Read lulogooli Zaburi 31 Bible Online

Zaburi 31 - lulogooli bible

Zaburi 31

¹Ku ive, O Yahova, nzirukiye; U ta ndeka kuva isoni: U mbonnye mu bulungi bubwo.

²U tegidze ugutu gugwo ku inze; u mbonnye bwangu: U ve ku inze lwanda lwetsingulu; Inyumba yempinga yokumbonnya.

³Kigira ive u veye ulwanda lwange na ulugaga lwange; Kunangwa kigira lieta lilyo, u nzimirire, nokunzaya.

⁴U ntwulidze mmutego gwa va ntegera makiriri; Kigira ive u veye impinga yange.

⁵Mbika mwoyo gwange mmukonogugwo: Ive u ntungiye, O Yahova, ive Nyasaye weligali.

⁶Ndunyira yavo ava gumira vyavutswa vyobubehi; Navutswa inze nsuuvira Yahova.

⁷Nda yanza nokusangalira mu tsi mbabasi tsyobuyanzi bubwo; Kigira ive u loli lidambidzwa lyange: Ive u manyi mwoyo gwange mu kivi kyagwo;

⁸Na ive si u mbohi mmukono gwo musigu; U singeridzi virenge mu bwiyangu bunene.

⁹U mbere tsimbabasi, O Yahova, kigira mbeye mu kivi: Imoni yange i niala kigira liverera, yee, mwoyo gwange na mubiri gwange.

¹⁰Kigira livamwoyo lyange li menyanga mu liverera; Na mihiga gyange gyi veye mu likenya: Tsingulu tsyange tsi kamanga kigira ubukyamu bwange, Na vigumba vyange vyumi.

¹¹Kigira avasigu vange vosi, ngwiye amanvego, Yee, ligali ku avatende vange, Na litihidza ku yavo ava mmanya: Yava ava ndola kyova va nziruka.

¹²Nzivireywi kuli mundu u kudzi nokwivirirwa: Mbeye kuli kiju kyoneku.

¹³Kigira mbuliye limonya lyavanyingi, Ubutii bu nkumbiridza tsimbega tsyosi; Lwa va ntwulira mu livolerana makuva gavo Va saavira kutwulidza livamwoyo lyange.

¹⁴Navutswa inze nda suuvira ive, O Yahova: Nda vola, U veye Nyasaye wange.

¹⁵Tsinyinga tsyange tsi veye mmukono gugwo: U mbonnye mmukono gwa vasigu vange, na mmukono gwa yavo ava dambidzanga.

¹⁶Waakidze mumoni mumwo ku mutumekiri wowo: U mbonnye mu tsimbabasi tsyo buyanzi bubwo.

¹⁷O Yahova, u ta ndeka kugumirwa netsisoni; kigira nkwaniye: U leke avadamano kugumirwa netsisoni, va kiring'ane mu Kihadisi.

¹⁸Minwa gyobubehi gyi kolwe kuva tsidimbidi, Gyi vola ku valungi madinyu nobwigingiri, Kandi nekirage na lilega.

¹⁹Ubulahi bubwo bu veye bunene kuduka ndi, Bwa u vikiye ava ku tidzanga, Bwa u koleye avirukira ku ive, Imbiri wavana va avandu

²⁰U la va visa mu livisiru lilyo ku ligenderera lyavandu: U la va visa makiriri mu lihema ku lihangalana lyetsinimi.

²¹Yahova a gasidzwe; Kigira u mmannyi tsimbabasi tsitsye tsyobuyanzi tsyokuge nnya mu lidala lyetsingulu.

²²Ku inze, nda vola bwangu bwa ngu, Nkalagwi imbiri wetsimoni tsitsyo: Navutswa ive wa hulira mwoyo gwelisaala lyange, Lwa nzanisa ive.

²³O mu yanze Yahova, mwinye vosi avatakatifu veve: Yahova a lindanga avasuuvirifu, Na a tunganga ligali uyu u gendanga nobwigingiri.

²⁴Mu ve avagulu, mu leme mwoyo, Mwinye vosi ava lindirira Yahova.