Read lulogooli Zaburi 119 Bible Online

Zaburi 119 - lulogooli bible

Zaburi 119

¹Va veye nobugasu yavo ava veye nobudukiru ku inzira, Ava gendanga mu likalaga lya Yahova.

²Va veye nobugasu yavo ava gumiranga lilolekidza lilye, Yavo ava mwenyanga nomwoyo gwosi.

³Yee, va vula kukola ubu ta li ubulungi; Va gendanga mu tsinzira tsitsye.

⁴Ive u ku lagi megidzo gogo, Ku duke kugagumira netsingulu.

⁵Nkano tsinzira tsyange tsi dinyeridzeywi Kugumira malago gogo

⁶Hene yaho nda vula kuva netsisoni, Lwa mbenza amalago gogo gosi.

⁷Nda ku santidza nomwoyo mulungi, Lwa nzegidza likalaga lilyo lyo bulungi.

⁸Nda gumira malago gogo: O ive, u ta ndeka ligali mba.

⁹Musoleri a la lungekidza ndi inzira yeye? Kugilinda kuli likuva lilyo.

¹⁰Nkwenyi nomwoyo gwange gwosi: U ta ndeka ngendagende ihale ku malago gogo.

¹¹Mbiki makuva gogo mu mwoyo gwange, Mbule kukukolera ubwoni.

¹²U veye nobugasu, O Yahova: U nzegidze amalago gogo.

¹³Na minwa gyange ng'ambi Malago gomunwa gugwo gosi.

¹⁴Nsangali ku inzira yelilolekidza lilyo, Kuli nsangala mu ubuhinda bwosi.

¹⁵Nda ganagana megidzo gogo, Nokuhenza ligali tsinzira tsitsyo.

¹⁶Nda lola amalago gogo kuva manolu: Si ndivirira likuva lilyo.

¹⁷U kolere mutumekiri wowo ubu haani, nduke kuva mwoyo; Na ndiyo nda gumira likuva lilyo.

¹⁸U kunule tsimoni tsyange, nduke kulola Vyokugenya mu itorati yoyo.

¹⁹Mbeye mumenya mu lirova: U ta visa malago gogo ku inze.

²⁰Mwoyo gwange gu duvuki ku lyegomba Lya gu veye nalyo ku malago gogo tsinyinga tsyosi.

²¹U gondokeye avoluyai ava laa meywi, Ava gendagenda ihale ku malago gogo.

²²U twulidze ku inze linyegwa na lilegwa; Kigira ngumiye lilolekidza lilyo.

²³Kandi avanene vikala ni va volerana vyokunkolera; Navutswa mutumekiri wowo ya ganagana malago gogo.

²⁴Kandi lilolekidza lilyo li veye lya nyanza Kandi avelivolerana lyange.

²⁵Mwoyo gwange gu hambana nolugukyi: U mbukidze kuli likuva lilyo.

²⁶Nda vola tsinzira tsyange, na ive wa ntivulira: U nzegidze amalago gogo.

²⁷U nkole kumanya inzira yamegidzo gogo: Na ndiyo nda ganagana miyinzi gyigyo gyokugenya.

²⁸Mwoyo gwange gu saluluki kigira ubuvereri: U mbike tsingulu kuli likuva lilyo.

²⁹U twulidze ku inze inzira yobubehi; Netsimbabasi u mpe itorati yoyo

³⁰Ntovoye inzira yobusuuvirifu: Mbiki amalago gogo imbiri uange.

³¹Mbambana nelilolekidza lilyo: O Yahova, u ta ndegannya mba.

³²Nda nyagula ku inzira yamalago gogo, Lwa u li nenehidza mwoyo gwange.

³³O Yahova, u nzegidze inzira ya malago gogo; Na nda gi gumira kuduka ku kiheri.

³⁴U mbe limanya, na nda gumira itorati yoyo Yee, nda gi gumira nomwoyo gwange gwosi.

³⁵U nkole kugenda ku inzira yamalago gwogo; Kigira nsangalanga mugo.

³⁶U yekidze mwoyo gwange ku lilo lekidza lilyo, Gu ta yeka ku likayirwa.

³⁷U girunkannye tsimoni tsyange tsi vule kuhenza vyavutswa, U mbukidze ku tsinzira tsitsyo.

³⁸U dinyeridze makuva gogo ku mutumekiri wowo, Aga veye gelitibwa lilyo.

