Read lulogooli Zaburi 145 Bible Online

Zaburi 145 - lulogooli bible

Zaburi 145

¹Ndidzominya ive, Nyasaye wange, O Mwami; Na nda gasidza lieta lilyo mihiga nemihiga.

²Madiku gosi nda ku gasidza; Na ndidzominya lieta lilyo mihiga nemihiga.

³Yahova a veye munene, na wokwi dzominywa ligali; Ubunene bu ibwe si bu nyala kwiderwa.

⁴Likula lilala li lidzominya miyinzi gyigyo ku lindi, Nokulandidza likola lilyo lyetsingulu

⁵Nda ganagana ubwami bwokwidzominywa bwobukumi bubwo, Na ku likola lyobugenyi lilyo.

⁶Na avandu va la vola ku tsingulu tsyelikola lilyo lyokutihidza; Na inze nda landidza ubunene bubwo.

⁷Va la vola lyokwidzulitsa ubulahi ubunene bubwo, Na va limba ubulungi bubwo.

⁸Yahova a veye mulahi na wetsimbabasi; A veye wa galaha ku ubutima, na wetsimbabasi tsinene.

⁹Yahova a veye mulahi ku vosi; Na tsimbabasi tsitsye tsi veye ku miyinzi gyigye gyosi.

¹⁰Likola lilyo lyosi li la ku santidza, O Yahova; Na avatakatifu vovo va la ku gasidza.

¹¹Va la vola ubukumi bwobwami buhwo, Nokuvola tsingulu tsitsyo:

¹²Nokulang'aminya ku avana va avandu likola lilye lyobunyali, Na ubukumi bwobunene bwobwami bwibwe.

¹³Ubwami bubwo bu veye ubwami bwemihiga nemihiga, Na lyameha lilyo li dukanga ku makula gosi.

¹⁴Yahova a singeridzanga yavo vosi ava gwa Na a digulula yavo vosi avina minywa.

¹⁵Tsimoni tsya vosi tsi ku henzerera; Na u va hedzanga vyokulia vyavo ku tsinyinga tsi dukana.

¹⁶U kunula mukono gugwo, Nokwigutidza lyenya lya vyosi vi veye mwoyo.

¹⁷Yahova a veye mulungi ku tsinzira tsitsye tsyosi, Na a veye wetsimbabasi mu miyinzi gyigye gyosi.

¹⁸Yahova a veye himbi ku vosi ava mwaniranga, Ku vosi ava mwanira mu ageligali.

¹⁹A la kolera yavo ava mu tidzanga, lyenya lyavo; A la hulira lilira lyavo, na a va honnya.

²⁰Yahova a lindanga yavo vosi ava mu yanzanga; Navutswa ala dividza avadamano vosi

²¹Munwa gwange gu liidzominya Yahova; Na vyomubiri vyosi vi gasidza lieta lilye litakatifu mihiga nemihiga.