Read lulogooli Ayubu 19 Bible Online

Ayubu 19 - lulogooli bible

Ayubu 19

¹Hene yaho Ayubu ya tivula, na a vola,

²Mu la kupidza kivi mwoyo gwange kuduka inyinga ki Nokumbunannya na makuva genyu?

³Mu ndegeridzi tsinyinga likumi yitsi: Si mu veye isoni kunkolera makuva madinyu ndi.

⁴Ni ga loleka ligali mmali kuhyola, Lihyola lyange li menyanga ninze mwene.

⁵Ni mu va ni mweyidzominya mwinye avene ku inze Nokuvola manyego gange ku inze.

⁶Kalunu mu manye Nyasaye u tung'aminye inze mu likuva lyange Na ya nkumbiridza nomutego gwigwe.

⁷Henza, ndiranga kigira liginwa, navutswa si ha veye no u mbulira: Nkupanga lwanga nyole bukonyi, navutswa likalaga si li veye ho mba.

⁸Wigaliye inzira yange mbule kuvita Nokuvika kisundi mu tsinzira tsyange.

⁹U navuye ubukumi bwange Nokutwulidza igudwa yange ku mutwe gwange.

¹⁰U nsambuye tsimbega tsyosi, na ntigaye hatswa; Lisuuvira lyange wihi kuli musala.

¹¹Kandi waakidzi ubutima bwibwe ku inze, Na u mbalidzi kuva kuye kuli mulala ku vasigu veve.

¹²Amahe gege gesundanga halala, Na va leng'annya inzira yavo ku inze, Nokwombaka mahema gavo kukumbiridza lihema lyange.

¹³U viki vamwavo vange ihale ku inze, Na avakye vange va kwa manyana va twulidzeywi ku inze ligali.

¹⁴Aviko vange va heridzeywi, Navalina vange veligali va nziviliye.

¹⁵Ava menya mu inyumba yange, na vatugwa vakana vange va mbalidza kuva mugeni kuvo: Mbeye mundu wehiri yindi imbiri wetsimoni tsyavo.

¹⁶Nanga mutumekiri wange, naye si a bugiranga, Kali ni mmu goonya nomunwa gwange.

¹⁷Mwika gwange gu veye gwowundi mundu ku mukali wange Na lisaala lyange li gwiye lyomundu wundi ku avana va mama wange.

¹⁸Kali avana vadoto va ndeganga; Ni nsingira, va volanga makuva mugongo wange.

¹⁹Avalina vange veligali va ndunyiranga, Na va nda yanza va girunkani kutwula ku inze.

²⁰Kigumba kyange ki handi ku ligodo lyange noku inyama yange, Mboneye ku kidete kyanyasi.

²¹Mu mbererere, mu mbererere, O mwiilye avalina vange; Kigira mukono gwa Nyasaye gu diye inze.

²²Kigira ki mwinye mu ndambidzanga kuli Nyasaye, Nomubiri gwange si gu mu duki?

²³Nkano makuva gange ga ka ng'odwa kalunu Nkano ga ka ng'odwa mu kitabu

²⁴Ga ve ga ka ng'odwa nekalamu yekivya ku lisasi Nokuvadzwa ku lwanda mihiga nemihiga

²⁵Navutswa inze mmanya Mutungiri wange a veye mwoyo, Noku kiheri a la singira ku lirova.

²⁶Kali tsing'ende ni tsyononnya mubiri gloange Mu mubiri yigu nda ka loie Nyasaye;

²⁷Na inze nda mu lola, inze mwene, Kandi tsimoni tsyange tsi la mu henza, si ga veye kuli mugeni. Mwoyo gwange gu mali kuheridzwa mu inze.

²⁸Ni mu vola, Ku la mu dambidza ndi Kigira kitinya kyenkuva yiyi ki loleki mu inze

²⁹Mu ve nobutii kigira kivavi Kigira ubutima bu letanga kivikyekivavi, Mu duke kumanya likalagirwa li veye ho.