³⁹U twulidze ku inze linyegwa lya ntidzanga; Kigira malago gogo ga veye malahi.

⁴⁰Henza, nkayirwe amegidzo gogo; U mbukidze mu ubulungi bu bwo.

⁴¹O Yahova, tsimbabasi tsitsyo tsi duke ku inze, Kali ubuhonnyi bubwo, kuli likuva lilyo.

⁴²Kunangwa nda va ne kya ntivulira uyu u nyeganga; Kigira nsuuviranga likuva lilyo.

⁴³U ta twulidza ligali likuva lyageligali mu munwa gwange; Kigira nindiriye amalago gogo.

⁴⁴Na ndiyo nda gumira itorati yoyo kazozo Mihiga nemihiga.

⁴⁵Kandi nda genda mu ubwiyangu; Kigira nyenyi megidzo gogo.

⁴⁶Kandi nda vola lilolekidza lilyo imbiri wa avami, Na si nda nyola tsisoni.

⁴⁷Ndeyanzidza mwene mu malago gogo, Aga nyanzi.

⁴⁸Kandi nda ginga makono gange ku malago gogo, ga nyanzi; Na nda ganagana amalago gogo.

⁴⁹Widzulitse likuva lilyo ku mutu mekiri wowo, Kigira u nkoli kuva nelisuuvira.

⁵⁰Yili ni kilema mwoyo kyange mu kivi; Kigira likuva lilyo li mbukidzi.

⁵¹Avoluyai va nkoleye kihenyahenye: Navutswa si ngirunkani kutwula ku itorati yoyo.

⁵²Nzidzulitsi amalago gogo ga kale O Yahova, Na nzeleminyi mwene.

⁵³Ubutima bululu bu ng'umiye, Kigira avadamano ava leka ito rati yoyo.

⁵⁴Amalago gogo ga li ku inze tsi nyimbu Mu inyumba yobugeni bwange.

⁵⁵Nzidzuliye lieta lilyo, O Yahova, mbudiku, Na ng'umiye itorati yoyo.

⁵⁶Mbeye na yiki, Kigira ng'umiye amegidzo gogo.

⁵⁷Yahova a veye kidieli kyange: Mboye nda gumira makuva gogo

⁵⁸Nsalanga tsimbabasi tsitsyo nomwoyo gwange gwosi: U mbere tsimbabasi kuli likuva lilyo.

⁵⁹Nda ganagana tsinzira tsyange Na ndirannya virenge vyange ku lilolekidza lilyo.

⁶⁰Nda kola bwangu, na si nda linda gira, Kugumira malago gogo.

⁶¹Migoye gyavadamano gyi nkumbiridzi; Navutswa si nziviriye itorati yoyo.

⁶²Mbudiku hagati nda vuka kukusantidza Kigira amalago gogo malungi.

⁶³Mbeye wakye ku vosi ava ku tidzanga, Na ku yavo ava gumira amegidzo gogo.

⁶⁴Lirova lizuye tsimbabasi tsitsyo, O Yahova: U nzegidze amalago gogo.

⁶⁵U koleye mutumekiri wowo ubu lahi, O Yahova, kuli likuva lilyo.

⁶⁶U nzegidze likalaga lilahi, na limanya; Kigira suuviye amalago gogo.

⁶⁷Lwa nkikiri kusaliridzwa nda gendagenda; Navutswa kalunu ng'umiranga likuva lilyo.

⁶⁸Ive u veye mulahi, na u kolanga ubulahi; U nzegidze amalago gogo.

⁶⁹Avoluyai va ng'inanga: Nomwoyo gwange gwosi nda gu mira megidzo gogo.

⁷⁰Mwoyo gwavo gu komera kuli maguta; Navutswa inze nsangalira mu itorati yoyo.

⁷¹Ga veye malahi ku inze kusaliridzwa; Nduke kwegidzwa amalago gogo.

⁷²Itorati yomunwa gugwo l veye indahi ku inze Kuvita tsielfu tsyethahabu na if etha.

⁷³Makono gogo ga nombi ni ga ndira: U mpe limanya nduke kwega amalago gogo.

⁷⁴Yavo ava tidzanga ive va la ndola, ni va sangala, Kigira nsuuviye likuva lilyo.

⁷⁵Mmanya, O Yahova, likalaga lilyo li veye lilungi, Na u nsaliridzi mu busuuvirifu.

