Read lulogooli Zaburi 27 Bible Online

Zaburi 27 - lulogooli bible

Zaburi 27

¹Yahova a veye ubulavu bwange na ubuhonnyi bwange; Nda tia bwaha? Yahova a veye lugaga lwelivamwoyo lyange; Nda va nobutii ku bwaha?

²Ava koli vobudamano lwa vesunda ku inze kulia inyama yange, Kali avasigu vange na avadambidzi vange, vikigitala nokugwa.

³Kali ni li va lihe li nkumbiridza, Mwoyo gwange si gu la tia: Kali ubulwani ni bu vuka ku inze, Mu yibu nda va nelisuuvira.

⁴Kindu kilala ntevi Yahova, yiki nda kyenya: Mmenye mu inyumba ya Yahova madiku gange gosi, Kulola ubulahi bwa Yahova, Nokuganagana mu litempeli lilye.

⁵Kigira mu lidiku lyekivi, a la ninda makiriri mu lihema lilye: Mu king'odze kyelihema lilye a la nkinga; A la nsingeridza ku lwanda.

⁶Kalunu mutwe gwange gu la gingwa igulu ku vasigu ava nkumbiridza; Na nda haana mu lihema lilye, vihaanwa vyelisangala; Ndimba, yee, ndimba lwokwidzominya Yahova.

⁷U hulire, O Yahova, lwa nzanira nomwoyo gwange: U mbererere, na u mbugirire.

⁸Lwa wa wla, Mwenye mumoni mwange; mwoyo gwange gwa ku volera Ndenya mumoni mumwo, O Yahova.

⁹U tivisa ku inze mumoni mu mwo; U tesegana mutumekiri wowo nobutima: Ive wa li ubuhonnyi bwange; U ta sula inze, kinga kundeka, O Nyasaye wobuhonnyi bwange.

¹⁰Lwa dada wange na mama wange va ndeka, Hene yaho Yahova a la ndola.

¹¹U nzegidze inzira yoyo, O Yahova; U nzimirire ku inzira inungi Kigira avasigu vange.

¹²U ta mbika mu lyenya lyavasigu vange: Kigira avalolekidzi avobubehi va mbukiye, Na ava heera kirage kyere.

¹³Nda kudza mwoyo, ni mba ni mbula kusuuvira kulola ubulahi bwa Yahova Mu kivala kyavelivamwoyo.

¹⁴U lindirire Yahova: U ve mugulu, na u leme mwoyo; Yee, u lindirire Yahova.