Read lulogooli Zaburi 38 Bible Online

Zaburi 38 - lulogooli bible

Zaburi 38

¹Yahova u ta mbera amageli mu butima bubwo; Kinga kunkuyira mu butima bwoluya bubwo.

²Kigira mibano gyigyo gyi some kira mu inze, Na mukono gu mmina ligali.

³Si ha veye nobulamu mu mubiri gwange kigira ubutima bubwo; Kandi si ha veye nelisosa mu vigumba vyange kigira ubwoni bwange.

⁴Kigira ubudamano bwange bu nkuniki kuduka ku mutwe gwange: Kuli musigo muliduhu bu mminan'ga kuvita.

⁵Tsing'oma tsyange tsi funyanga na tsi gundanga; Kigira ubusiru bwange.

⁶Ndambidzanga na nzinamanga ligali; Ng'endanga mbasu bei neliverera.

⁷Kigira kikenge kyange kizuye lisambwa; Kandi si ha veye nobulamu mu mubiri gwange.

⁸Na nkudzi mwoyo, na ndekerani ligali: Nkenyi ku livula kusosa mu mwoyo gwange.

⁹O Yahova, lyenya lyange lyosi li veye imbiri wowo; Na likenya lyange si li viswa ku ive.

¹⁰Mwoyo gwange gu kupagananga, tsingulu tsyange tsi twuli ku inze: Kandi ubulavu bwetsimoni tsyange tsi twuli ku inze.

¹¹Avayanze vange na avalina vange va singiye haluvega kigira liduywa lwange; Na aviko vange va singiye ihale.

¹²Yavo kandi avenyanga livamwoyo lyange va nteganga mitego; Na yavo avanyenyeranga kivi va volanga tsimbemba, Na va ganagana ubugadi mbasu bei.

¹³Navutswa inze, kuli wa hana amatu, si mbulira mba; Na inze mbeye kuli idimbidi u vula kukunula munwa.

¹⁴Yee, mbeye kuli mundu u vula kuhulira, Womunwa gwigwe si gu veye namakuva gamageli.

¹⁵Kigira nsuuviranga ive, O Yahova: Ive u la ntivulira, O Mwami Nyasaye wange.

¹⁶Kigira nda vola, Gase va la sangala ku inze: Lwa kirenge kyange ki terera, vegingire avene ku inze.

¹⁷Kigira nzetegeki kugwa, Na liverera lyange li veye imbiri wange kazozo.

¹⁸Kigira ndeyama ubukyamu bwange; Na nda vererera ubwoni bwange.

¹⁹Navutswa avasigu va veye avasaguluku na avetsingulu; Na yavo ava ndunyira bugira kivune, va medeka.

²⁰Na yavo ava tunganga ubudamano ku bulahi Va veye avahing'ani ku inze, kigira nondanga agobulahi.

²¹U ta ndeka, O Yahova: O Nyasaye wange, u ta va ihale ku inze.

²²U kole bwangu kunkonya, O Mwami wobuhonywi bwange.