Read lulogooli Ayubu 20 Bible Online

Ayubu 20 - lulogooli bible

Ayubu 20

¹Hene yaho Zafaru Munaamathi ya tivula, na a vola,

²Kigira yaga tsiganagani tsyange tsi mbeye litivula, Kigira likola bwangu lya mbeye nalyo mu inze.

³Mbuliye ligondokirwa li ndega nnya; Na mwoyo gwelimanya lyange gu ntivulira.

⁴Ive si u manya yaga kutwula kale, Kutwula Adamu na a vikwa ku lirova,

⁵Ubusangali bwavadamano bu heranga bwangu, Ubuyanzi bwa va ta tia Nyasaye bu veye bwedagika indala vutswa?

⁶Kali ubunene bwibwe ni bu viruka kuduka migulu Nomutwe gwigwe kuduka ku malesi;

⁷Ku yaga gosi a la diva mihiga nemihiga kuli amavi gege mwene: Yavo ava mu loli va la vola, A veye haliha?

⁸A la buluka kuli liloto, na si a la loleka kandi mba: Yee, a la kungwa kuli malola gobudiku.

⁹Imoni ya mu lola si i la mu lola kandi mba; Kandi hango hehe si ha la mu lola kandi mba.

¹⁰Avana veve va lenya tsimbabasi ku vadaka Na makono gege ga lirannya ubutugi bwibwe.

¹¹Vigumba vivye vizuye ubusoleli bwibwe, Navutswa bu la gona mu lugukyi halala naye.

¹²Kali ubudamano ni bu veye ubunolu mmunwa gwigwe, Kali na a bu visa isi wolulimi lwilwe

¹³Kali na a bu vererera, na a ta bugirira kubuleka bu tsie, Navutswa ya bu gumira ndiyo mmunwa gwigwe;

¹⁴Halala na yaga vyokulia vivye mmunda mwimwe vi girunkani, Vi gwiye tsindulwi tsyetsinzoka muye.

¹⁵A miri ubutugi bunyingi, na a la vu luka kandi: Nyasaye a la bu twulidza mmunda mwimwe.

¹⁶A la nuna ubusungu bwetsinzoka: Lulimi lwekihirigoma lu la mwiita.

¹⁷Si a la lola migera gyamadzi, Migera gyobwuki namaguta gi vitanga bwangu.

¹⁸Vya ya nyankana kuvyo a la virannya, si a la vi mira mba; Kuli ubutugi bwa ya nyola, si a la sangala mubwo.

¹⁹Kigira ya dambidza na a leka avadaka; A nuula inyumba nekirage ya ya vula kwombaka.

²⁰Kigira si a manya lyehodziridza kali hakuzu muye, Si a la honnya kindu kali kilala mu vya a sangaliranga.

²¹Si kya tigala kindu kya ya vula kulia; Kigira yaga ligasidzwa lilye si li la hindira mba.

²²Mu lizula ubudukiru bwibwe a la va mu kivi: Mukono gwomundu sa mulala u veye mu kivi gu la duka kuye.

²³Lwa yizulitsa inda yeye, Nyasaye a la ta kuye ubululu lwobutima bwibwe, Nokubukupidza kuye inyinga na a veye mu lilia.

²⁴A liruka vyuma vyekivya, Nobuta bwomugasa bu la mu hudulannya.

²⁵A bu twulidza, nabwo bu twula mu mubiri gwigwe; Yee, isiongo ing'ering'ananga i twulanga mu indulwi yeye: Vyokutihidza vi veye kuye.

²⁶Kisundi kyosi ki vikeywi kigira akiba yeye: Muliru gwa vula kufwanwa gu la mu samba; Gu la samba vya tigala mu lihema lilye.

²⁷Ligulu li la kunula ubudamano bwalyo, Nelirova li la vuka kuhing'ana naye.

²⁸Limedeka lyenyumba yeye li la twula, Neviju vivye vi la salika mu lidiku lyobutima bwibwe.

²⁹Yiki nikyo kidieli kyomundu mudamano ki twulanga ku Nyasaye, Miyandu gya Nyasaye ya laga kuye.