Read lulogooli Ayubu 39 Bible Online

Ayubu 39 - lulogooli bible

Ayubu 39

¹U manya inyinga yelivula lyetsimbuli tsyombulimu tsi veye kulwanda? Kinga u nyala kuvola inyinga yelivula lyetsimbongo?

²U nyala kuvalidza myeli gya tsi dukidza? Kinga u manya inyinga yelivula lyatsyo?

³Tsinamanga, nokwivula avana vatsyo, Tsi tedzanga kivi kyatsyo.

⁴Avana vatsyo va veye mu liva lilahi, va virukanga mwigendanyama; Va tsitsanga, na si virananga kandi mba.

⁵Ni bwaha wa tuma isukiri yombulimu i tsie imboholole? Kinga ni bwaha wa gi boholola viboheru vyesukiri vyombulimu?

⁶Ya nda lomba inyumba yeve kuva ligendanyama, Nekivala kyomunyu ki veye ubumenyo bwayo?

⁷I leganga muliviti gwelidala, Kandi si i huliranga liyoga lyomugendidzi.

⁸Buvambalalu bwevigulu bu veye kyayiru kyayo Yenyanga vivisi tsingano tsyosi

⁹Imbogo i la bugirira kukutumekira? Kinga i la menya himbi nomulinga gugwo?

¹⁰U nyala kuboha imbogo nekiboheru kyayo mu tsinkumbi? Kinga i la ku limira mavona?

¹¹U la gi suuvira kigira i veye natsingulu tsinyingi? Kinga u la gi lekera linyankana lilyo?

¹²U la suuvira i la leta ubugutsa bubwo mu inyumba, Nokuvungidza ubuswage bwolodze lulwo?

¹³Tsimbaha tsyelihudo tsi godzagiranga; Navutwa amabaha galyo nemilu gyalyo gi veye netsimbabasi?

¹⁴Kigira li lekanga amabuyu galyo ku marova, Nokugahyuhidza mu lugukyi,

¹⁵Na liviriranga namusia kirenge ki la gatanya, Kinga inyama yomwigendanyama i la ga duvaga.

¹⁶Li koleranga avana valyo ubudinyu, kuli ava ta li avalyo: Kali miyinzi gyalyo ni gyi veye gya vutswa, si li veye nobutii;

¹⁷Kigira Nyasaye wa liima ubugeeri, Kandi si ya li ha limanya.

¹⁸Inyinga lyeginganga igulu lyene, Li leganga iparasi na uyu wa nina ku.

¹⁹Ive wa ha iparasi tsingulu tsyavo? Nive wa vika ku ligoti lyayo ulusuywa?

²⁰Nive wa gi lomba i buluke kuli isigi? Ubukumi bwelisiala lya amolo gayo bu tihidzanga.

²¹I kutanga hasi mu livona, nokusangalira tsingulu tsyayo: I twulanga kutsia kuvugana navandu va vikwa vyuma.

²²I koleranga ubutii kihenyahenye, si i genyanga mba Kandi si girananga inyima kigirakivavi mba.

²³Ulwula lu kupagananga kuyo, Na lusaka lwang'ereng'ana, nelitimu.

²⁴I mira lirova nobululu bwayo nobutima; Kandi si i suuvira gu veye mwoyo gwekisiliva.

²⁵Inyinga kisiliva ki lanoiriranga i volanga, Aha I huliranga amalusu gobulwani ni bu veye ihale ligali. Muliviti gwavanyampara, neliyoga.

²⁶Live li bulukanga igulu nobugeeri bubwo, Nokunyira tsimbaha tsyalyo ku luvega lwa kusini?

²⁷Indidzu i ninanga igulu kigira lilaga lilyo, Nokulomba kyalira kyayo igulu ligali?

²⁸I menyanga igulu wolwanda, nayo i veye nobumenyo yo, Ku intongi yolwanda, kandi li veye impinga yayo.

²⁹Ha zana yaho i loleranga ho vyoluhedzi; Tsimoni tsyayo tsi lolanga ihale ligali.

³⁰Avana vayo va nunanga masahi: Na ha aviitwa va veye, niho ha i veye.