Read lulogooli Kutwula 8 Bible Online

Kutwula 8 - lulogooli bible

Kutwula 8

¹Kandi Yahova ya volera Musa Ingira ku Farao, na u mu volere Yahova a vola, U lakule avandu vange, va tsie kuntumekira.

²Kandi nu u va nu u sula kuvalakula va tsie, henza, nda duya kivala kyosi mu tsinzako tsitsyo na makere:

³na mugera gu lizula makere, aga li senuka nokwingira mu inyumba yoyo, nomu buliri bubwo, noku kitali kikyo, nomu tsinyumba tsya vatunnekiri vovo, noku avandu vovo, nornu mahiga gogo, nomu viju vyokulugira:

⁴Na makere ga la senuka ku ive, noku avandu vovo, noku avatumekiri vovo vosi.

⁵Na Yahova ya volera Musa, U volere Haruni, Nyira mukono gugwo nempimbo yoyo ku migera, noku visenukiru vya amadzi, noku madavalia, u senukidze makere ku kivala kya Egepeti.

⁶Na Haruni ya nyira mukono gwigwe ku amadzi ga Egepeti; na makere ga senuka, na ga kunika kivava kya Egepeti.

⁷Na avasegetiri va kola ndiyo nobusegetiri bwavo, na va senukidza makere ku kivala kya Egepeti.

⁸Hene yaho Farao ya langa Musa na Haruni, na a vola, Mu saale Yahova, a twulidze makere ku inze, noku avandu vange; na nda lakula avandu va tsie kulombera Yahova isadaka.

⁹Na Musa ya volera Farao, Wekuminye ku inze mu inkuva yiyi: inyinga ki nda ku saalira ive, na vatumekiri vovo, na avandu u ovo, makere ga dividzwe kutwula ku ive na tsinyumba tsitsvo, na ga menye mu mugera vutswa.

¹⁰Naye ya vola, Mugamba. Na ya vola, Ga ve kuli likuva lilyo; u duke kumanya si ha veye nowundi u leng'ana na Yahova Nyasaye wetu.

¹¹Na makere ga la twula ku ive, nomu tsinyumba tsitsyo, noku avatumekiri vovo, noku avandu vovo; ga la tigala mu mugera vutswa.

¹²Kunangwa Musa na Haruni va twula ku Farao: na Musa ya saala Yahova ku makere ga ya leta ku Farao.

¹³Na Yahova ya kola kuli likuva lya Musa; na makere ga kudza kutwula mu tsinyumba, no hamugidzi, nomu milimi.

¹⁴Na va ga vungidza mu vitumi, na kivala kya funya ubugundu.

¹⁵Navutswa Farao, lwa ya lola ha veye nobwiyangu bwokusosa, ya dinnya mwoyo gwigwe, na a vula kuvahulira; kuli Yahova ya vola.

¹⁶Na Yahova ya volera Musa, U volere Haruni, U nyire impimbo yoyo na u duye ulugukyi lwa marova, lu duke kuva tsindaa mu kivala kyosi kya Egepeti.

¹⁷Navo va kola ndiyo; na Haruni ya nyira mukono gwigwe nempimbo yeye, na a duya ulugukyi lwe kivala, na ha li netsindaa ku vandu, noku mitugu; na lugukyi lwazi lwa marova lwa gwa tsindaa mu kivala kyosi kya Egepeti.

¹⁸Na vasegetiri va kola ndiyo nobusegetiri bwavo kuleta tsindaa, navutswa si va nyala mba: na tsindaa tsya li ku vandu, noku mitugu.

¹⁹Hene yaho avasegetiri va volera Farao Inkuva yiyi i veye kidete kya Nyasaye: na mwoyo gwa Farao gwa dinyeridzwa, naye si ya va hulira mba; kuli Yahova ya vola.

²⁰Na Yahova ya volera Musa, U vuke mugamba mabwebwe, na u singire imbiri wa Farao; henza, a twulanga kutsia ku amadzi; na u la mu volera, Yahova a vola ndi, U lakule avandu vange va tsie kuntumekira.

²¹Kinga, nu u va nu u sula kuvalakula va tsie, henza, nda leta maduuma getsingi ku ive, noku vatumekiri vovo, noku avandu vovo, nomu tsinyumba tsitsyo: na tsinyumba tsya Avaegepeti tsi lizula maduuma getsingi, na kandi marova ga tsinyumba tsi veye kugo.

²²Kandi ku lidiku yilyo ndavukanya kivala kya Goshen, ha avandu vange va menya, maduuma getsingi tsi vule kuva mu; ive u duke kumanya inze mbeye Yahova hagati helirova.

²³Na nda vika lwako hagati ha avandu vange na avandu vovo: lilolekidza yili li la va lya mugamba.

²⁴Na Yahova ya kola ndiyo; na maduuma getsingi madamano ga duka mu inyumba ya Farao, nomu tsinyumba tsya avatumekiri veve: nomu kivala kyosi kya Egepeti kivala kyononywa kigira maduuma getsingi.

²⁵Na Farao ya langa Musa na Haruni, na a vola, Mu tsie, mu lombere Nyasaye wenyu isadaka mu kivala.

²⁶Na Musa ya vola, Si ga ku dukira kukola ndiyo; kigira ku la lombera Yahova Nyasaye wetu isadaka yekivihiri kya Avaegepeti imbiri wetsimoni tsyavo: henza, ku la lomba isadaka yekivihiri kya Avaegepeti imbiri wetsimoni tsyavo, navo si va la ku lasa magina?

²⁷Ku la tsia ulugendo lwa madiku kavaka mwigendinyama, na ku la lombera Yahova Nyasaye wetu isadaka, kuli a ku laga.

²⁸Na Farao ya vola, Nda mu ha munwa kutsia kulombera Yahova Nyasaye wenyu isadaka mwigendinyama; navutswa si mu la tsia ihale mba: mu nsaalire.

²⁹Na Musa ya vola, Henza, ntwulanga ku ive, na nda saala Yahova maduuma getsingi ga twule ku Farao, noku avatumekiri veve, noku avandu veve, mugamba: navutswa Farao a ta kola ubugadi kandi ku livula kulakula avandu va tsie kulombera Yahova isadaka.

³⁰Na Musa ya twula ku Farao, na a saala Yahova.

³¹Na Yahova ya kola kuli likuva lya Musa; naye ya twulidza maduuma getsingi ku Farao, noku avatumekiri veve, noku avandu veve; si ha tigala nendala.

³²Na Farao ya dinnya mwoyo; gwigwe inyinga yiyi kandi, na si ya lakula avandu va tsie mba.