Read lulogooli Zaburi 147 Bible Online

Zaburi 147 - lulogooli bible

Zaburi 147

¹Mwidzominye Yahova; Kigira nubulahi kwimbira Nyasaye wetu tsyokwidzominya; Kigira li veye lyokuyanzidza, na lidzominya li veye lilahi.

²Yahova yombakanga Yerusalemi; A vungidzanga ava salanywa va Israeli.

³A honnyanga avemyoyo gya vunika, Na a boha tsing'oma tsyavo.

⁴A validzanga livalidzwa lyetsing'ereng'ni; A tsi gulikanga ameta gatsyo gosi.

⁵Mwami wetu a veye munene, na wobunyali ligali; Limanya lilye si li nyala kugerwa.

⁶Yahova a latira avahokya: Na a gehidza avadamano kuduka hasi ku marova.

⁷Mwimbire Yahova nelisantidza; Mwimbire Nyasaye wetu nobukana

⁸U landidzanga malesi migulu, U lombera lirova imbula, U meridza bunyasi ku vigulu.

⁹U hedzanga tsinyama vyokulia vyatsyo, U lageridza avana va majikolo aga liranga.

¹⁰Si a yanzidzwa netsingulu tsyeparasi: Si a sangala ne virenge vyomundu.

¹¹Yahova a yanzidzwa mu yavo ava mu tidzanga, Mu yavo ava suuvira tsimbabasi tsitsye.

¹²Widzominye Yahova, O Yerusalemi; Widzominye Nyasaye wowo, O Zioni.

¹³Kigira u dinyiridzi miluguyu gyeviribwa vivyo; A gasidzanga avana vovo mu ive.

¹⁴A kola tsinzako kuva mirembe; A kwigutidzanga nengano indahi ligali.

¹⁵A letanga malago gege ku lirova; Likuva lilye li nyagulanga bwangu ligali.

¹⁶A haananga likonza kuli pamba; A salannya lime libofu kuli ligoke.

¹⁷A sikisanga imbula yamagina kuli vitonge: Ibwaha u nyala kusingira imbiri wobukindu bwibwe?

¹⁸A hilanga likuva lilye na a vi salula: A hudzidza imbuudza yeye, na amadzi a gendidza.

¹⁹A lolekidza likuva lilye ku Yakobo, Na malago gege na miima gyigye ku Israeli.

²⁰Si ya kolera ihiri yindi kali indala kuli yaga mba; Na ku miima gyigye si va gyi manya mba. Mwidzominye Yahova.