Read lulogooli Zaburi 109 Bible Online

Zaburi 109 - lulogooli bible

Zaburi 109

¹U ta kiring'ana, O Nyasaye welidzominya lyange;

²Kigira munwa gwomudamano, na munwa gwobugadi nigwo gwa va kunuye ku inze: Va mboleye nolulimi lwobubehi.

³Va nkumbiridzi na makuva gobudunyi, Va lwana ninze bugira kivuni.

⁴Ku livayanza lyange va veye avasigu vange: Navutswa inze nzehaana ku lisaala.

⁵Va ndukidzive ubudamano mbugono bwobulahi, Nobudunyi mbugono bwe livayanza lyange.

⁶U vike mundu mudamano igulu kuye; Na musigu a singire ku luvega lwomukono gwigwe mulungi.

⁷Mu likalagirwa lilye, a twule nobudamano kuye; Ieka lisaala lilye li gwe ubwoni.

⁸Madiku gege ga ve makekeke; Ubugono bwibwe wundi a hile.

⁹Avana veve va ve avabisandu Na mukali wewe a ve mukunzakali.

¹⁰Avana veve va gende mu livoyavoya, na va ve avatevi; Kutwula mu hatswa havo va tsie kwenya oyokulia vyauo.

¹¹Welinuula a gumire vyosi vya a veye navyo Na avageni va lanye vyemiyinzi gyigye.

¹²Ha ta va nomundu kumbererera; Kandi ha ta va navokuvererera avabisandu veve.

¹³Visukululwi vivye vi dividzwe; Mu likula li londanga lieta lyavo li twulidzwe.

¹⁴Ubukyamu bwa vaguga veve bwidzulitswe na Yahova; Kandi ubwoni bwa mama wewe bu vule kutwulidzwa.

¹⁵Va ve imbiri wa Yahova kazozo; A heridze lidzulitswa lyavo ku lirova;

¹⁶Kigira si yedzulitsa likolera tsimbabasi, Navutswa ya kupidza kivi mudaka na mudambi, Na uyu wa duvaga mwoyo, a duke kuviita.

¹⁷Yee, Ya yanza ubunyegi, na bwa duka kuye; Si ya yanza ubugasu, nabwo bwa li ihale naye.

¹⁸Yivika ubunyegi kuli ingubo yeye, Nabwo bwingira muye kuli amadzi, Kandi kuli maguta mu vigumba vivye.

¹⁹Bu ve kuye kuli ingubo ya yevika, Kandi kuli ulukova lwa yebohanga kazozo.

²⁰Yaga ga veye madanyi ga yavo avasigu vange ga twulanga ku Yahova, Kandi yavo ava vola ubudamano ku mwoyo gwange.

²¹Navutswa ive u kolera inze, O Yahova Mwami, kigira lieta lilyo: Kigira tsimbabasi tsitsyo tsi veye tsindahi, u mbonnye;

²²Kigira mbeye mudaka na mudambi, Na mwoyo gwange gu veye nolugoma mu mze.

²³Mmali kuvita kuli kiriri ki twulanga: Mbungudzangwa kuli isigi.

²⁴Masigamo gange ga degeranga kigira lihonga lilia; Inyama yombiri gwange iniaye ku ligeha maguta.

²⁵Kandi ngwiye manyego kuvo: Lwa va ndola va sung'usa mitwe gyavo

²⁶U nkonye, O Yahova Nyasaye wange; U mbonnye kuli tsimbabasi tsitsyo:

²⁷Va duke kumanya yigu gu veye mukono gugwo; Ni ive, Yahova u ga koli.

²⁸U va leke kunyega, navutswa ive u gasidze: Lwa va singira va la va isoni, Navutswa mutumekiri wowo a la sangala.

²⁹Avasigu vange va vikwe lilegwa kuli ingubo, Na vekunike avene netsisoni tsyavo kuli ingubo.

³⁰Nda santidza Yahova ligali, nomumwa gwange; Yee, nda mwidzominya hagati hekiduma kinene.

³¹Kigira a la singira ha mukono mulungi gwomudaka, Kumuhonnya ku yavo ava kalagiranga mwoyo gwigwe.