Read lulogooli Ayubu 28 Bible Online

Ayubu 28 - lulogooli bible

Ayubu 28

¹Ligali bu veye ho bogo bwefetha, Nobugono bwethahabu ya va siya isiyeveywi.

²Kivya ki twulidzangwa mwirova, Na mugasa gu salulangwa kutwula mmagina.

³Mundu a lomberanga kisundi lwako, Nokuhenzeridza kuduka ku lwako lwe hale, Magina gekisundi kinene na gekiriri kyelikudza.

⁴A hudulanga bogo ihale wavandu va menyanga Avekirenge kivirira; Va sungwa ihale navandu, va sung'anananga yiyi na yiyi.

⁵Ku makuva gelirova, vyokulia vi twulanga mulyo; Na isi walyo li tung'aminyangwa kuli likola lyomuliru

⁶Magina galyo ga veye ho kunyola isafiro, Kandi li veye nolugukyi lwethahabu.

⁷Inzira yeye si ha veye nelinyonyi lilulu lya gi manya, Kandi imoni yekinamwende i kikiri kugilola:

⁸Tsinyama byoluyai bi vuli kusena ku Kandi king'ang'a kilulu ki kikiri kuvita ku.

⁹A nyira mukono gwigwe kuguvika ku lwanda ludinyu; A tung'aminya vigulu kuduka ku vitinya.

¹⁰Yatanyanga migerera hagati ho lwanda; Na imoni yeye i lolanga kindu sa kilala ki veye nobuguli budinyu.

¹¹A bohanga migera gyi vuli kuvita; Na kindu kya viswa a ki letanga mu bulavu.

¹²Navutswa ubugeeri bu la nyoleka haliha? Na hango helimanya ha veye haliha?

¹³Mundu si a manya ubuguli bwalyo; Kandi si li nyoleka mu lirova lya va veye mwoyo.

¹⁴Luliva lu vola, Si li veye mu inze mba Na inyanza i vola, Si li veye muinze mba.

¹⁵Si li nyala kunyoleka nethahabu, Kandi ifetha si i la gerwa kuva liduka lyalyo mba.

¹⁶Si li la gerwa ku ithahabu ya Ofiru mba, Kinga ku iberulo yobuguli budinyu kinga ku isafiro.

¹⁷Ithahabu na vyeloleru si vi nyala kuleng'anywa kulyo, Kandi likeranywa lyalyo si li la va ku viju vyethahabu isiyeku mba.

¹⁸Vigege vyomu nyanza, nolulu si vi la talwa mba: Yee, buguli bwobugeeri bwa vita ubuguli bwamagina makanyu.

¹⁹Itopazi ya Ethiopia si i nyala kuleng'anywa kubwo, Kandi si bu la gerwa ku ithahabu isiyeku.

²⁰Kunangwa ubugeeri bu twula haliha? Na hango helimanya ha veye haliha?

²¹Kigira bu viseywi ku tsimoni tsya vosi ava veye mwoyo, Kandi bwivisi ku manyonyi gombwerefu.

²²Bwoneku na Likudza vi vola, Ku huliye limonya lyabwo na amatu getu.

²³Nyasaye a manya inzira yabwo Kandi a manya hango habwo.

²⁴Kigira uyu a henzanga kali ku tsindulu tsyelirova, Nokulola isi weligulu lyosi;

²⁵Kuduka kulombera imbuudza kyokugera Yee, a geranga amadzi ku kigero.

²⁶Lwa ya lomba lilaga ku imbula, Kandi inzira ku luheni lwaihirigana;

²⁷Hene yaho uyu ya lola nokwilwadza makuva gavyo; Ya vi dinyeridza, yee, nokuviliguula.

²⁸Na ya volera mundu makuva yaga, Henza, kutia Yahova, nibwo ubugeeri; Nokutwula ku budamano nilyo limanya.