Read lulogooli Ayubu 37 Bible Online

Ayubu 37 - lulogooli bible

Ayubu 37

¹Yee, mwoyo gwange gu degeranga ku yaga, Na gu twulidzwa mbugono bwagwo.

²Mu hulire, O mwinye, liyoga lyomwoyo gwigwe, Na lihirigana li twulanga mu munwa gwigwe.

³A li tumanga li tsie isi weligulu lyosi, Na luheni lulwe lu duka ku kiheri kyelirova.

⁴Inyima walwo mwoyo gu hirigananga; A hirigananga nomwoyo gwobunene bwibwe; Na si ya gayanga ha mwoyo gwalwo gu hulirangwa.

⁵Nyasaye a hirigananga neligennya lyomwoyo; A kolanga vindu vinene, vya ku ta nyala kumanya.

⁶Kigira a volera likonza, U gwire ku lirova Ni ndiyo tsingeregeridza tsyembula Na tsingerengeridza tsyembula yeye inene.

⁷A vikanga muhuri ku mukono gwomundu sa mulala, Avandu vosi ava a lombi va duke kumanya likuva yili.

⁸Hene yaho tsinyama tsi tsitsanga ho kwivisa, Tsi menyanga mu tsimpangaywa tsyatsyo.

⁹Kihi ki twulanga mu tsinyumba tsya kusini, Na ubukindu bu twulange kasikasini.

¹⁰Na magina gembula ga letangwa nomwika gwa Nyasaye; Na ubuvambalalu bwamadzi manyingi bu minangwa.

¹¹Yee, a dwikanga malesi maliduhu musigo gwamadzi; A landidzanga lilesi lyoluheni lwilwe:

¹²Li girunkannyangwa yiyi na yiyi nelyemirira lilye, Ga duke kukola gosi aga ya laga Ku mmoni mwelirova li veye navandu.

¹³Ni i va ga veye ku lihonywa, kinga kigira kivala kikye Kinga kigira tsimbabasi, a duke kugaleta.

¹⁴U hulire yaga, O Ayubu: Singira, u ganagane miyinzi gyokugenya gya Nyasaye.

¹⁵U manya kuli Nyasaye a gyi laganga, Nokukola uluheni lwelilesi lilye li ng'ereng'ane?

¹⁶U manya kuli amalesi gedungereridzangwa, Miyinzi gyokugenya gya uyu mudukiru mu limanya?

¹⁷Ive wetsingubo tsitsyo tsi veye noluya Lwa lirova lyehodzeridzanga kigira imbuudza yekusini?

¹⁸U nyala kulandidza ligulu halala naye, Li veye netsingulu kuli kyelolero kyokusalulwa?

¹⁹U kwegidze nelikuva ki lya ku mu volera; Kigira si ku nyala kulomba livola lyetu kigira kisundi.

²⁰A volerwe inze nyenya kuvola? Kinga ga dukira mundu a kayirwe limirwa?

²¹Na kalunu avandu si va lola ubulavu bu ng'ereng'ananga mwigulu; Navutswa imbuudza i vita, nokuvatakasa.

²²Kasikasini i lolekanga bung'ereng'anu kuli bwethahabu: Nyasaye a vikangwa ubunene bwokutihidza.

²³Ku makuw ga Wanyala Vyosi, si ku nyala kumidera: A veye munene mu tsingulu; Nomu likalaga nobunyingi bwobulungi a la vula kudambidza.

²⁴Kigira yaga avandu va mu tidzanga: Si a henzanga avobugeeri mu myoyo.