Read lulogooli Ayubu 15 Bible Online

Ayubu 15 - lulogooli bible

Ayubu 15

¹Hene yaho Elifazu Muteman, ya tivula, na a vola,

²Ga dukira mundu wobugeeri kutwulidza mativuli nelimanya lya vutswa, Nokwizulitsa inda yeye nembuudza yevugwi?

³Ga mu dukiranga kulohidzana namakuva ga vutswa, Kinga ku livola lya a ta nyala kukola nalyo bulahi?

⁴Yee, u twulidzanga ubutii, Na u gayidzanga lisigamira imbiri wa Nyasaye.

⁵Kigira ubudamano bubwo bwegidzanga munwa gugwo, Na u tovolanga lulimi lwomugadi.

⁶Munwa gugwo gu ku kalagiranga mahyolo, si a li inze; Yee, minwa gyigyo gyi lolekidza ku ive.

⁷Ive u veye mundu wokutanga wivulwa? Kinga ive wivulwa imbiri wevigulu?

⁸Ive u huliye makuva ga viswa ga Nyasaye? Na ive u gayidzanga ubugeeri bu ve bubwo weng'ine?

⁹U manya nelikuva ki, lya ku vula kumanya? Na u manya kindu ki, ki ta li mu kwinye?

¹⁰Avetsimbudze navasakulu ligali vosi va veye halala na kwinye, Ava veye vasakulu kuvita dada wowo.

¹¹Lihodzeridza lya Nyasaye li veye likekeke ku ive, Kali likuva li kolanga nobuhoma ku ive?

¹²Kigira ki mwoyo gugwo gu ku hilanga ihale? Na kigira ki tsimoni tsitsyo tsi guniyeranga?

¹³U luhe u girunkannyi mwoyo gugwo kuhing'ana ku Nyasaye, Nokuleka makuva kuli yaga kutwula mu munwa gugwo?

¹⁴Ku mundu a veye ki, kuduka u gwiye munifu? Uyu womukali yivula, u gwiye mulungi?

¹⁵Henza, si a suuvira vatakatifu veve mba; Yee, ligulu kandi si li veye linifu imbiri wewe mba:

¹⁶Nasindi mulala wokuvihiriridza nomudamano, Mundu u nwedzanga budamano kuli a nwedzanga madzi

¹⁷Nda ku mannya, u mbulire; Na ga ndoli nda gilwadza

¹⁸(Makuva gavandu vageeri vilwadza Kutwula ku vaguga vavo, si va ga visa;

¹⁹Ava hebwa kivala veng'ine, Na mugeni si ya vita hagati havo mba):

²⁰Mundu mudamano a vedzanga nobululu bwelilumwa madiku gege gosi, Kuli livalidzwa lyemihiga gyi vikwa ku mudambidzi.

²¹Myoyo gyelitihidza gyi veye mu matu gege; Mu ligasidzwa lilye uyu u lanyanga a la duka kuye.

²²Uyu si a suuviranga a lirana kutwula mu kisundi mba Na kivavi ki mu lindiranga.

²³A voyavoyanga a duke kunyola vyokulia, na a rola, Li veye haliha? A manya lidiku lyekisundi lyetegeki ha mukono gwigwe.

²⁴Ubusaliri nekivi li mu tihidzanga; Vi mu guuta, kuli mwami wetegeki ku bulwani.

²⁵Kigira u nyiye mukono gwigwe ku Nyasaye, Nokutsia imbiri noluyai ku Wanyala Vyosi;

²⁶U mu twulira neligoti lidinyu, Na tsitsula tsinene tsyetsingavo tsitsye;

²⁷Kigira ya kunika mmoni mwimwe nobukomeru bwibwe, Nokunetidza amaguta mu kikenge kikye;

²⁸Naye ya menya mu madala mang'anye, Mu tsinyumba tsyomundu a ta menyanga mu Tsya li ni tsyetegeki kuva vyanyi;

²⁹Uyu si a la va mutugi mba, kandi miyandu gyigye si gyi la hindira mba, Kandi limedeka lyavo si li la hindira ku lirova mba.

³⁰Si a la twula mu kisundi mba; Lumemo lu la niyalidza tsisya tsitsye; Na mwika gwomunwa gwa Nyasaye gu la mu twulidza.

³¹A ta suuvira ku ga vutswa, nokwegada mwene; Kigira aga vutswa nigo aga liva madanyi gege.

³²Inkuva yiyi i la dukidzwa imbiri wenyinga yeye, Na lusya lwilwe si lu la va luvisi.

³³A la vungulula mazabibu magengi kuli muzabibu, Na a la vungulula kimuli kikye kuli muzeituni.

³⁴Kigira kiduma kya ava ta tia Nyasaye ki la va kigumba, Na muliru gu la samba mahema gevikukula.

³⁵Va vereka bubi, nokwivula ubudamano, Na inda yavo i lombanga ubugadi.