Read lulogooli Zaburi 139 Bible Online

Zaburi 139 - lulogooli bible

Zaburi 139

¹O Yahova, wideye inze, nokummanya.

²Ive u manya likala lyange na lisingira lyange; Ive u manya tsiganagani tsyange ihale.

³Ive widera inzira yange na ligona lyange, U manya tsinzira tsyange tsyosi.

⁴Kigira si ha veye nelikuva mu lulimi lwange, Navutswa ive O Yahova, u li manya lyosi.

⁵Ive u nkumbiridzi inyima na imbiri, Nokuvika kigalo kikyo ku inze.

⁶Limanya yili li veye lyokugenya kuvita inze; Li veye igulu, si nyala kuduka kulyo mba.

⁷Nda tsia haliha nzavukane ku Roho wowo? Kinga ndirukira haliha kutwula mu mmoni mwumwo?

⁸Ni mba ni nina migulu, ive u veye yo: Ni mba ni nomba kitali kyange mu Kihadisi, henza, u veye yo.

⁹Ni mba ni mbugula tsimbaha tsyomugamba, Nokumenya ku kiheri kyenyanza;

¹⁰Kali ha zana mukono gugwo gu la nzimirira Na mukono gugwo mulungi gu la ngumira.

¹¹Ni mba ni mbola, Ligali kisundi ki la nkunika, Kali ubudiku bu la va ubulavu ku inze;

¹²Kali kisundi si ki nyala kuvisa ku ive, Navutswa ubudiku bu ng'ereng'ana kuli mbasu: Kisundi na mbasu vyombi ku ive vi fwanana.

¹³Kigira ive wa lomba liva lyange lyomusi: Wa nkunika mmunda mwa mama wange.

¹⁴Nda ku santidza; kigira nombwa mu litihidzwa na mu bugenyi: Miyinzi gyigyo gyi veye gyobugenyi; Na mwoyo gwange gu manya yaga ligali.

¹⁵Liva lyange si lya viswa ku ive, Lwa nda lombwa mu buvisi, Nokulombwa nobusidza munda mwelirova.

¹⁶Tsimoni tsitsyo tsya ndola ni nkikiri kulombwa; Na mu kitabu kikyo vivero vyange vya ng'odwa vyosi, Kali madiku aga volwa ku inze, Lwa vi kikiri kuva yo.

¹⁷Tsiganagani tsitsyo ku inze, O Nyasaye, tsi veye tsindahi ligali Livalidzwa lyatsyo li veye linene

¹⁸Ni mbola kulivalidza lyatsyo, tsi veye tsinyingi kuvita umu yeke: Lwa mbuka mbeye halala na ive.

¹⁹Ligali ive u liita avandamano, O Nyasaye: Kunangwa mu twule ku inze, mwinye avamasahi.

²⁰Kigira va vola ku ive mbudamano Na avasigu vovo va tala lieta lilyo vutswa.

²¹Mbule kudunyira yavo ava dunyira ive, O Yahova? Na mbule kukendekera yavo ava vukela ive?

²²Mba dunyira nobudunyi ubudukiru: Va duki kuva avasigu vange.

²³U nzidere, O Nyasaye, u manye mwoyo gwange: U ngeridze, u manye tsiganagani tsyange;

²⁴U mbenze u lole ni i va inzira indamano i veye mu inze, Na u nzimirire ku inzira yemihiga nemihiga.