Read lulogooli Zaburi 22 Bible Online

Zaburi 22 - lulogooli bible

Zaburi 22

¹Nyasaye wange, Nyasaye wange, kigira ki u ndeki? Kigira ki u reve ihale ku likonya inze, noku makuva gelikenya lyange?

²O Nyasaye wange, nzanira ive mmbasu, navutswa si u ntivulira; Kandi mbudiku si nkiring'ana mba.

³Navutswa ive u veye mutakatifu, O ive u menyanga mu lidzominya lya Israeli.

⁴Avaguga vetu va ku suuvira: Va suuvira, na ive wa va honnya.

⁵Vanira ive, na va honywa: Va suuvira ive, ni va vula kunyola tsisoni.

⁶Navutswa inze mbeye ing'ende, si mbeye mundu; Mbeye linyegwa lya avandu, na avandu va ndega.

⁷Ava ndola vosi va seka nokunkola kihenyahenye: Va nyiranga minwa gyavo, noku sung'usa mutwe gwavo, ni ra vola,

⁸Ya suuvira Yahova a mu konye; Naye a mu konye, na a va na a yanzeka kuye.

⁹Navutswa ni ive wa ntwulidza mmunda; Wa nsuuviridza, lwa nda li ku tsimbeere tsya mama wange.

¹⁰Nda vikwa ku ive kutwula mmunda; Ive u veye Nyasaye wange kutwula inyinga mama wange ya nzivula.

¹¹U ta va ihaleku inze; kigira kivi ki veye himbi; Kigira si ha li nowokunkonya.

¹²Tsigiriki tsinyingi tsi nkumbiridzi; Tsigiriki tsyetsingulu tsya Bashan tsi veye tsimbega tsyosi.

¹³Tsyalaminya minwa gyatsyo ku inze, Kuli king'ang'a kilulu na ki huumanga.

¹⁴Inze nsunduywe kuli amadzi, Na vigumba vyange vyosi vi teguki: Mwoyo gwange gu veye kuli masang'asa; Gu salulukidzeywi mu mala gange.

¹⁵Tsingulu tsyange tsyumi kuli kijonjo Ululimi lwange lu handi mu tsisaya tsyange; Na ive u ndukidzi mu lugukyi lwelikudza.

¹⁶Kigira tsimbwa tsi nkumbiridzi: Kiduma kya avobwoni ki mbiki mugati; Va tumita makono gange ne virenge vyange.

¹⁷Nyala kuvalidza vigumba vyange vyosi. Va mbenza ni va nyumika

¹⁸Va gavulira tsingubo tsyange hagati havo, Na va kola ikura ku ingubo yange.

¹⁹Navutswa ive, O Yahova, u ta va ihale: O ive muhonnyi wange, u nkonye bwangu.

²⁰U twulidze mwoyo gwange ku kivavi Na u tu uiidze muyanze wange ku tsingulu tsyetsimbwa.

²¹U nkonye ku munwa gweking'ang'a; Yee, ku tsinziga tsyetsing'ombe tsyomigendanyama u mbugiriye.

²²Nda gambira avamitu vange lieta lilyo: Ndidzominyira ive mu livugana.

²³Mwinye ava tia Yahova, mu mwidzominye Mwinye vosi visukululwi vya Yakobo mu mu kuminye; Mwegehidze imbiri wewe mwinye vosi visukululwi vya Israeli.

²⁴Kigira si ya lega kandi si ya dunyira lisaliridzwa lya va saliridzwa; Kandi si a visi mumoni mwimwe kuye; Navutswa lwa yanira kuye, ya mu hulira.

²⁵Lidzominya Ivange li twula ku ive mu livugana linene: Nda tunga kya nda laga imbiri wa yavo ava mu tia.

²⁶Avahoma va la lia ni viguta; Yavo avenyanga Yahova va la mwidzominya: Mwoyo gwenvu gu ve neliva mwoyo mihiga nemihiga.

²⁷Viheri vyosi vyelirova vi lidzulitsa nokwirana ku Yahova; Kandi avetsinyumba tsyetsihiri tsyosi va la sigama imbiri wowo.

²⁸Kigira ubwami bu veye bwa Yahova; Naye a veye mwami ku tsihiri.

²⁹Avakomeru vosi velirova va la lia nokusigamira: Kandi ava tsia mu lugukyi va la sigamira imbiri wewe, Kali uyu u ta nyala kwehonnya a ve mwoyo.

³⁰Kisukululwi ki la mu tumekira; Kandi likula lidzanga li la volerwa makuva ga Yahova.

³¹Va ladza na va la landidzira ubu lungi bwibwe Ku avandu ava livulwa, niye u koli yibu.