Read lulogooli Zaburi 106 Bible Online

Zaburi 106 - lulogooli bible

Zaburi 106

¹Mwidzominye Yahova. Mu santidze Yahova; kigira a veye mulahi; Kigira tsimbabasi tsitsye tsi veyeho mihiga nemihiga.

²Ibwaha u nyala kuvola vikolwa vinene vya Yahova, Kinga kulang'aminya lidzominywa lilye lyosi?

³Va veye nobugasu ava gumira likalaga lilungi Na uyu u kolanga ubulungi tsinyi nga tsyosi.

⁴O Yahova, u nzidzulitse netsimbabasi tsya u haananga ku avandu vovo U mbenze nobuhonnyi bubwo.

⁵Nduke kulola ubulahi bwavatovole vovo Nduke kusangala nobuyanzi bwehiri yoyo, Nokwidzominya halala nemiya ndu gyigyo.

⁶Ku koli ubwoni halala navadada vetu, Kwoni na ku koli ubudamano.

⁷Vaguga vetu si va mannya vikolwa vivyo vyokugenya mu Egepeti; Si vidzulitsa ubunyingi bwetsimbabasi tsitsyo, Navutswa vebaalira ha inyanza, kali ha Inyanza Inzakanyu.

⁸Navutswa ya va honnya kigira lieta lilye, A duke kulang'aminya ubunene bwetsingulu tsitsye.

⁹Ya gondokera Inyanza Inzakanyu kandi, na ya kama: Na ndiyo ya va gendidza hagati henyanza kuli mu kivala kyumu.

¹⁰Na ya va honnya ku mukono gwa uyu wa va dunyira, Nokuvananula ku mukono gwomusigu.

¹¹Na amadzi ga kunika avasigu vavo; Kali mulala kuvo si ya tigala mba.

¹²Ma va suuvira makuva gege; Vimba tsyokumwidzominya.

¹³Kandi bwangu vivirira miyinzi gyigye; Si va lindirira livola lilye,

¹⁴Navutswa va li ni va kayirangwa ligali mwigendanyama, Na va geridza Nyasaye lwa va mu kyangalangwi.

¹⁵Na a haana kuvo kya va mu teva, Navutswa ya kola myoyo gyavo kuva ming'afu.

¹⁶Va li nembodoka ku Musa mu busosi bwavo, Noku Haruni mutakatifu wa Yahova.

¹⁷Lirova lyadika nokumira Dathan, Kandi lya kunika kiduma kya Abiram.

¹⁸Na muliru gwaadukidzwa mu kiduma kyavo; Ulumemo lwa samba avadamano yavo.

¹⁹Va lomba kifuananyi kyekimoli ha Horebu, Na va sigamira kifwananyi kyobu nyinda.

²⁰Na ndiyo va girunkannya ubukumi bwavo Kuva kifwananyi kyeng'ombe yayanga bunyasi.

²¹Vivirira Nyasaye Muhonyi wavo Uyu wa va kolera vindu vinene mu Egepeti,

²²Miyinzi gyobugenyi mu kivala kya Ham, Na vindu vyokutihidza ha Inyanza Inzakanyu.

²³Kunangwa ya vola a la va dividza Na a ta li Musa mutovole wewe ya singira ha huduka imbiri wewe, Kugirunkannya ubutima bwibwe gase a la ra dividza.

²⁴Yee, va lega kivala kilahi, Si va suuvira likuva lilye,

²⁵Navutswa va monya mu mahema gavo, Na si va hulira mwoyo gwa Yahova.

²⁶Kunangwa ya ginga mukono gwigwe kuvo, Kuvononnya mwigendanyama,

²⁷Nokwononnya visukululwi vyavo mu tsihiri, Nokuvasalannya mu vivala.

²⁸Vehambannya na Baalpeoru, Na va lia visyuviriru vyavakudzu.

²⁹Na ndiyo va mu vihiriridza nevikolwa vyavo; Na liduya lya duka kuvo.

³⁰Hene yaho Finehasi ya singira na a kola kyokukalaga; Kunangwa liduya lya lekidzwa.

³¹Likuva yili lya validzwa kuye kuva ubulungi, Kuduka ku makula gosi mihiga nemihiga.

³²Kandi va mu vihiriridza ha amadzi ga Meriba, Kuduka ubudamano bwa gwa ku Musa kigira yavo;

³³Kigira va vihiriridza mwoyo gwigwe, Na a vola neminwa gvigye aga ta li malahi.

³⁴Va vula kudividza avetsihiri, Kuli Yahova ya va laga,

³⁵Navutswa vehambannya navetsihiri Ni vega likola lyavo,

³⁶Na va tumekira vifwananyi vyavo Vya gwa mitego kuvo.

³⁷Yee, viita avayai na avakana vavo kuva visyuviriru ku made mone,

³⁸Na va tahidza amasahi ga ta li nekindu kugo, Kali masahi gavayai vavo navakana vavo, Ava va salisira vifwananyi vya Kanani; Na kivala kyononywa nobuda mano bwamasahi.

³⁹Na ndiyo va nyola ubudamano ku miyinzi gyavo, Na vekola avene kuva avamalaya ku vikolwa vyavo.

⁴⁰Kunangwa ubutima bwa Yahova bwaaka ku avandu veve, Naye ya dunyira miyandu gyigye

⁴¹Na a va vika mu makono gavetsihiri; Navo ava va dunyira vameha kuvo.

⁴²Avasigu vavo kandi va va dambidza, Na va legeridzwa ni va va isi wa makono gavo.

⁴³Hali kanyingi ya va honnya; Navutswa vali nobwebaali mu livola lyavo, Na va gehidzirwa ligali mu mahyolo gavo.

⁴⁴Navutswa ya henza lidambidzwa lyavo, Lwa ya hulira lilira lyavo:

⁴⁵Na ya vidzulira ku lilagana lilye, Na a galuka kuvo kuli ubunyingi bwetsimhabasi tsitsye.

⁴⁶Na ya va kola kuverererwa Imbiri wa yavo ava va lanya.

⁴⁷U ku honnye, O Yahova Nyasaye wetu, U ku vungidze kutwula mu tsihiri, Ku santidze lieta lilyo litakatifu, Na ku guute mu lidzominywa lilyo.

⁴⁸A gasidzwe Yahova, Nyasaye wa Israeli, Kutwula mihiga nemihiga kuduka mihiga nemihiga. Kandi avandu vosi va vole, Amini. Mwidzominye Yahova.