Read lulogooli Zaburi 21 Bible Online

Zaburi 21 - lulogooli bible

Zaburi 21

¹Mwami a la sangala mu tsingulu tsitsyo, O Yahova; Na mu ubuhonnyi bubwo a la sangala ligali ndi

²U mali kumuha lyenya lyomwoyo gwigwe Na u vuii kwambakana liteva lyomunwa gwigwe. [Selaha

³Kigira ive u haananga kuye ubugasu bwobulahi: U mu vikanga itaji yethahabu indahi ku mutwe gwigwe.

⁴Ya teva ku ive livamwoyo, wa mu ha, Kali ubutambi bwamadiku manyingi gemihiga nemihiga.

⁵Ubukumi bwibwe bu veye bunene mu buhonyi bubwo: U vikanga kuye lidzominywa na ubugali.

⁶Kigira u mu kola kuva nobugasu ligali kazozo: U mu kola kusangala nobuyanzi mu tsimoni tsitsyo.

⁷Kigira mwami a suuviranga Yahova, Na ku tsimbabasi tsya U Veye Igulu Ligali a la vula kudengeya.

⁸Mukono gugwo gu la duka ku avasigu vovo Vosi Mukono gugwo mulungi gu la duka ku vosi ava dunyiranga ive.

⁹U la va kola kuli kisambiru kyomuliru inyinga yobutima bu bwo: Yahova a la va mira mu butima bwibwe Na muliru gu la va lia.

¹⁰Makuyu gavo u la ga twulidza mu lirova Na visukululwi vyavo u la vi dividza hagati ha avana va avandu.

¹¹Kigira va ganagana ubudamano ku ive; Va ganagana ubudamano bwa vata nyala kukola.

¹²Kigira u la va kola kugirunkannya migongo gyavo; U la tegekidza migoye gyobuta bubwo mu tsimoni tsyavo.

¹³O Yahova, u nenehidzwe mu tsingulu tsitsyo: Kunangwa ku limba nokwidzo minya tsingulu tsitsyo.