Read lulogooli Zaburi 35 Bible Online

Zaburi 35 - lulogooli bible

Zaburi 35

¹O Yahova, u hing'ane na yava ava hing'ananga na inze: U lwane na yava ava lwananga na inze.

²U vugule ikuti na ingavo, U singire kumbera.

³U twulidze litimu, u ngayidzire yavo ava nondereranga: U volere mwoyo gwange, Inze mbeye ubuhonnyi bubwo.

⁴Va leganywe na va ve isoni, yava avenyanga mwoyo gwange; Viranywe inyima, na va ve isoni yava ava ganagananga ubudamano ku inze.

⁵Va ve kuli mukuudzi imbiri wembuudza, Ingelosi wa Yahova a Da kunganga.

⁶Inzira yavo i ve nekisundi nobuterere Na ingeiosi wa Yahova a va kunganga.

⁷Va visira inze mutego gwavo mmbogo, bugira kivune: Bugira kivune va yaviye mwoyo gwange ubwina.

⁸Lidiva li mu dukire lwa a ta manya; Na mutego gwa ya visa, gu mu gumire mwene: Mu lidiva zana a gwe mu.

⁹Mwoyo gwange gu la sangala mu Yahova: Gu la yanza mu buhonnyi bwibwe.

¹⁰Vigumba vyange vyosi vi la vola, Yahova, ibwaha a leng'ana na ive, Wa honnyanga mudaka ku uyu u veye netsingulu kumuguuta, Yee, mudaka na mudambi ku uyu wa mu nuula?

¹¹Avaloli avakyamu va singira; Va nteva ku vindu vya nta manya.

¹²Va ntunga ubudamano ku bulahi, Kuvereridza mwoyo gwange.

¹³Navutswa inze, lwa va li valwaye ingubo yange ya li ligunia: Nda saliridza mwoyo gwange nelihonga lilia; Na lisaala lyange lya irana ku kiritu kyange.

¹⁴Nda genda kuli a veye mulina wange kinga amwavo wange: Na ndinama neliverera, kuli u syomeranga mama wewe.

¹⁵Navutswa mu lyekigitala lyange va sangala, ni vevungidza avene: Na avahanzahanza vevungidza ku inze, na nda vula kumanya; Va ntandula, na va vula kuleka.

¹⁶Kuli avekihenyahenye mu lilia, Va dyedyeyidza amino ku inze.

¹⁷Mwami, u la henza kuduka inyinga ki? U honnye mwoyo gwange ku lidividza lyavo, U honye muderwa wange ku ving'ang'a.

¹⁸Nda ku santidza mu livugana linene: Nda kwidzominya mu avandu vanyingi.

¹⁹U ta leka yavo ava veye avasigu vange, va sangale ku inze bugira kivune; Kandi yavo ava ndunyiranga vutswa va ta simanira tsimoni ku inze.

²⁰Kigira si va vola mirembe mba; Navutswa va ganagana makuva gobugadi ku avemirembe mu kivala.

²¹Yee, va kunula munwa ligali ku inze; Va vola, Aha, aha, tsimoni tsyetu tsi ga loli.

²²Ive u loli, O Yahova; u ta kiring'ana mba: O Mwami, u ta va ihale ku inze.

²³U vuke, u singire kulungikidza vya ndukira, Kali liva lyange, O Nyasaye wange, na Mwami wange.

²⁴O Yahova Nyasaye wange, u nkalagire kuli ubulungi bubwo; Va ta duka ku sangala ku inze.

²⁵U ta va leka va vole mmyoyo gyavo, Aha, kwenya ndiyo: U ta va leka va vole, Ku mu miri.

²⁶Va leganywe nokuva isoni halala, yavo ava sangalira kivi kyange: Va vikwe tsisoni nelikyaywa, avegingira ku inze.

²⁷Va yanze, na va sangale, yava ava yanzanga makuva gange malungi: Yee, va vole kazozo, Yahova yidzominywe, U yanzanga mirembe gya mutu mekiri wewe.

²⁸Na ululimi lwange lu la vola ubulungi bubwo Nokwidzominya ive mbasu bei.