Read lulogooli Zaburi 18 Bible Online

Zaburi 18 - lulogooli bible

Zaburi 18

¹Nyanza ive, O Yahova, u veye tsingulu tsyange.

²Yahova a veye lwanda lwange, na lugaga lwange, na muhonyi wange; Nyasaye wange, lwanda lwange, uyu wa nzlvisa mu; Ingavo yange, na ulwiga lwobu honyi bwange, na munara gwange.

³Ndanira Yahova, u dukana kwi dzominywa: Na ndiyo nda honywa ku vasigu vange.

⁴Livererera lyelikudza lya nkumbiridza, Ubunene bwobudamano bwa ntihidza.

⁵Livererera lye Kihadisi lya nku mbiridza; Mitego gyelikudza gya nyola.

⁶Mu lisalira lyange ndanira Ya hova, Na nda lira ku Nyasaye wange: Ya hulira mwoyo gwange mu litempeli lilye, Ne lilira lyange imbiri wewe lingira mu amatu gege.

⁷Hene yaho lirova lya degera nokudengeya; Imise gyevigulu kandi gya degera Kya degera, kigira ya li nobutima.

⁸Mwoki gwa vuya kutwula mu amolu gege Na muliru gwa twula mu munwa gwigwe ni gu lia: Amanda gaakidzwa nagwo.

⁹Yinaminya ligulu kandi, na yika hasi; Kisundi kinene kya li isi wevirenge vivye.

¹⁰Yikala ku mukerubi, na a buluka; Yee, ya buluka ku tsimbaha tsyembuudza.

¹¹Ya kola kisundi ki ve hokuvisa hehe, lihema lilye kumukumbiridza, Kisundi kya amadzi, malesi maliduhu gomigulu.

¹²Malesi maliduhu ga vita mu bulavu bwa li imbiri wewe, Imbula ya magina na amandu gomuliru.

¹³Yahova ya syagukidza inkupa migulu, Na U Veye Igulu Ligali ya vola nomwoyo gwigwe, Imbula ya magina na amanda gomuliru.

¹⁴Naye ya lasa mibano gyigye, na a va salannya; Yee, ya lasa tsimpeni tsinyingi, na a va salannya.

¹⁵Kunangwa tsinzira tsya amadzi tsya loleka, Na imise gyelirova gya kunulwa Ku ligondokera lilyo, O Yahova, Ku lihuudza mwika gwa amolu gogo.

¹⁶Ya tuma kutwula migulu, na a mbugula; Ya ntwulidza mu amadzi manyingi.

¹⁷Ya mbonnya ku musigu wange wetsingulu, Na kuvo ava n lunyiranga; kigira va li netsingulu kuvita inze.

¹⁸Va twulira inze ku lidiku lyekivi kyange; Navutswa Yahova ya li itiru yange.

¹⁹Kandi ya ntwulidza nokumbika hobwiyangu hanene; Ya mbonnya kigira ya nyanza.

²⁰Yahova ya mpa madanyi kuli ubulungi bwange; Kuli ubusiyeku bwa makono gange ya mpa ndiyo.

²¹Kigira ngumiye tsinzira tsya Yahova, Na si ntwuli ku Nyasaye wange ku ubudamano mba.

²²Kigira likalaga lilye lyosi lya li imbiri wange, Na malago gege si ndavukana nago mba.

²³Kandi nda li mudukiru imbiri wewe, Nokwegaya ku bukyamu bwange.

²⁴Kunangwa Yahova u ntungi kuli ubulungi bwange, Kuli ubusiyeku bwa makono gange mu tsimoni tsitsye.

²⁵Ku wetsimbabasi u lelolekidza kuva wetsimbabasi; Ku mudukiru u lelolekidza kuva mudukiru;

²⁶Ku womwoyo mulavu u lelolekidza kuva womwoyo mulavu; Kandi ku mukyamu u lelolekidza kuva muhing'ani.

²⁷Kigira u la honnya ava dambidzwa; Navutswa tsimoni tsyokwegingira, u la tsi gehidza.

²⁸Kigira ive u laakidza itaya yange: Yahova Nyasaye wange, a la lavidza kisundi kyange.

²⁹Kigira ku ive nzatannyi lihe; Noku Nyasaye wange nsiiye lidigi.

³⁰Ku uyu Nyasaye, inzira yeye i veye indukiru: Lilaga lya Yahova li henzeridzeywi; A veye ingavo ku vosi avivisa muye.

³¹Kigira ibwaha a veye Nyasaye, na a ta li Yahova? Na ibwaha a veye lwanda, na a ta li Nyasaye wetu,

³²Nyasaye uyu u mbohanga ubu nyali, Na a kola inzira yange indukiru?

³³Virenge vyange a vi leng'annya nevirenge vyemboongo: Kandi a nsingeridza hadiguluku hange.

³⁴A nalidza makono gange kulwana; Kuduka makono gange ga kumba ubuta bwomugasa.

³⁵Kandi u mpeye ingavo yobuhonnyi bubwo; Na mukono gugwo mulungi gu ngingi Na ubuhoma bubwo bu nnenehidzi.

³⁶U lombeye virenge vyange ubwiyangu isi wange, Na tsinduvatiru tsyange si tsi tereye mba.

³⁷Nda londerera avasigu vange nokuvagumira Kandi si ndirana inyima kuduka va heridzwe.

³⁸Nda va todza, kuduka va la vula kusingira: Va la gwa isi wevirenge vyange.

³⁹Kigira ive u mbohi ubunyali bwokulwana: Winaminyi isi wange yava ava vukira inze.

⁴⁰Kandi u koli avasigu vange kugirunkannya migongo gyavo ku inze, Nduke kudividza yava ava ndunylranga.

⁴¹Vanira, navutswa si ha li nowokuvahonnya; Kali ku Yahova, navutswa si ya va tivulira mba.

⁴²Hene yaho nda va siya kuva kuli ulugukyi imbiri wembuudza; Nda va ta kyova kuli madohi getsinzira.

⁴³Ive u mbonnyi ku lihing'ana lya avandu; U nkoli kuva mutwe gwetsihiri: Avehiri ava nkikiri kumanya va la ntumekira.

⁴⁴Lwa va hulira makuva gange nonoho va la mbugirira; Avageni va legehidza avene ku inze.

⁴⁵Avageni va la niala, Va la twula mbugono bwavo bwo kwivisa nelidegera.

⁴⁶Yahova a veye mwoyo; na lu gasidzwe lwanda lwange; Nyasaye wobuhonnyi bwange a nenehidzwe.

⁴⁷Kali Nyasaye a mbanziranga ki salya, Kandi a gehidzira avetsihiri isi wange.

⁴⁸A mbonnya ku avasigu vange; Yee, u ngingira igulu kuvo ava ntulira; Ive u mbonnya ku wekirage.

⁴⁹Kigira yaga nda santidza ive, O Yahova, hagati hetsihiri, Na ndimba tsinyimbu tsyokwidzominya lieta lilyo.

⁵⁰A hedzanga mwami wewe ubuhonnyi ubunene, Nokukolera mbake wewe tsimbabasi tsyobuyanzi, Ku Daudi noku visukululwi vivye, mihiga nemihiga.