Read lulogooli Ayubu 11 Bible Online

Ayubu 11 - lulogooli bible

Ayubu 11

¹Hene yaho Zofaru Munaamathi ya tivula, na a vola,

²Bunyingi bwa makuva yibu si bu tivulirwa? Na musatsa wizula makuva, ga mu dukira kuvolwa a veye mulungi?

³Lyegingira lilyo ga li dukira likiring'annya avandu? Na lwa ive u kolanga kihenye henyi, si ha veye nomundu u nyala kukulegannya?

⁴Kigira u vola, Megidzo gange ga veye manifu, Mbeye munifu imbiri wetsimoni tsitsyo.

⁵Navutswa nkano Nyasaye u voye, Nokukunula minwa gyigye ku ive,

⁶Kandi kukuvuulira liviswa lyobugeeri Kigira a veye nobugeeri ubunyingi. Kigira yaga u manye Nyasaye a vanzanga ku ive kikekeke ku yago aga dukiranga ubwoni bubwo.

⁷Ive u nyala kunyola Nyasaye nelidera? U nyala kunyola Wanyala Vyosi kali ubudukira bwbwe?

⁸Bu veye igulu ligali kuli migulu; u nyala kukola ki? Bu veye mu luliva kuvita Kiha disi; u nyala kumanya ki?

⁹Ligera lyabwo li veye litambi kuvita lirova, Nobubambalalu bu vita nyanza.

¹⁰Na a vita, nokuhana, Nokulanga kutsia mu likalagirwa, ni bwaha u nyala kumugayidza?

¹¹Kigira a manya avandu vobugadi: A lolanga ubudamano kandi, kali na a ta bu vika mu mwoyo gwigwe.

¹²Navutswa mundu wa vutswa u gehi limanya, Yee, umundu yivulangwa kuli kimoli kyesukiri yommulitu.

¹³Nu u va nu u vika mwoyo gugwo ku bulungi, Nokunyira makono gogo kuye;

¹⁴Ubudamano ni bu veye mmukono gugwo, u bu vike ihale na ive, U ta bugirira ubukyamu kumenya mmahema gogo.

¹⁵Ligali hene yaho u la ginga mmoni mumwo bugira imbala; Yee, u la dinyeridzwa, na u la vula kutia;

¹⁶Kigira u livirira kivi kikyo; U la kidzulira kuli widzuliranoa madzi ga vita.

¹⁷Livamwoyo lilyo li la va lilavu kuvita mbasu hagati; Kali ni ki veye kisundi ki la va kuli mugamba.

¹⁸Na u la va nemirembe, kigira lisuuviridza li veyo Yee, u la henzeridza vivyo, na u la sosa mu mirembe.

¹⁹Kandi u la gona hasi, na si ha la va nowokukutihidza; Yee, vanyingi va lenya mmoni mumwo.

²⁰Navutswa tsimoni tsyavadamano tsi la geha tsingulu, Na si va la va na hokwirukira; Lisuuvira lyavo li la va likudza lyomwoyo.