Read lulogooli Ayubu 29 Bible Online

Ayubu 29 - lulogooli bible

Ayubu 29

¹Na Ayubu ya tsitsagil'la nolugano lwilwe, na a vola,

²Nkano nda li kuli wa nda li mu myeli gya kale, Kuli wa nda li mu madiku ga Nyasaye ya mbenzanga;

³Lwa itaya yeye ya ng'ereng'ana ku mutwe gwange, Nomu kisundi nda genda ku inzira yobulavu bwibwe;

⁴Kuli wa nda li mu lidukidza lyamadiku gange, Lwa gaviswa ga Nyasaye ga li ku lihema lyange;

⁵Lwa uyu Wanyala Vyosi ya li na kikiri halala ninze Navana vange va nkumbiridzanga;

⁶Tsinyinga yitsyo tsinduvatiru tsyange tsyogidzangwa namaguta, Na lwanda lwa tsuka ku inze migera gyamaguta

⁷Lwa nda twulanga kutsia mu kiribwa mu lidala, Lwa nda lomba intebe yange mu lihasi,

⁸Avasoleli va ndola ni vivisa, Navasakulu va singirira;

⁹Avanene va kiring'ana, Nokuvika makono gavo kuminwa gyavo;

¹⁰Myoyo gyavakulundu gya kiring'ana, Netsinimi tsyavo tsya banda mu vikalakula vyavo.

¹¹Kigira lwa gutu gwa mbulira, gwa ngasidza; Na imoni lwa ya ndola, ya ndolekidza;

¹²Kigira nda konya avadaka ava hanzuka ku inze Kandi mbisandu, wa li bugira mukonyi.

¹³Ligasidza lya uyu wa li ahimbi kudiva lya duka ku inze; Nomwoyo gwomukunzakali nda gu kola gwimbe nobusangali.

¹⁴Ndivika ubulungi, nabwo bwa nkunika: Ubulungi bwange bwa li kuli ijoho na igudwa.

¹⁵Nda li tsimoni ku mboku, Nda li virenge ku mulema.

¹⁶Nda li dada ku mudambi: Na makuva ga uyu wa nda vula kumanya ndizodza.

¹⁷Kandi nda vunannya tsisaya tsya va ta li avalungi, Nokunula vilanye mmino gege.

¹⁸Hene yaho nda vola, Inze nda kudzira mu inyumba yange Na nda meda amadiku gange kuli umuyeke:

¹⁹Kitinya kyange ki tsitsagililanga kuduka mu madzi Na lime li menyanga ubudiku bei ku tsisya tsyange:

²⁰Ubukumi bwange bu kikiri buvisi mu inze, Na buta bwange bwirani kuva ubuhya mmukono gwange.

²¹Avandu va tegidza amatu kumbulira, nokulinda, Va kiring'ana va duke kuhulira livola lyange.

²²Si va vola kandi inyima welihulira amakuva gange; Na livola lyange kugwa kuvo.

²³Va nindirira kuli va lindiriranga imbula; Va kunula minwa gyavo ligali kuli ku imbula yolunyirira.

²⁴Na ndimwenyera kuvo lwa va vula kuva nelisuuvira: Na ubulavu bweligondo lyange si va bu sikisa hasi mba.

²⁵Nda tovola inzira yavo, ndikala kuli munene, Ndikala kuli mwami mu lihe, Kuli mulala u leminyanga ava syomanga.