Read lulogooli Zaburi 28 Bible Online

Zaburi 28 - lulogooli bible

Zaburi 28

¹Ndanira ive, O Yahova: Lwanda lwange, u ta va ku inze kuli u ta hulira; Gase, nu va nu kiring'ana ku inze, Nda gwa kuva kuli yavo avikanga mbogo.

²U hulire mwoyo gwelisaala lyange, lwa nzanira ive, Lwa nginga makono gange ku luvega lwa hatakatifu hoho.

³U ta sunda inze haluvega halala na vadamano mba, Na halala nava kola ubwoni Ava volanga mirembe navatendevavo, Navutswa kidamano ki veye mu myoyo gyavo.

⁴U va he kuli likola lyavo, na kuli ubudamano bwelikola lyavo: U va he kuli miyinzi gyamakono gavo; U va tunge madanyi gavo.

⁵Kigira si va henzeridza vikolwa vya Yahova, Kinga miyinzi gya makono gege, A la va sambula, nokuvula kuvombaka.

⁶Ubugasu bu ve ku Yahova, Kigira u huliye mwoyo gwelisaala lyange.

⁷Yahova a veye tsingulu tsyange na ingavo yange; Mwoyo gwange gu mu suuviye, na mbonywa: Kunangwa mwoyo gwange gu sangala ligali; Ninze nda mwidzominya nolwimbu lwange.

⁸Yahova a veye tsingulu tsyavo, Naye a veye ulugaga lwobuhonyi ku aveve ava vakwa na maguta.

⁹U honnye avandu vovo, na u gasidze miyandu gyigyo: Kandi u ve mwayi wavo, na u va ginge kazozo.