Read lulogooli Zaburi 39 Bible Online

Zaburi 39 - lulogooli bible

Zaburi 39

¹Nda vola, Nda henzeridza tsinzira tsyange, Mbule kwona nolulimi lwange: Nda gaya munwa gwange netsinkoba, Lwa avadamano va veye imbiri wange.

²Nda li ni mbula kuvola, nda kiring'ana, kali ku bulahi; Na liverera lyange lya vukidzwa.

³Mwoyo gwange gwaaka mu inze; Lwa nda ganagana muliru gwaduka; Ma nda vola nolulimi lwange:

⁴Yahova, u nkole kumanya kiheri kyange, Na ligera lya madiku gange, kuli li veye; U nkonye kumanya ubudedekere bwange bu duka ndi.

⁵Henza u koli madiku gange kuva kuli ligera lyekigalo; Na ubuhindiri bwange si bu veye kindu imbiri wowo: Ligali mundu sa mulala mu bulahi bwibwe a veye mwika vutswa. [Selaha

⁶Ligali sa mulala a gendanga na a veye kiriri vutswa; Ligali va henda mwoyo vutswa: A vungidzanga ubutugi na si a manya ibwaha a la bu vugula.

⁷Na kalunu, Mwami, nindanga ki? Lisuuvira lyange li veye ku ive.

⁸U ntwulidzire mahyolo gange gosi: U ta ndeka kuva wokulegwa na vobusiru.

⁹Nda kiring'ana, si nda kunula munwa gwange; Kigira ive wa ga kola.

¹⁰U twulidze liduya lilyo ku inze: Mmali kuheridzwa nelikuya lyomukono gugwo.

¹¹Inyinga ive u lungikidza namageli mundu ku mahyolo gege, U heridza ubulahi bwibwe kuli tsisere: Ligali avandu sa mulala a veye mwika vutswa. [Selaha

¹²U hulire lisaala lyange, O Yahova, u hulire lilira lyange U ta kirang'ana ku maliga gange: Kigira mbeye ku ive mugeni, Na mumenya kuli avaguga vange vosi.

¹³U ndeke, nduke kunyola tsingulu, Ni nkikiri kutwula hano, nokuvula kuva ho.