⁷⁶Tsimbabasi tsyobuyanzi tsitsyo, nku saala tsi neminye mwoyo, Kuli likuva lilyo lya wa volera mutumekiri wowo.

⁷⁷Tsimbabasi tsitsyo tsi duke ku inze, nduke kuva mwoyo; Kigira itorati yoyo i veye ubusangali bwange.

⁷⁸Avoluyai va vikwe mu tsisoni; kigira va nzononnyi nobugadi: Navutswa nda ganagana megidzo gogo.

⁷⁹Yavo ava ku tidzanga virane ku inze; Na va la manya lilolekidza lilyo.

⁸⁰Mwoyo gwange gu ve mudukanu mu malago gogo, Mbule kuvikwa mu tsisoni.

⁸¹Mwoyo gwange gu niala ku liyenya ubuhonnyi bubwo Navutswa nsuuvira likuva lilyo.

⁸²Tsimoni tsyange tsi luhi ku liyenya likuva lilyo Lwa mbola, Inyinga ki u la lemi nya mwoyo gwange?

⁸³Kigira nduki kuva kuli imuya mu mwoki; Navutswa si nzivirira malago gogo.

⁸⁴Ga veye ganga madiku gomutumekiri wowo? Inyinga ki u la kola agelikalaga ku vavo ava ndambidzanga?

⁸⁵Avoluyai va nzaviye ubogo, Ava ta veye kuli itorati yoyo.

⁸⁶Amalago gogo gosi ga veye gobusuuvirifu: Va ndambidza nobugadi; u nkonye.

⁸⁷Va li hlmbi kumbiridza ku lirova Navutswa si nda leka megidzo gogo.

⁸⁸U mbukidze kuli tsimbabasi tsyo buyanzi tsitsyo; Na ndiyo nda hulira lilolekidza lyomunwa gugwo.

⁸⁹O Yahova, mihiga nemihiga Makuva gogo ga singeridzwa migulu.

⁹⁰Ubusuuvirifu bubwo bu veye ku visukululwi vyosi: U singeridzi lirova, na li menyanga.

⁹¹Vi menyanga kuli amalago gogo kuduka lero; Kigira vindu vyosi vi veye vyokutumekira ive.

⁹²Itorati yoyo i vula kuva ubusangali bwange Nkano nda diva mu kivi kyange.

⁹³Si ndivirira megidzo gogo mihiga nemihiga; Kigira u mbukidzi nago.

⁹⁴Mbeye wowo, u mbonnye; Kigira nzenyi megidzo gogo.

⁹⁵Avadamano va ng'oneka kundividza; Navutswa nda ganagana lilolekidza lilyo

⁹⁶Mmali kulola kiheri kyobudukiru bwosi; Navutswa lilaga lilyo li veye liga lamu ligali.

⁹⁷Nyanza lilaga lilyo kuduka kanga Mbasu bei li veye tsiganagani tsyange.

⁹⁸Amalago gogo ga medanga ubugeeri bwange kuvita avasigu vange; Kigira ga veye halala ninze kazozo.

⁹⁹Mbeye nelimanya kuvita avegidzi vange vosi; Kigira lilolekidza lilyo li veye lya nganagana.

¹⁰⁰Mmanyeridza kuvita avasakulu, Kigira ngumiye megidzo gogo.

¹⁰¹Ngayidzi virenge vyange ku tsinzira tsyosi tsindamano, Nduke kugumira likuva lilyo.

¹⁰²Si ntwuli ku malago gogo; Kigira ni ive u nzegidzi.

¹⁰³Ga veye manolu ndi makuva gogo mu munwa gwange Yee, manolu kuvita ubwuki mmunwa gwange.

¹⁰⁴Nyola limanya mu megidzo gogo: Kunangwa mbihirirwa tsinzira tsyosi tsyobubehi.

¹⁰⁵Likuva lilyo li veye itaya yevirenge vyange Na ubulavu bwenzira yange.

¹⁰⁶Nzesuhi, kandi ndinyiridzi, Nda gumira malago gogo ma lungi.

¹⁰⁷Nsaleridzeywi ligali: U mbukidze, O Yahova, kuli likuva lilyo.

¹⁰⁸O Yahova, nku goonya u vugule vihaanwa vyomunwa gwange, Na u nzegidze lilagana lilye.

