Read lulogooli Ayubu 1 Bible Online

Ayubu 1 - lulogooli bible

Ayubu 1

¹Ya li ho mundu mu kivala kya Uzu, wa langwa Ayubu; mundu uyu ya li mudukiru nomulungi, ya li mulala wa tia Nyasaye, nokwavukana nobudamano.

²Na vivulwa kuye avana avayai vatano na vaviri, nava kana vavaka.

³Nobutugi bwibwe bwa li amagondi tsielfu tsitano na tsiviri, netsing'amia tsielfu tsivaka, netsing'ombe tsyokulima elfu indala netsisukiri tsidwasi tsimia tsitano navandu vomu inyumba avanyingi ligali; kunangwa mundu uyu ya li munene kuvita avandu vosi avoluvega lwevugwe.

⁴Navana veve va tsia kulomba lilia mu inyumba yavo, sa mulala ku lidiku lilye; navo va hma kulanga vabotso vavaka vavo vadze kulia nokunwa halala navo.

⁵Na ga duka, lwa madiku gelilia lyavo ga kung'ana, Ayubu ya tuma nokuvatakasa, na a vuka mugamba tsuri, na a haana vihaanwa vyoku sambwa kuli livalidzwa lyavo vosi: kigira Ayubu ya vola, Namusya avana vange va koli ubwoni, nokunyega Nyasaye mmyoyo gyavo. Ayubu ya kola ndiyo kazozo.

⁶Na ga duka ku lidiku lilala lyavana va Nyasaye va tsia kwevu ngidza avene imbiri wa Yahova, Setani ya tsia hagati havo.

⁷Na Yahova ya teva Setani, U twula haliha? Hene yaho Setani ya tivulira Yahova, na a vola, Ntwula mu livodonkana mu lirova, nokugenda yiyi na yiyi kulyo.

⁸Na Yahova ya teva Setani, Wa li ku lola mutu mekiri wange Ayubu? Kigira si ha li nomulala u veye kuli uyu mu lirova lyosi, mundu musuuvirifu nomulungi, mulala u tidzanga Nyasaye, nokwavukana nobudamano.

⁹Ma Setani ya tivulira Yahova, na a vola, Ayubu a tidzanga Yahova vutswa?

¹⁰Ive i wa kumbiridza kuye lwevo tsimbega tsyosi, halala nenyumba yeye, nevindu vyosi vya a veye navyo? Miyinzi gyamakono gege wa gyi gasidza, nobutugi bwibwe bu medekanga mu kivala.

¹¹Navutswa nyira mukono gugwo kalunu, u dire vyosi vya a veye navyo, na a la ku nyega imbiri wommoni mumwo.

¹²Yahova ya volera Setani, Henza, vyosi vya a veye navyo vi veye mu bunyali bubwo; navutswa u ta nyira mukono gugwo ku mwene mba. Ma Setani ya twula imbiri wommoni mwa Yahova.

¹³Na ga duka ku lidiku lila la, avana va Avubu avayai navakana lwa va li ni va litsanga nokunwa iwaini mu inyumba yamwavo wavo munene,

¹⁴mutumwa ya duka ku Ayubu na a mu volera, Tsing'ombe tsya li ni tsi limanga na tsisukiri tsya li netsyayanga himbi natsyo;

¹⁵no noho Vasabea vekupa kutsyo noku tsihila, nokutsia natsyo: yee, viiti avatumekiri nobwogi bwekivavi; na inze tsyeng'ine mboni, kukuletera amakuva.

¹⁶Uyu lwa ya li na a ki vola, wundi ya twulira, na a vola, Muliru gwa Nyasaye gwaguluki ku twula mwigulu, nokusamba amagondi navatumekiri, nokuvadividza; inze tsyeng'ine mboni, kukuletera amakuva.

¹⁷Uyu lwa ya li na a ki vola, wundi ya twulira, na a vola Vakalidei va lomba viduma vivaka nokwekupa ku tsing'amia, na va tsiye natsyo, yee, viiti avatumekiri nobwogi bwekivavi; inze tsyeng'ine mboni, kukuletera amakuva.

¹⁸Uyu lwa ya li na a ki vola, wundi ya twulira, na a vola, Avana vovo avayai navakana va li ni va litsanga nokunwa iwaini mu inyumba yamwavo wavo munene;

¹⁹nonoho, henza, kihu dzudzi kya twula mu kyangalangwi, nokuduya inyumba tsikorna tsyayo tsine, nayo ya gwa ku vasoleli, navo va kudzi; inze tsyeng'ine mboni, kukuletera amakuva.

²⁰Hene yaho Ayubu ya singira, na ya tandula ijoho yeye, kandi ya vegwa mutwe gwigwe, nokugwa hasi, nokusigamira;

²¹na ya vola, Inze nda twula munda mwa mama wange ni mbeye mwere, na kandi ndirana yo ndiyo mwere; Yahova ya haana, kandi Yahova u vuguye; Iieta lya Yahova li gasidzwe.

²²Mu makuva yaga gosi Ayubu si ya kola ubwoni mba, kandi si ya vola ku Nyasaye agobusiru.