Read lulogooli Ayubu 30 Bible Online

Ayubu 30 - lulogooli bible

Ayubu 30

¹Navutswa kalunu yavo va veye avakekeke ku inze va nkolera kihenyahenye Ava inze nda lega avadada nokusula kuvavika halala netsimbwa tsyekyayo kya magondi gange.

²Yee, tsingulu tsyamakono gavo, tsi la nkonya na ki? Avandu ave mihiga midukiru gya diva.

³Vang'aba kigira ubudambi ne nzala; Va gugunanga kivala kyumu, mu tsinyinga tsye kisundi kya ha tswa nekyanyi

⁴Vihanga militu himbi ku misala mikekeke; Na imiri gyamanyunya gyi veye vyokulia vyavo.

⁵Va kungangwa va twule mu vandu; Navo va va kupiranga uluku kuli va kupiranga umwivi.

⁶Va menyanga mu lubwa lwa mavona Nomu luhangaywa lwelirova no mu magina.

⁷Va kupanga lwanga kuli isukiri mbulimu; Va vungidzangwa isi wemisala gyobulungi.

⁸Va vene avana vavasiru, yee, avana vavadamano; Va kuywa netsinkova va twule mukivala yikyo.

⁹Na inze, kalunu ngwiye lwimbu lwavo, Yee, ngwiye lugano kuvo.

¹⁰Va ndunyiranga, viyahuye ku inze, Na si va leki kuntudzira amate mmoni.

¹¹Kigira uyu u boholoye umugoye gwigwe, nokumbika ku kivi; Navo va boholoye lijamu imbiri wange.

¹²Ku mukono gwange mulungi kiduma ki vukanga; Va lumbanga virenge vyange vi tsie haluvega, Va singeridza tsinzira tsyavo tsyobwoneku ku inze.

¹³Vononnyanga inzira yange, Va medanga kivi kyange, Avandu va ta li nomukonyi.

¹⁴Vadzanga ku inze kuli ava vitanga ha hudulwa hagalamu; Hagati hekyanyi va ntwuliranga.

¹⁵Vyokutihidza vi girunkanyeywi vi duke ku inze; Va londereranga luyali lwange kuli kihudzudzi; Lihonywa lyange li viti kuli lilesi.

¹⁶Na kalunu mwoyo gwange gu tsukeywi mu inze Madiku gobusaliri ga ng'umeywiligali.

¹⁷Inyinga yobudiku vigumba vyange vi tumitangwa mu inze, No busaliti zana bu ngugunanga, si bu sosanga mba.

¹⁸Ku bunene bwetsingulu tsyobu lwaye ingubo yange yoneki; Bu mboha kuli ligoti lya ikanzu yange.

¹⁹U ntuuye mbudohi, Na ngwiye kuli lugukyi neligoke.

²⁰Nzaniranga ive, na ive si u bugiriranga mba: Nsingira, na ive u mbenzerera.

²¹U girunkani kuva wekirage ku inze; U ndambidzanga netsingulu tsyomukono gugwo.

²²U ng'inganga igulu kuduka mu imbuudza, u nyinnyanga kuyo; Na u nsalulukidzanga mu kihi.

²³Kigira manya u la ndeta kuduka mu likudza Noku inyumba ya lomberwa avelivamwoyo vosi.

²⁴Navutswa mundu mu ligwa lilye si a la nyira mukono? Kandi mu kivi kikye si a la kupa lwanga kigira yaga?

²⁵Si nda lira kigira uyu u veye mu kivi? Mwoyo gwange si gu vererera kigira vadambi?

²⁶Lwa ndenya bulahi, ma ubuda mano bwa duka; Na lwa nda lindira ubulavu, kisundi kya duka.

²⁷Amala gange ga gadudanga, na si ga lekeranga mba; Amadiku gekivi ga duki ku inze.

²⁸Ng'endanga ni syoma bugira kuva neliuva: Nsingiye mu livugana, nokwanira nyole mukonyi.

²⁹Inze mbeye amwavo wevibwe Mbeye wakye wamahudo.

³⁰Ligodo lyange li veye limwamu, na li tu uli ku inze Vigumba vyange vi sambeywi no uluya.

³¹Kigira yaga ubukana bwange bu girunkannyeyui kuva lisyoma, Nelilere lyange li girunkannyeywi kuva mwoyo gwa yavo ava liranga.