavo gosi, ga duke kuva masahi, na hosi mu kivala kya Egepeti ha la va namasahi, mu viju vyemisala nomu viju vya magina.

²⁰Na Musa na Haruni va kola kuli Yahova ya va laga; na ya ginga impimbo, nokuduya amadzi gomugera, imbiri wa Farao, na imbiri wa vatumekiri veve; na amadzi gosi gomugera ga girunkannywa kugwa masahi.

²¹Na tsisudzi tsya li mu mugera tsya kudza; na mugera gwa funya ubugundu, na Avaegepeti si va nyala kunwa amadzi ga twula ku mugera; na masahi ga li mu kivala kyosi kya Egepeti.

²²Kandi avasegetiri va Egepeti va kola kuli yaga nobukumu bwavo: na mwoyo gwa Farao gwa dinyiridzwa, na a vula kuvahulira; kuli Yahova ya vola.

²³Na Farao yirana ni yingira mu inyumba yeye, kali yivi si ya vi vika mu mwoyo.

²⁴Na Avaegepeti vosi va yava ku luginga lwomugera va nyole amadzi gokunwa; kigira si va nyala kunwa amadzi gomugera.

²⁵Na ga duka madiku gatano na gaviri, inyima wa Yahova ya li duya mugera.