Read lulogooli Ayubu 3 Bible Online

Ayubu 3 - lulogooli bible

Ayubu 3

¹Inyima wa yaga Ayubu ya kunul munwa gwigwe, nokulaama lidiku lilye.

²Na Ayubu ya tivula, na a vola:

³Lidiku lya ndivulwa mu li dive, Kandi ubudiku bwa haana ma kuva yaga, Mwana muyai u verekeywi.

⁴Lidiku yilyo li ve kisundi; Nyasaye u veye igulu a vule kulivalidza, Kandi ubulavu bu vule kung'ereng'ana kulyo.

⁵Li ve kisundi, ne kiriri kyelikudza ki li vugule li ve lyakyo; Lilesi li menye kulyo; Vyosi vi kolanga lidiku kuva kisundi vi li tihidze.

⁶Ku makuva gobudiku yibwo, ga gumirwe nekisundi kinene: Bu ta sangala mu madiku gomuhiga; Bu ta vikwa mu livalidzwa lye myeli.

⁷Henza, ubudiku yibwo bu ve ubwere; Mwoyo gwobusangali gu ta va mulyo.

⁸Ava laama amadiku va li laame, Avetegeki kuvukidza leviathani.

⁹Tsing'ereng'ani tsyomugolova gwatsyo tsi ve kisundi: Bwenye ubulavu, navutswa bu vule kunyola; Kandi bu ta lola vigohe vyomu gamba:

¹⁰Kigira si bwa hana miliango gye nda ya mama wange, Kandi si bwa visa lidambidzwa ku tsimoni tsyange.

¹¹Kigira ki nda vula kukudza mu litwula munda? Kigira ki mwoyo gwa vula kutwula lwa nda twula munda?

¹²Kigira ki masigamo ga mbugula? Kinga maveere, kigira ki ga mbugula kuduka kununa?

¹³Kigira nkano nda gona hasi nokwehodzeridza; Nkano nda gona tsindolo; nokunyola lisosa,

¹⁴Halala navami navavoli velirova, Yavo aveyombakira aha veye hatswa;

¹⁵Kinga halala navanene ava li nethahabu, Avizulitsa tsinyumba tsyavo ifetha:

¹⁶Kinga kuli inda ya tadza ya vula kuduka ku inyinga yayo, nda vula kuva ho; Kuli avana vadoto va vula kulola ubulavu.

¹⁷Ha zana vadamano va leka lidambidza. Ha zana kandi avaluha va sosanga.

¹⁸Ha zana avahambe velemeridzahalala Si va huliranga mwoyo gwomu singiriri.

¹⁹Avanene navakekeke va veye yo: Na mutugwa a bohololwa ku munene wewe.

²⁰Kigira ki uyu u veye mu kivi a hebangwa ubulavu, Na yavo ava veye nelitsunwa va hebangwa livamwoyo;

²¹Avenyanga likudza, navutswa si va nyolanga mba; Va yavanga va duke kulinyola kuvita lyenya ubutugi bwa viswa;

²²Ava sangalanga ligali, Nokuyanza lwa va dukanga mki lindwa?

²³Kigira ki umundu wenzira yeye ya viswa a hebangwa ubularu, Mundu wa Nyasaye ya kumbiri dza kuye lwevo?

²⁴Kigira likenya lyange li dukanga ni nkikiri kulia kindu, Na lifuuma lyange li tsukeywi kuli amadzi.

²⁵Kigira aga ntidzanga ga duki ku inze. Na ga ntihidzanga ga duki ku inze.

²⁶Inze si ndolanga bwelemeridzi mba, kinga lyehodzeridza, kinga ubusosi; Navutswa kivi kidzanga.