¹⁰⁹Mwoyo gwange gu veye mu mukono gwange kazozo; Navutswa si nzivirira itorati yoyo.

¹¹⁰Avadamano va ntegi mutego; Navutswa si ngoti kutsia halu vega ku megidzo gogo.

¹¹¹Lilolekidza lilyo mbuguye kuva miyandu gyange mihiga gyosi; Kigira li veye lyokusangalidza mwoyo gwange.

¹¹²Nzegidzi mwoyo gwange kukola malago gogo Kuduka mihiga gyosi kali ku kiheri.

¹¹³Ndunyira yavo avemyoyo gyinri Navutswa nyanza itorati yoyo.

¹¹⁴Ive u veye kyokwikinga kyange na ingavo yange: Nindirira likuva lilyo.

¹¹⁵Mu twule ku inze, mwinye ava kola ubwoni, Nduke kugumira amalago ga Nyasaye wange.

¹¹⁶U ndire kuli likuva lilyo, nduke kuva mwoyo; Mbule kuva netsisoni ku lihenzerera lyange.

¹¹⁷U nkonye na nda va nobuhoni, Na nda bugirira amalago gogo kazozo.

¹¹⁸U legi yavo vosi ava gota ku amalago gogo; Kigira ubugadi bwavo bu veye bwavutswa.

¹¹⁹Ive u gotidza avadamano vosi velirova kuli amandu: Kigira yaga nyanza lilolekidza lilyo.

¹²⁰Mubiri gwange gu degeranga kigira ubutii bwokutia ive; Na mbeye nobutii ku likalaga lilyo.

¹²¹Nkoli likalaga lilungi na ubulungi: U ta ndeka ku yavo ava ndambidzanga.

¹²²U ve kihambiriru kyomutumekiri wowo ku ubugasu: U ta leka avoluyai kundambidza.

¹²³Tsimoni tsyange tsi luhi ku lyenya lyobuhonnyi bubwo, Na likuva lilyo lyobulungi.

¹²⁴U kolere mutumekiri wowo kuli tsimbabasi tsyobuyanzi tsitsyo, Na u nzegidze amalago gogo.

¹²⁵Mbeye mutumekiri wowo; u mpe limanya, Nduke kumanya lilolekidza lilyo.

¹²⁶Inyinga i duki ku Yahova kukola miyinzi; Kigira va koli itorati yoyo kuva vutswa.

¹²⁷Kigira yaga nyanza amalago gogo Kuvita ithahabu, yee, kuvita ithahabu indahi.

¹²⁸Kunangwa mbugirira amegidzo gogo gosi ku ryosi kuva ma lungi Kandi ndunyira tsinzira tsyositsyobugadi.

¹²⁹Lilolekidza lilyo li veye lyokugennya; Kunangwa mwoyo gwange gu li gumiranga.

¹³⁰Livuula lyamakuva gogo li leta ubulavu Li hedza avasiru limanya.

¹³¹Nda kunula munwa gwangeligali nokuherana; Kigira nda kayirwa amalagogogo.

¹³²U henze ku inze, na u mbere tsimbabasi, Kuli wa nala kukolera yavo ava yanzanga lieta lilyo.

¹³³U singeridze virenge vyange mu likuva lilyo; Na u ta leka ububi kali bulala kwameha ku inze.

¹³⁴U mbonnye kujlidambidza lya vandu: Na ndiyo nda gurnira amegidzo gogo.

¹³⁵U kole mmoni mumwo kung'ereng'ana ku mutumekiri wowo; Na u nzegidze amalago gogo.

¹³⁶Migera gyamadzi gyi gangulukanga mu tsimoni tsyange, Kigira va vula kubugirira itorati yoyo.

¹³⁷U veye mulungi, O Yahova, Na likalaga lilyo li veye lyobulungi.

¹³⁸U lagi lilolekidza lilyo mu bulungi Nomu ubusuuvirifu bweligali.

¹³⁹Lididikana lyange li mmiranga, Kigira avasigu vange viviriye makuva gogo.

¹⁴⁰Likuva lilyo li siyeywi ligali; Kunangwa mutumekiri wowo a li yanza.

¹⁴¹Mbeye mukekeke na wokulegwa; Navutswa si nzivirira megidzo gogo mba.

¹⁴²Ubulungi bubwo bu veye bwemihiga nemihiga, Na itorati yoyo i veye ageligali.

