Read lulogooli Ayubu 36 Bible Online

Ayubu 36 - lulogooli bible

Ayubu 36

¹Kandi Elihu ya tsitsagil'la, nelivola,

²Wekudzira hakekeke, nda ku mannya; Kigira nkikiri nelya mbola kigira Nyasaye.

³Nda leta limanya lyange kutwula ihale, Na nda vole ku Mulombi wange a veye nobulungi.

⁴Kigira nageligali amakuva gange si ga veye agobubehi mba: Mulala u veye mudukiru mu limanya a veye halala nive.

⁵Henza, Nyasaye a veye wobunyali, na si a leganga mundu kali mulala: A veye nobunyali mu tsingulu tsyelimanya.

⁶Si a lindanga livamwoyo lyavadamano mba Navutswa a hedzanga avadambidzangwa ubulungi.

⁷Si a twulidza tsimoni tsitsye ku lihenza valungi: Navutswa halala navami ku tsintebe A va vikanga madiku gosi, navo vidzominyangwa.

⁸Ni va va ni va bofwa viboheru Nokugumirwa mu migoye gyelidambidzwa

⁹Hene yaho a va manyanga miyinzi gyavo, Na mahyolo gavo, kuli va kola noluyai.

¹⁰A kunulanga amatu gavo ku lyegidzwa Nokuvalaga virane kutwula ku ubwoni.

¹¹Ni va hulira nokumutumekira Va la tsitsagil'la madiku gavo mu ligasidzwa Nemihiga gyavo mu vindu vi yanzidzanga.

¹²Navutswa ni va vula kuhulira, va dividzwa nekivavi, Na va la kudza bugira limanya.

¹³Navutswa yavo ava vula kutia Nyasaye mu myoyo gyavo va vika akiba yo butima: Si vanira mukonyi lwa a va bohanga.

¹⁴Va kudziranga mu busoleli Na livamwoyo lyavo li diriranga mu vadamano.

¹⁵A honyanga uyu u nyankananga ku inzira yekivi kikye, A kunulanga amatu gavo lwa va dambidzangwa.

¹⁶Yee, nkano ya kwimirira kutsie ihale na kivi Kuduka hagalamu, ha ta veye haminiku; Ni kya vikwa ku meza yoyo ki la va kiyagayagu.

¹⁷Navutswa wizuye likalagwa lyavadamano: Likalaga nobulungi vi ku gumiye.

¹⁸Kigira ubutima bu veye ho, u gelihe gase u la hilwa ihale nobuhinda bubwo; Kandi u ta bugirira ubunene bwemitungu bu ku girunkanya.

¹⁹Ubutugi bubwo bu la duka Kinga tsingulu tsyosi tsyobunyali bublvo u vule kuva mu kivi?

²⁰U ta kayirwa ubudiku, Lwa avandu va dividzwa mbugono bwavo.

²¹Welinde, u vule kuhenza ubudamano: Kigira u tovoye yibu kuvita kutovola kivi.

²²Henza, Nyasaye a kolanga agobukumi netsingulu tsitsye: Ni bwaha u veye mwegidzi kuli uyu?

²³Ni bwaha wa mu laga inzira yeye? Kinga ni bwaha u nyala kuvola, Ive u kolanga ga ta li bulungi?

²⁴Widzulitse u duke kwidzominya miyinzi gyigye, Gyavandu va yimbira.

²⁵Avandu vosi va gyi loli; Avandu va gyi lolera ihale.

²⁶Henza, Nyasaye a veye munene, si ku mu manya mba Livalidza lyemihiga gyigye si linyoleka mba.

²⁷Kigira a kwesanga tsingeregeridza tsyamadzi, Tsi tonyatonyanga mu imbula kutwula lilumbe lilye

²⁸Ya malesi ga kupidzanga Nokutonyatonya ku vandu ubunyingi bwayo.

²⁹Yee, mundu ku vosi a nyala kumanya lilanda lyamalesi Lihirigana lyamahema gege?

³⁰Henza a vagala ubulavu bwibwe kukumbiridza tsimbega tsyosi; Na a kunikanga lirova isi wenyanza.

³¹Kigira a kalagiranga avandu ku yivi; A haananga ubunyingi bwevyokulia.

³²A kunikanga makono gege noluheni, Nokululaga ha lu kupa.

³³Mwoyo gwalwo gu letanga makuva gege Nemitugu gyi letanga makuva gekihi kidzanga.