Read lulogooli Ayubu 24 Bible Online

Ayubu 24 - lulogooli bible

Ayubu 24

¹Kigira ki Wanyala Vyosi si a vika tsinyinga? Na kigira ki yavo ava mu manya si va lola madiku gege?

²Va veye ho yavo ava twulidzanga tsinzako; Va hilanga vyayo vyamagondi nekirage, va vyayanga.

³Va hila isukiri yavabisandu; Va vugula ing'ombe yomukunzakali kihambavayi.

⁴Va girunkannya mudambi a twule ku inzira: Avadaka velirova vivisa avene.

⁵Henza, lugano lwetsisukiri tsyomwigendanyama Tsi twulanga kutsia mu miyinzi gyavo, ni tsiyenya vyokulia netsingulu; Ligendanyama li tsi hedzanga vyokulia vyevimoli vyatsyo.

⁶Tsi gesanga ubuswage bwatsyo mu milimi; Na tsi dolanga mazabibu gang'alika gavadamano.

⁷Tsi gonanga budiku bei kyahonyo bugira tsingubo, Si tsi veye nekyokwifuma mu bukindu.

⁸Tsi kindiriye netsingeregeridza tsyo mu vigulu, Na tsi hambani nolwanda kigira tsi daki kyokwekinga.

⁹Va veye ho yavo ava twulidzanga avabisandu ku tsimbeere netsingulu, Nokuvugula kihambavayi kyavadaka;

¹⁰Kuduka va gende yiyi na yiyi kyahonyo bugira tsingubo, Na kigira inzala va hilanga miganda gobuswage.

¹¹Va lomberanga maguta mugati mwetsingaga tsyavo; Va duvaganga vyokumina iwaini vyavo, nokusalira nobuluhu.

¹²Avandu va kenyanga kutwula mu lidala li veye navandu vanyingi, Nomwoyo gwatumitwa gu kupanga lwanga: Halala na yaga Nyasaye si ya validza yaga kuva ubusiru.

¹³Yavo va veye mu yavo avebaala ku bulavu; Si va manya tsinzira tsyabwo, Kandi si va menyanga mu tsinzira tsyabwo.

¹⁴Mulumindi a vukanga mabwebwe; Yiitanga avadaka navadambi; Mbudiku a veye kuli mwivi.

¹⁵Kandi imoni yomuheyi i lindanga inyinga ya isi i ling'aling'ana, Nokuvola, Si ha veye na imoni i ndola: Na a girunkannya ligonda lilye.

¹⁶Va hudula tsinyumba isi nimwami: Vehanira inyinga yombasu; Si va manya ubulavu.

¹⁷Kigira umugamba gu gweyi kuli kiriri kyelikudza kuvo vosi; Kigira va manya vyokutihidza vyekiriri kyelikudza.

¹⁸Uyu a veye netsimbiru igulu mmoni mwamadzi; Kidieli kyavo ki laameywi mu lirova: Si va girunkana ku inzira yemilimi gyomuzabibu.

¹⁹Kimeyi noluya vi kaminya amadzi mabofu: Ni ndiyo Kihadisi ki kaminya avobwoni

²⁰Inda ya mwivula i la mwivirira; Eng'ende i la mu lia, nokulola bunolu; A la vula kwidzulitswa kandi; Ubukyamu bu la vunanywa kuli musala.

²¹A litsanga vagumba va vula kwivula, Na si a kolera mukunzakali bulahi.

²²A kwesanga nokutwulidza avobunyali netsingulu tsitsye: A vukanga na si ha veye nomundu welivamwoyo lilye li veye nemirembe.

²³Nyasaye a haana kuvo kuva mu mirembe na va sosanga mugyo; Netsimoni tsitsye tsi veye igulu wetsinzira tsyavo.

²⁴Va nenehidzwa; ha tigaya hakekeke, va mali kutsia; Yee, vikidzwa hasi, va twulidzwa ku inzira kuli avandi vosi, Va geswa kuli mitwe gyobuswage.

²⁵Ni ga ta li kuli mbolanga kalunu ni bwaha u nkalagira mbeye mubehi, Nokukola livola lyange kuva lya vutswa?