¹⁴³Ubusaliri na kivi vi ng'umiye; Navutswa amalago gogo ga veye aga nyanzanga.

¹⁴⁴Ubulungi bwelilolekidza lilyo bu menyanga mihiga gyosi: U mpe limanya na nda va mwoyo.

¹⁴⁵Nzaniye ive nomwoyo gwange gwosi; u ntivulire, O Yahova: Nda gumira amalago gogo.

¹⁴⁶Nzaniye ive; u mbonnye, Na nda gumira lilolekidza lilyo.

¹⁴⁷Nda tanga mabwebwe kukupa lwanga: Nda lindirira makuva gogo.

¹⁴⁸Tsimoni tsyange tsya tanga imbiri wobulindi bwobudiku, Nduke kuganagana likuva lilyo.

¹⁴⁹U hulire mwoyo gwange kuli tsimbabasi tsyobuyanza tsitsyo: O Yahova, u mbukidze kuli malago gogo,

¹⁵⁰Vesunda himbi ava londanga ubudamano; Va veye ihale netorati yoyo.

¹⁵¹Ive u veye himbi, O Yahova; Na amalago gogo gosi ga veye ageligali.

¹⁵²Kutwula kale nda manya ku lilolekidza lilyo, Ni ive u li singeridziye mihiga nemihiga.

¹⁵³U henze ubusaliri bwange, na u mbonnye; Kigira si nzivirira itorati yoyo.

¹⁵⁴U mberere ku inkuva yange, na u boholole: U mbukidze kuli likuva lilyo.

¹⁵⁵Ubuhonnyi bu veye ihale navadamano; Kigira si venya amalago gogo.

¹⁵⁶Tsimbabasi tsitsyo tsi veye tsinene, O Yahova: U mbukidze kuli malago gogo.

¹⁵⁷Avadambidzi na avasigu vange va veye vanyingi; Navutsua si ngirunkani kutwula ku lilolekidza lilyo.

¹⁵⁸Nda lola avekirage na mbihirirangwa Kigira va vula kugumira likuva lilyo.

¹⁵⁹U henze kuli nyanzanga megidzo gogo: U mbukidze, O Yahova, kuli tsimbabasi tsyobuyanzi bubwo.

¹⁶⁰Livalidzwa lyelikuva lilyo li veye ageligali; Na malago gogo malungi sa lilala ga veye gemihiga nemihiga.

¹⁶¹Avanene va ndambidzi vutswa; Navutswa mwoyo gwange gu tidzanga makuva gogo.

¹⁶²Nsangalira likuva lilyo Kuli uyu a nyola vilanye vinyingi.

¹⁶³Ndunyiranga na ndeganga ububehi; Navutsua nyanza itorati yoyo.

¹⁶⁴Nkwidzominya hali katano na gaviri ku lidiku lilala, Kigira amalago gogo malungi.

¹⁶⁵Ava yanzanga itorati yoyo va veye nemirembe minene; Na si va veye nekyokwikigitalidza.

¹⁶⁶Mbenzereye ubuhonnyi bubwo, O Yahova, Na ntumekiye amalago gogo.

¹⁶⁷Mwoyo gwange gu gumiye lilole kidza lilyo; Na ndi yanza ligali.

¹⁶⁸Ngumiye megidzo gogo na lilole kidza lilyo; Kigira tsinzira tsyange tsyosi tsi veye imbiri wowo.

¹⁶⁹Lilira lyange li duke imbiri wowo, O Yahova: U mpe limanya kuli likuva lilyo.

¹⁷⁰Lisaala lyange li duke imbiri wowo: U mbonnye kuli likuva lilyo.

¹⁷¹Minwa gyange gyi senuke lidzominya; Kigira ive u nzegidza amalago gogo.

¹⁷²Ululimi lwange lwimbe ulwimbu lwelikuva lilyo; Kigira amalago gogo ga veye gobulungi.

¹⁷³Mukono gugwo gwetegeke kunkonya; Kigira ntovoye megidzo gogo.

¹⁷⁴Mbeye na maholu ku buhonyi bubwo, O Yahova; Na itorati yoyo i veye ubuyanzibwange.

¹⁷⁵Mwoyo gwange gu ve mwoyo, na gu la kwidzominya; Kandi amalago gogo ga nkonye.

¹⁷⁶Ngoti kuli ligondi lya gota; wenye mutumekiri wowo Kigira si nzivirira malago gogo mba.